[港版無限流][長篇] 恐怖輪迴: 傭兵基地

上午的長洲人流很少，只有數個出租賓館的攤檔放在碼頭出口處。

凌天拿著手機踏出碼頭，沿著海邊行走，快步走向一艘紅色快艇。

「天哥，等你好耐喇，都話咗你肯定會頂唔順打工仔呢啲咁枯燥㗎生活啦。」一名坐在紅色快艇上，皮膚黝黑，帶著墨鏡，全身肌肉的男子向凌天揮手大叫道。

看到惜日的戰友，凌天不禁流露出重逢的喜悦，微笑道「我條命犯賤，注定過唔到平淡嘅生活。大鬼，見到你真係好。」

「超，粒聲唔講就消失咗成接近6年，今次約曬成班兄弟，有咩好路數呀？」大鬼一臉鄙視地説道。





「哈哈，路數就冇，得大穫嘢。」凌天尷尬地笑著說。

「唉，早知你揾親我哋實冇好嘢，嚟緊呢單有幾大穫呀？」大鬼摸著額頭嘆氣說道。

「總之大到你唔信，上船先，去到基地再講。」凌天苦笑地說著。

「好啦，見你咁嘅死樣，睇嚟真係好撚大穫。」大鬼認真地說道。

「開船啦，我唔可以逗留太耐時間。」凌天沒好氣地拍著大鬼的背部説。





大鬼聽到此話後，點了點頭，駕著快艇快速地駛離長洲。

看著快艇因高速行駛而泛起的水花，凌天嘆了口氣，暗道「兄弟，本來唔應該拖你哋入嚟，但大佬我自私，知道我一出聲，你哋實會照做。天哥我，對你哋唔住。」

快艇駛離長洲大約2小時，在茫茫大海中終於看到前方出現一個小島，隨着快艇越來越接近小島，島上的景物已經隱約可見。

只見島上外圍有一個簡陋的碼頭，而碼頭上則站滿了人群，高聲大叫道「天哥！」「天哥！」「天哥！」「天哥！」「天哥！」

「返到屋企感覺點呀？想當初，呢到就係你帶頭一手一腳咁建立出嚟，大家都好掛住你。」大鬼笑著說道「歡迎返嚟呀，天哥。」





凌天無言以對，看著岸上一張張熟悉的臉孔，見到他們興奮的神情，心中除了喜悦之外，更多的是一種愧疚。

快艇向碼頭停靠著，大鬼推著凌天向岸上走去。

島上的建築仍然與他記憶中的樣子吻合，見到熟悉的人與景，以往的一幕幕不由地湧進凌天的腦海裡。

與一眾兄弟在槍林彈雨的戰場上殺敵………

每當經歷一場任務後，眾兄弟也會拿著剛收到的傭金到酒吧揮霍………

一直嗜酒好賭的凌天突然改變本性，因為遇到了她………

因為她，凌天開始想要有個穩定的家庭，於是他提議在一個小島建立大本營………

每次任務完結後，返回小島時，都會見到她在碼頭上等著………





直到………

「天哥，你冇嘢嗎？」大鬼拍著凌天的肩膀，説著「件事又唔係你嘅錯，過咗咁耐，係時候放低喇。」

「嗯，我知，叫大家去會議室，我有嘢要同大家講。」凌天點了點頭説著，快步地走向島上一棟約10層高的大廈。

進到大廈大堂，迎面見到的是一名中年保安員。

「天哥。你終於返嚟喇。」那保安員笑著說道。

「呵呵，昆叔，啲細路仲讀緊書？」凌天笑著回應。

「出曬去打工做嘢咯，都好嘅，起碼唔洗好似我哋以前咁打生打死。」昆叔搖搖頭笑著説。





「都係嘅。」凌天繼續笑道。

「唉，以前環境唔好，迫住撈偏打生打死，但仍然居無定所，憂柴憂米。好在天哥你帶住我哋成批人去做傭兵，一樣打生打死，但收入高成幾十倍。」昆叔嘆了口氣説「之後你又帶頭喺島到起基地，所有人都跟你安定咗落嚟，當正呢到係自己嘅根，唔經唔覺，大家都已經成家立室。」

凌天沉默地微笑。

大廈升降機門開啓。

「唔講喇，遲吓再揾你同埋昆嫂食飯。」凌天笑著説，然後走進升降機內。

「呵呵，好。」昆叔大笑回道

當升降機門關閉時，凌天從儲物空間中拿出一個黑色小盒，說道「佢哋個個都已經成家立室，我咁做，究竟啱唔啱？」