拍拖一周年

作為一個香港教育制度下，最成功嘅失敗者，我梗貫徹由細到大只趕dead line嘅作風啦。

12月10號，一個我同阿穎拍拖一周年嘅日子，理應一早plan好哂禮物同行程啦。錯哂啦，我乜都冇做過。雖然有探過阿穎嘅口風，但大家都知，女人啦喎，梗係乜都冇所謂架，你估我信唔信丫嗱？我信咗……

既然講到咁冇所謂我就梗係hea得就hea啦，但當呢日愈嚟愈近，個心始終開始有種不安嘅感覺。而搭緊車個陣，阿穎亦都開始問：「記唔記得10號咩日子呀？」

挑你咁就想伏到我，講笑咩。「記得，拍拖一周年丫麻！」

「咁個日我哋去邊興祝呀？」



仆街啦，我腦海突然一遍空白，我真係hea到完全冇咗回事……

「到時你咪知囉！」到時你咪知我乜都冇準備過，然後我俾你毀屍滅跡，我諗我應該係墳墓度過。

「講嚟聽下啦，衰人！」阿穎仲要用把好嬌嗔嘅聽音講呢句，嗚呀～～～～～

「講咗冇神秘感呀！」我都未諗到，點講啫……

返到屋企，第一時間上高登開post，問下拍拖一周年應該係邊到慶祝好，點知啲回復大致上得兩類：



「早餐->啪啪啪->午餐->啪啪啪->晚餐->啪啪啪->返屋企」屌，由朝啪到晚條鳩唔斷都精盡人亡啦。

「拍拖一周年的機會不是屬於我的」咁同回應我條問題有咩直接關係呀，定係想預告我乜都冇準備，當日會俾人飛？

高登都係唔可靠架啦，唯有問下fd啦。

「喂，阿強，你同Mary拍拖一同年係邊到興祝架？」

阿強淫笑咗一下之後話：「係屋企大戰300回合跟住就瞓到第二日啦。」



我強忍住掟電話嘅衝動，再問：「咁你送咗啲咩俾Mary做一周年嘅禮物呢？」

「你問啱人啦，我送咗盒杜雷斯十二個裝俾Mary，睇下我幾慳，送完俾佢，最後自己用返，你估我唔到咧！」阿強仲好沾沾自喜咁講。

屌，恕我問錯人，同時鬼唔望個12個杜雷斯全部穿哂窿！

唉，點算呢，得返一日都唔夠，唔係真係等死呀？唔係喎，點解唔直接問下阿穎呢！於是我拎起個電話……

「喂，啱啱先見完咋喎，咁快掛住我啦，嘻嘻！」

「哈，係呀……」勉強咁講出呢幾隻字真係假到自己都想打自己……一諗到我大難臨頭，阿穎突然變身做哥斯拉，一腳踩到我血肉模糊嘅樣，邊到仲識講笑……唔係喎，哥斯拉好似係善良架喎，係啲超人懶係要醜化佢咋麻。可能隻哥斯拉，阿，唔係，係阿穎會原諒我嘅忙碌，所以唔得閒諗點興祝啫……

「你講咩話！！！！唔知去邊？！！！！吼！！！！！」

啊啊啊～～～～～～唔得ff得太過份，返返嚟現實先……



「阿穎呀，你呢，有冇話邊到想去架……」嗱，幾好丫，又冇漏口又幾自然，冇破綻嘅！

「好多喎，op啦，迪士尼啦，山頂啦……多到數唔哂喎……」

頂，你生日咪去完op囉，暑假咪去咗迪士尼囉，重陽先啱啱同你登高去山頂……其實香港係咪真係咁無聊，咁冇嘢行呀……

「um……仲有冇第二啲哋方特別想去？」

「做咩呀，你唔好話我知你未plan過架！」阿穎開始用把帶點野蠻嘅聲線嚟問我，頂，重案組審人講粗口應該都冇咁恐怖……

屌，講呢啲……

「hehe…點會未呢，不過想睇下你會唔會咁啱想去嘅地方同我plan嘅一樣咋麻！！」
係呀，就係乜都未plan而家咪嚟探口風囉，你講完，再帶你去，仲可以話我哋心靈相通添……



「咁咪得囉，聽日交俾你啦，我冇所謂架，只要同你一齊就得架啦！唔講啦，沖涼先，一間再打俾你啦！」阿穎再次回復返個把溫柔嘅聲線。

係同我一齊就得啦麻？！嘻嘻～～擔心咗幾日嘅我終於露出笑容，不過係奸笑嘅笑……

笑咩啫，禮物呢？係喎，真係金翅仆街鳥……唔係啦，反正都係死，求其打篇文送俾佢都好過乜都冇丫……

係呀，唔洗望啦，就係呢篇呀，surprise?!

