《新月派仙術奇譚》之《毒撚•女神•百鬼夜行》: 25. 下午茶

「你唔要鯊魚喇？」阿四看見木仔迅速回覆Betty，緊張地問。

「吓？佢都唔係我女朋友⋯⋯其實我都係想出去行吓啫。」

「我又去！」

「唔驚太陽咩？」

「原來個Lego身體可以擋住太陽㗎！我頭先喺窗邊測試過喇！無事呀！」





「不過你唔好隨便走出嚟喎⋯⋯嚇親人㗎⋯⋯」

「知喇！唔到緊急關頭我唔會走出嚟嘅！」

「嗯⋯⋯昨晚好彩你喺盤問室放火，唔係我實被人打到入廠囉⋯⋯多謝你呀，阿四⋯⋯」

#####

離開殮房時，嬌姐把木仔叫住：「喂，你就咁出去，盲嘅都認得你啦！又想被人揼啊？戴番頂鴨嘴帽，加埋副粗框眼鏡，掂晒！」她邊說邊幫他戴上。





「嘩，咁fit嘅？」

「駛乜講！我見死屍多過你見活人呀，你三圍數字我一眼就睇得出呀！」

「吓⋯⋯呢D係死人剩落㗎？」

「驚呀？」

「唔係⋯⋯」





「嗱，仲有呢支棍呀，Lily幫你攞返喇。」

「哦，唔該晒。」

#####

木仔坐巴士從堅尼地城去銅鑼灣的途中，阿四從褲袋裡面爬了出來，伏在窗邊，快樂地欣賞外面的風景。

「好耐無睇見太陽喇⋯⋯香港變左好多喔⋯⋯」

「係呀，變左好多⋯⋯」

「唔好咁負能量啦！」

「嗯⋯⋯陣間去完下午茶，我想返去蘭桂坊個火場睇吓⋯⋯」





「不如搵鯊魚一齊去查吖？」

「我唔想連累佢呀⋯⋯」

#####

在警察局的飯堂裡，潮州榮跟他的伙計們一邊用下午茶一邊討論案情。

肥文說：「阿頭，電訊公司個報告返左喇，條𡃁仔同個八婆嘅手機訊號真係三日三夜喺埋一齊喺堅尼地城殮房喎。」

「Bu-Ni-Ah-Mo！搞足三日，前世未屌過閪咩？！估唔到條八婆咁大食喎！」

肥文猥瑣地笑說：「呵呵，直頭係淫底啦！」





師爺輝說：「係咪淫底我就唔知，但係我就覺得唔係咁簡單，佢哋可能係特登製造不在場證據，同埋⋯⋯有可能殮房就係收埋把失槍同贓款嘅地方。」

「Bu-Ni-Ah-Mo！上頭叫我哋唔好查條𡃁仔，點攞warrant入殮房查佢呀？」

師爺輝接著說：「24小時跟住佢，實有破綻嘅。」

「唯有係咁做啦，Bu-Ni-Ah-Mo⋯⋯」

這時一隻手從後搭著潮州榮的肩膀，把他的話打斷了，他轉頭一看⋯⋯

「哦，九叔⋯⋯」突然出現，神情肅穆的九叔讓眾人噤若寒蟬。

「阿榮，我相信呢幾單案係唔關木仔事嘅，唔好難為佢，好唔好？幫手睇住D南亞幫㖭啦。」

「係嘅九叔⋯⋯」潮州榮面有難色，為難地答應。





九叔點點頭，就轉身走了。

師爺輝見九叔離開後就說：「我哋跟多個禮拜，如果都仲係無料到嘅話，就一於放料俾D南亞佬，等佢地殺入去殮房，我哋就跟住入去人贓並獲。」

#####

下午4點鐘左右，木仔去到銅鑼灣PK Cafe。Betty比他早到，坐在落地玻璃窗邊的卡位。卡位的椅背不是很高，坐在Betty後面鄰座坐著一個像姚明那樣高的男人，

「嗨。」Betty比之前稍微主動一點。

「您好，來了很久了嗎？」

「沒多久，坐吧。」





點過咖啡和蛋糕後，Betty從手提包裡掏出一根紅色的手繩，她說：「這時我自己織的，希望可以給你帶來好運吧。」

「不用客氣⋯⋯謝謝嘍⋯⋯」木仔頓時面紅耳熱，欲拒還迎。

Betty幫他把手繩綁好，嬌聲說：「洗澡也不要解開喔！」

本來冷若冰霜的Betty，居然變得熱情如火，木仔實在無法招架。

「喲，這個Lego公仔是你的嗎？好可愛唷！」

原來阿四按耐不住，已經從褲袋裡偷偷走出來看看Betty是什麼貨色。阿四她還大膽的坐在桌子上，正面瞪著Betty。

「是喔，呵呵⋯⋯」木仔心想：「死鬼阿四！咪搞搞震呀！」

「好可愛喔。」Betty伸手撫摸阿四的頭髮⋯⋯

妒火中燒的阿四快要核爆了！

木仔見勢色不對，馬上轉移視線：「吖，你有沒有覺得我的普通話講得比之前好呢？」

「哦，是喔，為什麼呢？」

「我昨晚撞到後腦，半夢半醒之間就突然能夠記起小時候的事情⋯⋯其實我媽媽也是從大陸過來的，那時後她是用普通話跟我說話的。」

「是嗎⋯⋯她長什麼模樣？」

「我媽好漂亮的！」木仔自豪地說。

「真的嗎？其實我也沒見過我父母⋯⋯」Betty的冰冷的眼神忽然流露出一絲悸動。

「原來你也是孤兒嗎？」

「嗯⋯⋯那麼有緣，我們拍張照好嗎？」

Betty於是拿出手機跟木仔自拍，然後把照片發給他。

就在這個溫馨的時刻，cafe外的馬路上有一台跑車駛至，正好地面突然隆起來，使那台車凌空飛向木仔和Betty！他們倆隔著玻璃眼睜睜看著那台車快要迎面砸過來！