我地一轉身,就見到一個黑袍蒙面人,企左響我地剛才鎖住嘅果對門前面!而佢啱啱所講嘅野,令我地知道,佢就係呢度嘅負責人!

對於佢嘅問題,我地無一個人開口去答佢,而佢亦都無再開口去講任何野,結果,我地雙方就咁樣企響度,面對面咁對峙

通常暴風雨前夕,都會格外平靜,大家都清楚咁知道,危機隨時都會爆發,早就已經拎起左手上面嘅武器,完全咁進入左戒備狀態

黑袍男見我地拎起武器,對佢高度戒備,就忍唔住響度哈哈大笑咁話

“你地咁驚做咩呢,我又無對你地做啲乜!放鬆啲!”





放鬆啲!?。。。我望一望四圍嘅環境,心諗“放鬆啲,一陣死左都唔知!”

軒轅皓完全無視左佢講嘅野,只係冷冷咁對住佢講左句

“你係咩人,你到底有啲咩目的?”

黑袍男聽到軒轅皓咁問,就停止左大笑,然後同我地講

“雖然你地擅自入嚟,又無啲禮貌,不過來者都係客,既然你地咁想知道,咁我就話比你地知。。。”





講到呢度,佢停左一停,對我地好似紳士咁彎腰鞠左個躬,然後開口話

“在下《奉靈教》四使之一,綽號《魍》,至於目的。。。你地加入之後,我可以慢慢咁講你地知。。。”

”放屁!要我地加入你果個乜鬼野邪教!無可能!”凌嘯峰聽到之後馬上反駁

黑袍人並無因為凌嘯峰嘅行為而嬲怒,轉為望住軒轅皓,同佢講“咁你呢?”

軒轅皓淡淡咁回佢一句 “要打就打,咪講廢話!”





黑袍人呵呵咁笑左兩聲,最後望住我,開口話“仲差你,你要生,定要死?”

面對住黑袍人赤裸裸嘅威脅,我正想回佢一句“放心,你死我都未死!”,點知軒轅皓同凌嘯峰就已經擋住響我身前,用行動嚟回應左佢

黑袍人見到佢地咁樣,就再次哈哈大笑,然後話

“真係可惜,既然係咁嘅話。。。”

佢擰轉身,捉住我地扣住對門嘅果塊木板,用力一拉,然後話

“屍鬼,同我捉住佢地!做得好嘅我就比你地死!”

隨著佢伸手拉開左塊木板,入面既活死屍瞬間傾巢而出!

死,對於果班活死屍嚟講,係一種最好嘅解脫!所以黑袍人所講嘅說話,間接令佢地更加瘋狂咁向住我地衝過嚟!





一見到咁嘅情況,軒轅皓同凌嘯峰同時轉身,對住我開口叫左聲”退後”,之後就準備迎戰!

當我聽到佢地咁講,我周圍望左望,其實呢個環境咁寬敞,就算我退後,佢地都會跑嚟我度,但係為左令佢地少啲負擔,我都好聽話咁退後,同佢地保持左一段短距離

而響我退後完嘅一刻,活死屍已經好快咁衝到過嚟!

大戰,一觸即發!

軒轅皓率先衝上前去迎戰死屍群!而凌嘯峰就護響佢身後掃開一啲圍攻住佢地嘅死屍!佢地背對背咁攻擊同防禦,配合得天依無縫!

但係眼見越嚟越多死屍圍過嚟,知道咁落去都唔係辦法,所以軒轅皓就對凌嘯峰講左一句“呀峰!速戰速決!”,之後就大喝一聲

“神兵火急如律令,飛劍!”





飛劍一出,誰與爭鋒!圍繞住佢地身邊嘅死屍群瞬間受到不同程度嘅傷害!而呢啲傷害,亦都令死屍嘅攻擊速度減慢左!

凌嘯峰見到呢個情況,就揮動長槍對住死屍嘅腳施展《橫掃千軍》,雖然死屍被掃跌之後,好快就爬番起身,但係因為對腳受衝擊,所以企番起身都已經無辦法再快速行動!

嘗試左幾次攻擊之後,軒轅皓佢地好似已經捉到個門路,知道應該要點樣對付呢班死屍!所以,佢地由本來好緊張咁應對,變成打得好輕鬆,仲一邊打,一邊周圍閃,搞到啲死屍大部分都趴晒響個地下度,不斷咁呻吟掙扎!

