半路殺出一個「美國隊長」張力,木仔即時降Le變成咖哩啡。看著鯊魚和Yenny像粉絲一樣圍繞著張力,木仔實在覺得不是味兒⋯⋯

他心裡想:「算吧啦,呢D機會都唔係留俾我㗎喇⋯⋯其實都差唔多夠鐘去殮房啦⋯⋯依家坐叮叮過去啱啱好添⋯⋯」

於是,他悄悄地從擁擠的人群中退出了舞池,黯然神傷地乘坐叮叮前往堅尼地城⋯⋯

#####

這是自從木仔得仙氣開眼後第一次坐叮叮,他上車後才發現,原來與醫院不遑多讓,電車上載著不少遊魂野鬼的!對他來說,這種情景已經是習以為常。他在上層車廂找個窗邊的空位左下來。





「天涯⋯⋯涯⋯⋯呀⋯⋯海⋯⋯海⋯⋯角⋯⋯」

一陣淒美的歌聲帶夾涼氣從車廂的另一邊徐徐傳進木仔的耳窩,他不禁打了個冷顫⋯⋯

他朝那邊一看,原來對面坐著一個穿紅色著旗袍濃妝豔抹的女人,眼眶隱隱泛著淚光,一手托著腮,一手悠悠的撲扇,幽怨地哼歌。他想:「哦⋯⋯係喔,以前西環石塘嘴果頭好多煙花之地噶喔⋯⋯唉,真係『同是天涯淪落人,相逢何必曾相識』⋯⋯」

突然,歌聲停頓了,那女人激烈的抖動,面容扭曲,口吐白沫,痛苦地呻吟呼救:「救⋯⋯我⋯⋯好心⋯⋯救⋯⋯我⋯⋯」

當木仔猶豫著要不要伸出援手之際,一隻烏鴉飛進了電車,站在木仔前面說:「咪鬼多事啊,佢鴉片癮發作咋!





「哦⋯⋯」

接著Lily通過烏鴉的嘴,壓低聲音說:「殮房大門口密碼係9413,去4號房搵我。」說罷烏鴉就飛走了。

木仔聽Lily的話,壓抑著自己的同情心,不理紅衣女鬼的求救。到站落車時,女鬼停止了呻吟,在木仔身後幽幽的撒嬌:「不解溫柔,討厭⋯⋯」

#####

木仔按Lily的指示到了殮房裡的4號房,那裡的佈置跟之前一樣,不同的是現在房裡沒有任何屍體。





Lily說:「你都幾準時吖,唔錯,手機攞出嚟放响度,落堂俾返你。」

「哦,我哋上幾耐堂㗎?」

「唔知㗎,睇你嘅悟性有幾高啦,你趕住走咩?」

「呃⋯⋯唔係⋯⋯」木仔心想:「我應承左鯊魚埋單㗎⋯⋯」

「咦?你面紅紅,飲酒嚟呀?」

「呃⋯⋯係啊⋯⋯少少囉⋯⋯」

Lily叉著腰罵他:「講少句都唔得,飲左酒好難發功㗎!」她不耐煩地忡忡從抽屜裡掏出一顆像蜜提沙的藥丸給他。

「食左佢!」





「哦⋯⋯」

那顆蜜提沙入口清甜,又帶點回甘⋯⋯幾秒後木仔覺得全身每個細胞都在爆炸一樣,仙氣在丹田不停地翻滾,他不禁問道:「嘩!呢粒嘢咩嚟㗎?」

「嫦娥食完飛左上月球果D仙丹呀!」

「巧⋯⋯勁喔⋯⋯」

「咁開始喇喎!」

木仔還未來得及回應,Lily就已經握著他的手腕迅速地使出了「天外飛仙」⋯⋯

「颯!」





一霎那間,他們已經到了一個幽暗的地方。木仔四處張望,原來這裡是一個巨大的岩洞,中央放著一座大概有三米高的銅鼎,頂端源源不斷滲出白煙。

「呢度邊度嚟㗎?」

「為了保密起見,唔話你知!」

「咁呢D咩嚟㗎?」木仔指著銅鼎問Lily。

「呢個就係煉丹爐喇,我將D冤魂放進去提煉之後,怨氣轉化為仙氣,再濃縮為仙丹。」Lily一邊說,一邊扭動爐上面突出的一個八卦圖案。

「咔喳。」

像扭蛋機一樣,Lily伸手從一個活門裡掏出了一顆仙丹遞給木仔,接著說:「袋住一粒旁身,但係記得每日只可以食一粒㗎咋,嫦娥當年食左幾粒就好似3D肉蒲團咁爆炸囉。」

「頭先果粒蜜提沙⋯⋯?即係嫦娥唔係奔月,而係爆死左?」木仔想到自己吞了冤魂落肚和那些騙人的神話,即時覺得異常噁心⋯⋯





「跟我過嚟,訓係張安樂椅度啦,合埋眼,全身放鬆。」

木仔躺下照著做。

「依家我要教你『出神奪舍』嘅上半部『元神出竅』。」

「吓?即係鬼上身?點解啊?」

「嗰班超強力部門一直想打我地D仙術主意,不可不妨。你上次見識過啦,我哋用血肉之軀同佢哋搏好蝕啫。」

「唔⋯⋯」

「你記住仙術嘅核心價值就係『上善若水』,試吓咁樣想像,仙氣就好似水咁,你用『天外飛仙』嗰陣就係將水變蒸汽然後又變返水吖嘛,要做到『元神出竅』就係將蒸汽凝聚成一舊雲,經天靈蓋飄出體外。」





木仔按著照做⋯⋯

「你望吓周圍。」

木仔張開雙眼,眼前的竟然是躺在安樂椅上睡著的自己!自己此刻好像輕飄飄懸浮在半空一樣⋯⋯

「感覺係唔係好正呀?」Lily的魂魄在旁跟他說。

木仔朝Lily望去,魂魄的身軀隱隱約約就是光禿禿的裸體飄逸在空氣裡!

「係⋯⋯正⋯⋯呀⋯⋯嘩⋯⋯!」

稍一分神,木仔的魂魄突然被一股來自天上的強大力量牽引著,就像被吸塵機迅速的抽走一樣!無數的事物像流星般擦身而過!