[港版無限流][長篇] 恐怖輪迴: 殭屍戰爭～進入任務

隔天早上

林默召集眾人在他的房間開會商討任務。

林默房間是普通家庭的建築模樣，空間不大，但麻雀雖小，卻勝在五臟俱全。

在房間客廳中

「我想問下大家意見，各位認為應該要揀邊個陣營好？」林默坐在梳化上問道。





「我嘅強化應該比較適合喺光明聯盟嗰邊。」喬欣首先表達了意見。

「但照字面咁睇，不朽聯邦應該實力比較強，單以一個德意志已經隱隱擁有横掃歐洲嘅實力，況且現實版嘅德國亦都將英、法、俄三國打到癱癱腰。」凌天率先反駁道。

「但呢個係異界版嘅世界大戰，冥主為咗遊戲平衡，羅馬教廷嘅實力肯定會被大幅提高。」喬欣搖著頭說。

「其實我哋可唔可以兩線作戰，分開兩隊，一邊爭取光明聯盟支持，一邊投靠不朽聯邦？」李文笑了笑地說。

「以前我哋都有類似經驗，但我哋條隊宜家人手不足，再分隊實力就會太過分散，好容易俾6號隊遂個擊破。」林默擔憂地道。





「我贊成分隊，一來可以爭取兩邊劇情人物支持，二來大家分開，雖然實力係分散咗，但我哋亦都可以以此嚟用迂迴戰術嚟避開6號隊，減少同佢哋交戰嘅可能。」喬欣表態同意。

「我同意。」王儀點頭道。

「附議。」凌天也沒意見。

「附議。」李文微笑地說。

「好吧，少數服從多數。」林默深感無奈「既然係咁，你哋各自想揀邊一個勢力？」





「我同喬欣都揀光明吧，我同佢合作開。」王儀暗地向林默眼神示意。

「呵呵呵，咁我同天哥去不朽嗰邊吧。」李文仍然以他那副虛假的笑容回應。

「好吧，我都揀去光明，任務就選擇做光明陣營㗎任務，凌天同李文你哋兩個就喺敵方暗中策應。」林默也只好表態。

「附議……」其餘4人一致回應。

*******

當走出林默房間時，王儀與喬欣都各自回到自己房間內。

廣場上只剩下凌天與李文兩人。

「天哥，難得下一場任務我哋兩個又再度合作，希望請你多多關照呀。」李文一臉奉承地笑著。





「唉，既然你叫得我大哥，咁我就唔客氣叫你聲細佬。賢弟，其實大家都係聰明人，有咩嘢我哋可以坦承啲咁講出嚟。」凌天一臉誠懇地回應，心中卻暗罵「好一個唔知醜嘅笑面虎。」

「天哥乜說話呀，咁我就照直講，林隊長雖然實力唔錯，但未夠魄力，反而我睇好你。」李文也嚴肅起來，卻心道「比我更加面皮厚，佩服佩服。」

「哦？！言下之意，我就夠魄力？」凌天皮笑肉不笑地問。

「哈哈哈，有啲嘢唔洗講到咁明白，大家心裡有數，我李文只交好兩種人，一種係強者，另一種就係有恩於我嘅人，而天哥你係前一種。」李文回復之前的笑臉。

「呵呵，咁多謝賢弟嘅肯定，喺咁危機四伏㗎環境下可以得到李賢弟幫助，簡直就係喺沙漠中遇到綠洲呀。」凌天一臉真誠地說。

「天哥唔好咁講，你直程係我李文嘅苦海明燈添，我哋黑道嘅人最講義氣，無論上刀山，落油鍋，我都願意陪你去闖。」李文也一臉感動回應。

說罷，二人緊握對方雙手





「得賢弟於此，此生無憾！」

「天哥……」

「李弟……」

「天哥……」

兩大賤人就在廣場上一邊互相奉承，一邊暗罵對方不要臉。

*******

4日後

眾隊員聚集在廣場上。





林默交給凌天二人各自一個圓形耳塞道「呢個係我哋隊嘅通訊設備，㩒住佢講嘢，只要大家仲身處喺同一個空間，就可以無視距離咁通話。」

「哦？幾好咁喎，呢舊嘢幾錢個呀？」李文問著。

「哈哈，貴嘢嚟㗎，100冥幣一個。」林默笑著回應。

說罷，白光照射，眾人的身影慢慢消失。