而我呢,就安安份份咁企左響度,不過我並唔係無野做響度呆企,而係監視住果個黑袍人嘅一舉一動!

因為呢啲死屍根本就無可能對付得到我地!佢地都係人,我地太清楚人嘅死穴!只要廢左佢地對手同埋對腳,就算佢地係不死之身,都根本就無辦法再去攻擊同埋移動!

我諗黑袍人自己都好清楚,所以佢放死屍嘅目的,好明顯只有一個,就係試探我地個底細!

當然,總有啲唔帶眼嘅男死屍會向住我衝埋嚟啦!不過得果幾隻,又唔係一大堆,再加上呢度嘅環境比較光猛,令到我已經唔再驚佢地!

所以,當我見到佢地全身赤裸,然後仲吼吼聲咁一邊叫,一邊向住我撲埋嚟嘅時候,我個腦入面唔知點解就浮現出“色狼!”呢兩個字!





於是。。。我就揮舞我條九節鞭,然後就。。。一下掃去。。。某某個位置。。。果度。。。

而且仲貫徹左秦家鞭法嘅精粹!《快!狠!准!》

結果,當我掃完之後,佢地就趴晒響個地下度,無再爬番起身嚟攻擊我。。。

我心諗 ”咦!奇怪。。。明明唔會死架喎!點解會趴響度郁都唔郁嘅?”

於是出於好奇嘅我,就起腳踢一踢其中一個,佢即刻彈一彈!不過唔係攻擊我,而係遮住某個地方,然後單手咁爬開。。。咁我就試下去踢另外一個啦,點知又係咁嘅反應!最後我連踢都未踢,佢地就已經散開晒周地爬。。。

見到佢地咁樣,我瞬間汗顏。。。突然良心發現咁諗左諗,自己係咪過份左呢!?

好吧!死屍都有死屍嘅尊嚴!咁我行開啲唔踢你地得啦掛!?





結果,當我行埋左一邊之後,就再無一隻死屍過嚟我呢邊。。。亦因為咁樣,我先至可以全神貫注咁望實個黑袍人,再順便用靈火幫條九節鞭消毒一下

直到啲死屍已經趴得七七八八,我先至慢慢咁行番埋去軒轅皓佢地果邊

而呢個時候,黑衣人終於都行動!而且仲係一個好詭異嘅行動!

佢個頭,竟然成個飛左出嚟!然後對住軒轅皓佢地飛過去!

哇!呢個係咩情況!?特技!?

雖然佢呢一招令到我有啲愕然,但係眼見佢飛緊過去,我本能反應咁大叫左一聲“小心!”

而軒轅皓同凌嘯峰聽到我大叫之後,就反應迅速咁對住佢個頭,一下咁刺過去!

點知,就響差唔多桔中佢嘅時候,佢忽然飛速咁退後彈開!然後改變方向,直直咁向住我飛埋嚟!

呢個突如其來嘅變化,令到我無辦法瞬間作出攻擊,而且佢飛得實在太快!我根本連避都避唔切!眼見佢已經飛到我面前!

就響呢個千鈞一髮之際,我一直帶住嘅果條頸鏈,突然發出左一道紅色嘅強光,向住佢個頭直射出去!而同一時間,我條腰亦都比啲唔知咩野纏住左!

我低頭一睇,係條鎖鏈!!!?

但係我無機會再諗呢條野究竟響邊度嚟,因為我已經好似玩緊機動遊戲咁,比條鎖鏈扯到成個人飛起左,然後“噗!”一聲,撞左落去一個唔軟又唔硬嘅野上面!

而我嘅身前,就同時出現左兩個背對住我嘅人!

一個著住黑色西裝嘅男人開口話“頂頂大名嘅降頭師,竟然響度蝦細路!”

另一個著住白色西裝嘅男人接住話“咪係!知唔知個羞字點寫架!”

而呢個時候,黑袍人個頭亦都已經飛番去個身軀上面,仲好震驚咁講左句“黑白無常。。。 修羅閻君。。。!?”

下。。。!? 黑白無常!?修羅閻君!?
已有 0 人追稿