[港版無限流][長篇] 恐怖輪迴: 殭屍戰爭～驚變

一隻手慢慢從血水中伸出，抓著池邊，攀爬著。

一個老頭的身影出現在眾人眼前。

他環視眾人，各人均以狂熱的眼神回應。

因為他是他們的支柱，他們的信仰，是保證狹小的羅馬尼亞可以傲立在歐洲大陸數百年的資本。

「嗯，我感應到你有我嘅血脈，你係我第幾代㗎後人？」德古拉看向卡羅爾問道。





「回禀大公，我係你第十二代㗎後人。」卡羅爾恭敬地說著。

「呵呵，時間真係過得快，訓一覺就過咗幾百年。」德古拉笑了起來，但言談也不禁流露出落寞的神色「好喇，羅馬尼亞又遇到咩難題要我呢個老嘢去解決？」

當卡羅爾把戰爭的始末告知德古拉時，氣氛陷入一陣沉默。

「估唔到普魯士真係統一咗成個日耳曼，我仲記得4百年前，霍亨索倫家族發起呢個宏願時，周邊嘅國家都笑佢哋不自量力，畢竟以前奧地利都幾強吓。」德古拉感慨地道。

「冇錯，雖然教廷不斷抹黑，但喺德意志嘅人民心目中，威簾一世㗎民望的確好高，喺佢任內不顧舊貴族反對，力挺備受爭議㗎卑斯密為宰相，致力對教育同軍事實行全面改革，又海納百川，不顧光明教價值觀影響，接受東方古法，並學以致用於軍隊中。」卡羅爾也由衷地對現任德皇感到敬佩。





「不過可惜佢哋地理位置唔好，四面環敵，我估佢哋宰相不斷收買周邊其他國家都係因為咁。」德古拉點頭道「唔講佢哋喇，羅馬尼亞出兵冇問題，但要小心奧圖曼。話我老人家偏見都好，我信唔過佢哋。」

「大公，奧圖曼自然要小心，但我最怕嘅係教廷呀。」卡羅爾急忙道。

「教廷？！到時我會親自到梵諦岡一趟。」德古拉冷笑道。

*******

「我始終唔鐘意做卒仔。」李文低聲嘀咕道。





「唔做卒仔我哋點混入嚟？」凌天不耐煩地説。

「但我想做長官，然後日日陪大波秘書玩遊戲。」李文說著，不知不覺陷入幻想中。

凌天對其感到無語，說道「兩個選擇，第一，諗辦法立戰功，慢慢升職，從而接近匈皇，亦都一償你做長官同有大波秘書㗎心願。第二，直接殺入皇宮，整死匈牙利皇帝，然後拍拍籮柚走人。」

「咁啫係冇得揀啦，得30日時間，邊有可能夠我哋立戰功同升職。咁你有冇把握殺入皇宮？」李文一臉幽怨地問道。

「冇。」凌天不置可否地道。

「咁你又提？」李文忍不住反白眼道。

「嚟緊兩日後，匈皇會嚟巡視軍營，到時我哋再玩埸暗殺，之後走人，好簡單。」凌天笑著道。

「得唔得㗎，佢身邊啲御林軍都好惡哽吓喎。」李文懷疑地問了句。





「機會與風險並存，冇付出邊會有收穫。」凌天語重心長地勸著。

「洗唔洗等埋隊長佢哋？」李文問道。

「唔洗，趕唔切喇，如果6號隊唔係傻，佢哋一完成任務就會即刻追殺我哋，實力差距太大，風險低回報高嘅嘢點解唔做？」凌天搖頭說。

*******

「唔知點解我有啲不安嘅感覺？」喬欣擔憂道。

「有咩問題？」林默停下腳步，問道。

「唔知，但有種好強烈嘅感覺，我哋一離開梵諦岡就會有危險。」喬欣無奈地回應。





「可能心理作用啦，畢竟假假地一個國王，身邊實有啲高手保護嘅。」王儀安慰道。

此時三人走出住所，見到路旁有一輛馬車及一位馬夫在車上歇息。

林默見狀，便給馬夫兩個金幣，說道「唔該送我哋去第里斯雅特吧，越快越好。」

說罷，三人便上了馬車，而街上也下起雨來。

在馬車車廂中

「個馬夫有啲眼熟，好似邊到見過咁。」林默自語地說著。

「會唔會之前啱啱嚟梵諦岡嗰陣見過面？」王儀笑著道

「或者係啦？」林默也笑著回應。





「真係有啲唔妥，不安㗎感覺越嚟越強，我哋要即刻返去。」喬欣凝重地說。

「好啦，我哋返去先再睇咩事。」聽到喬欣如此反覆強調，林默也認真起來。

「司機，唔該載我哋返去呀。」林默打開車窗，對馬夫說道。

「但啱啱已經離開咗梵諦岡喇喎。」馬夫驚訝回答著。

「你唔洗理，錢我哋會照俾，總之我哋有事要急住返去。」林默語氣中帶有少許不滿道。

「哈哈，如果俾你哋返去，我仲點殺你哋呀。」馬夫突然轉變語氣說道，然後跳下馬車。

馬車車廂頓時爆炸起來。





「哈，計劃果然一切順利進行。」洪定在道路旁的樹林中走出來，站在馬夫身旁。

「嗯，但佢哋仲未死。」馬夫平淡地說道。

果然，馬車上的火焰中漸漸浮現出林默3人的身影。

在馬車爆炸時，林默立刻以金剛勁護身，以自身軀體作掩護，抱著二女跳出車外，三人亦因此而僥倖逃過一劫。

此時林默也終於明白為何會覺得馬夫眼熟。

因為他們曾經見過，在另一任務世界相遇過。

他就是6號隊隊長，秦輝。