其實個聽日個行程好簡單，就係係我屋企，玩煮飯仔，估我唔到啦掛！

呀爸呀媽方面，請佢哋出街食飯就乜都解決啦，煮飯仔啦喎，廚房唔爆炸我當成功架啦，基本上就係咁安排，至於實際上會唔會激到佢飛咗我啦，就另作別論啦。

到咗正日，阿穎問起我去邊嗰陣，我都係唔太敢答佢，只係同佢講，你跟住我就得啦。



之後佢真係乖乖地咁，一路只係係到同我傾計，由得我帶佢行，而我跟本就係由佢屋企樓下，行去地鐵站，搭返我屋企，到阿穎發現嗰陣，已經到咗我屋企樓下。

「um…啫係咁，其實呢，今日想同你係屋企玩煮飯仔，點睇呢……」我一路講個身一路縮，好怕佢會將我碎屍……

「攪錯呀，又唔早講，你知唔知我本身諗住你帶我去邊都好，夜晚就同你返我屋企煮飯架麻，我餸都買好啦！」阿穎帶點洩氣咁講。

吓，劇情峰迴路轉得咁快嘅，明明呢個只係一個情急智生，純為保命嘅辦法咋喎……

「吓……點解你會諗住煮飯仔嘅……」我仲未接受到呢個咁夢幻嘅現實……

「慳錢丫麻，你諗下喎，食餐好嘅閒閒地都幾百蚊，求其嘅又同平時冇分別，咁又要慳錢得嚟特別喎，咪一齊煮飯囉，你係咪都係咁諗呢！！」阿穎一臉天真咁係到數住呢堆好處，望住佢嘅我真係不禁心生甜意。

「嘻…哈…係呀……」唔通話你知我乜都冇plan過先臨急臨忙諗出嚟咩……

「都話我哋心靈犀架啦！！嘻～」「之但係，冇理由咁早就煮飯架，而家我哋去邊先？」



「不如學阿強同Mary咁啦～」

到咗夜晚，我哋因為攪到個廚房變成伊拉克咁，最後都係出咗去食板前……

呢個時候，阿穎問我：「我份禮物呢？」

於是我打開手機，將呢篇文俾咗佢睇，得返嚟嘅評語係……

「冇是咁的，0分重作。」

我先係瞳孔擴張再反白，幾度斷氣先回復正常……

「你……係絲打！！！！！」

「咩啊，我唔明喎，嘻嘻～」

唔好扮啦，我肯定你有上高登……今次仆街啦，高登仔成日話唔好俾自己條女上高登，而家……

阿穎繼續話：「你篇文好有心思呀，我第一次收到份咁有心思嘅禮物咋！！！」

嘩，係真唔係啊……

「咁我份禮物呢？」唔會到你冇準備呀……

「頭先咪俾咗你囉……」阿穎紅都面哂咁講。

我諗咗陣……仆街啦，唔係頭先係張床到呀……

「係呀，你睇你個咸濕樣諗到出哂面，唔洗講都知你諗咩啦！」頂你，我唔開聲你都知我諗咩，拍戲咩！

「咁都算係禮物？！你嘅第一次已經做咗我生日禮物架啦喎！」屌你仲慳過我喎。

「我今日嘅第一次丫麻！」屌，咁玩哂架啦……

就係咁，係我同阿穎呢啲咁9唔搭8嘅對話中，渡過咗我哋嘅一周年紀念……

雖然呢一年同阿穎嗌過交，冷戰過，我又賤格口臭仆街咸濕，佢又蠢又惡又癲又傻，但我仍然好慶幸可以有呢個女人陪我走過呢一年，阿穎，祝我哋一周年快樂，願我哋可以一齊走過人生每段路。