【第十三章 終章】
 
就喺混戰即將發生嘅一刻,天上面出現一個大型玻璃罩,將整個廣場掩蓋。
 
「咩事?」
 
突然出現嘅玻璃罩令F感到訝異。
 
「係我做嘅。」
 


大林天澤手中攞住嘅,係iPhoneα8。
 
「你…都唔想俾呢個時空嘅人見到呢個場面架?」
 
「你想點?」
 
F起咗疑心。
 
「我只係想令我哋隱形啫。唔使咁緊張。」
 


「而家就冇問題喇。」
 
大林天澤喺電話上面禁咗幾下,所有機械人身上嘅燈就著哂,亦都企好哂,隨時可以開始戰鬥。
 
F都向佢嘅特務下令,叫佢哋去打機械人。
 
唔使幾秒,場面就變得十分混亂。
 
機械人同特務打嘅打、殺嘅殺,畫面就好似嗰啲大製作電影入面嘅打仗場面咁。
 


細林天澤同大林天澤就喺旁邊,負責控制機械人軍團嘅陣列同模式。
 
馬泰就同機械人軍團一齊去打F嘅特務。
 
混亂中,可以見到F方特務一拳接一拳咁向機械人打去,但係由於機械人身軀異常堅硬,F方特務點打都打唔爛啲機械人。
 
相反,一拳有幾十公斤重量嘅機械人,好輕易就打低脆弱嘅人類。
 
不過,由人類製造出嚟嘅機械人,智慧始終不及人類本身。
 
F方特務入面幾個懂得戰鬥技巧嘅,以太極嘅方法,將機械人嘅蠻力攻擊舍去。
 
就係咁,有史以嚟第一次人類同機械人嘅大戰,就開始咗。
 
三十分鐘過去。


 
雖然人類嘅智慧高,不過血肉之軀,體力仍然有限,唔似利用可再生能源機械人,能量絲毫不減。
 
經過一番打鬥,仲可以企起身嘅F方特務,由開打前嘅七八十個,變成二三十個。
 
而林天澤方嘅機械人,因為機械人唔會痛,又堅硬,而且佢哋體內能量又多,所以仍然有五六十個係仲可以戰鬥。加上只係受咗少少傷嘅馬泰,林天澤方自然佔優。
 
「F,睇嚟…你班人都死得七七八八,你肯停手未?」
 
F嘅表情竟然一啲都唔緊張,仲十分奸狡。
 
「Exci-pill嘅藥效,應該差唔多出現喇…」
 
禁藥喺呢個時候終於發揮效用。
 


早就已經瞓低咗嘅F方特務,開始一個個咁企返起身。
 
「Exci-pill嘅藥效係,令人體感受唔到痛楚,同埋令佢哋唔會覺得攰。而且喺藥力發揮嘅期間,佢哋嘅體力係會用唔盡。所以Exci-pill喺被發明之後,立即被列為禁藥。」
 
大林天澤緊張咁講出Exci-pill嘅效用。
 
而家嘅形勢,由林天澤方佔優,漸漸轉為F方人數佔優。
 
F方特務有戰鬥能力嘅,係七十六名。
 
林天澤方仍然有戰鬥能力嘅機械人,係二十九個。
 
啫係…一隻機械人,大致要應付2.6個F方特務。
 
戰鬥繼續。


 
有啲特務一個人同一隻機械人單挑;有啲特務幾個人一齊對付一隻機械人;有啲特務就一個人對付幾隻機械人。
 
場面仍然混亂,但係混亂中能夠睇得出,F方特務係以人數佔優。
 
而且食咗禁藥,特務打極都唔趴低,不斷企返起身。
 
三十分鐘又過去。
 
場上仲可以打交嘅機械人數量唔夠十隻,仲企到起身嘅特務數量就剩返廿個。
 
Exci-pill嘅藥效,都開始消失。
 
特務們開始感到痛楚,亦都筋疲力盡。
 


當最後一個特務趴低,殘餘嘅機械人都俾大林天澤熄咗機。
 
馬泰就坐咗喺度休息,而由頭到尾都冇加入戰團嘅邱一晉,就企咗喺F隔離。
 
「F,而家嘅戰果,大家都睇到。」
 
大林天澤向F道。
 
「冇…冇可能…我始終…都係要輸俾你?」
 
F跪低。
 
「收手啦。你仲想玩到幾時?」
 
細林天澤都開聲。
 
F細細聲同隔離嘅邱一晉講咗句。
 
「Plan B。」
 
正當林天澤眾人喺度諗緊佢哋喺度做緊咩嘅時候–
 
砰。
 
揸住槍嘅係邱一晉。而受傷嘅…係林天澤,2056年嘅林天澤。
 
「你…!」
 
大林天澤禁住自己嘅左胸,鮮血從佢嘅手指罅中流出。
 
「林博士!」
 
馬泰見到咁嘅情況,十分憤怒,佢向邱一晉跑去。
 
「你呢個人渣!」
 
砰。
 
第二下槍聲。今次受傷嘅係馬泰。鮮血從佢嘅左肩流出。
 
「哈哈哈!我先係大贏家!」
 
F同邱一晉轉身就走。
 
細林天澤跪低咗。
 
佢知道,呢度唔係漫畫世界,唔係憤怒就可以爆發力量反勝敵人,佢更加知道,佢眼前兩人嘅死已經成為事實。
 
佢好憤怒,好悲傷,但係佢就咩都做唔到。
 
仲陪伴住佢嘅嘢,就只有無助,同埋絕望。
 
突然,佢見到馬泰身邊有把槍。
 
佢行咗過去,攞起咗把槍。
 
舉起槍嘅細林天澤,全身顫抖。
 
「好似打機咁啫,唔難嘅…」
 
佢喺心入面咁樣安慰自己。
 
「更何況,我而家要殺嘅,係人渣范子軒。」
 
呢個時候,林天澤腦袋已經一片空白。
 
砰。
 
F後腦中槍。
 
林天澤估唔到自己會走上殺人呢條絕路。
呢個時候,佢精神終於崩潰。
 
F用手禁住後腦,轉身望住林天澤。
 
「范子軒。今次你失策喇。」
 
林天澤呢個表情,已經係生無可戀,走上不歸路嘅表情。
 
「可…可惡!」
 
F口中吐出鮮血,斷氣身亡。
 
「不過…呢一次,冇人贏到。」
 
林天澤用槍指住自己嘅頭。
 
砰。
 
嗶嗶嗶嗶,嗶嗶嗶嗶…
 
2016年10月3日
 
林天澤坐咗起身,禁熄咗旁邊嘅鬧鐘。
 
「係…係夢?」
 
「阿仔!起身返學喇!」
 
不遠處嘅廚房傳出阿媽嘅聲音。
 
「係喎…今日星期一。」
 
林天澤發現自己成身濕透。
 
「我竟然標哂冷汗。」
 
林天澤好快咁梳洗完,換埋衫,準備出門口。
 
佢一路上不斷諗住佢發嘅「夢」嘅內容。
 
未來林天澤…時光機…范子軒…馬泰…
 
到咗學校門口,佢見到一個好面善嘅人。
 
…西裝友。