有得回到過去，其實係咪件好事？: 第一章

香港人冇野叻，最叻就係發夢，最常發嘅夢不外乎中六合彩頭獎﹑返工前打八號風同埋回到過去。打風？學子華神話齋，打個邊爐都打得耐過個風啦。中六合彩？買完張飛，鋪完草皮，唔該你聽朝準時返工，咪遲到添呀。至於回到過去，分分鐘未來世界真係會做得到。而家科技咁發達，冇野話得埋，成功機會可能仲大過樓主係有生之年中六合彩頭獎。冇中頭獎嘅我，就梗係要面對現實，正正經經返學讀書做野搵錢啦。
 
「阿智，起身返工啦！」
 
你班友實以為我一定又係要靠老母叫先識起身仲要一陣趕頭趕命換衫狗沖返工架啦。
 
「起左啦！廿歲啦老母我，唔洗下下當我細路要叫我起身架。」
「鬼叫你咁大個人都仲係咁白痴咩，你係大個仔嘅，就快啲去追返個女朋友啦。」
「…….，晨早流流講埋啲咁嘅野。返工先啦，今晚煮我飯呀。」
 


我叫阿智，廿歲仔，a2，讀緊u，唔好問邊間u，冇開名你就知咩料啦。而細佬每個sem嘅gpa都係岩岩好夠，仲要撞岩暑假，名副其實係廢青。不過吹咩，都叫做讀緊大學丫。頭先話返工，咁而家放緊暑假，幾廢都要搵返份part time賺下銀兩嘅，如果唔係邊有錢出街。但係諗返轉頭，上個暑假我都真係幾廢，工又冇乜點返，至於點解，你地明嘅，咪掛住同女朋友出去玩囉，唉，而家係ex先岩。