秦天晴 — 有鬼 新章《畫》正式展開: 露營 — 第八章
長槍“噗”一聲咁插左入去，呀峻個膊頭馬上血流如注。。。
與此同時，長槍沾染左鮮血之後，瞬間就發出左耀眼光芒！
而呢一個光芒，就令到我地從震驚嘅一幕之中甦醒過嚟！
我地即刻向住呀峻嘅方向快速咁跑過去！而響我地跑緊過去嘅途中，呀佩就將發出左淡淡金光嘅長槍，從呀峻身體度抽出嚟，然後好驚慌咁話
“呀。。。呀峻。。。對。。唔。。。唔住。。。我。。。我。。。唔想死。。。！”
因為長槍嘅突然抽出，令到呀峻失去重心咁向前跌，好在有呀東響佢身邊及時扶住佢，先到可以企番穩
響呢個時候，我地已經跑到去佢地嘅身邊，樂仔同子歉即刻走去關心呀峻嘅傷勢，思語同可兒就對住呀佩破口大罵
“湯嘉佩！痴左線呀你！”
“發咩神經丫你！”
而我就眼甘甘咁望住呀佩。。。因為有一把長長嘅頭髮將佢條頸纏住。。。而長髮所連住嘅，就係佢身後嘅呀茹！
呀茹同呀漢就企左響呀佩嘅身後，同我地面對面咁對峙。。。
呀峻輕輕咁推開左周圍嘅人，對住個傷口施左個咒之後，就行前兩步望住呀漢同呀茹冷冷咁話
“武器你地已經拎到手，呀佩亦都依照左你地嘅意思去做，咁你地而家可以放人啦？”
呀漢聽到呀峻咁講，就對住呀茹輕輕咁話
“呀茹。。。我地要嘅野都到左手囉，不如放左佩佩佢啦。。。”
點知呀茹聽到之後，唔單止唔放人，仲用頭髮緊緊咁實呀佩條頸，然後質問佢
“做咩丫！？心痛丫！？你地係咪有路！你變左心啦！係咪！？點解你要呃我！點解！？”
呀漢聽到佢咁講，就有啲唔高興咁話
“如果我呃你，就唔會搞咁多野啦！如果我變心，就唔會聽大人所講，將咁多人捲入嚟！就係為左將你復活啦！”
大人。。。復活。。。！？
呢一刻，我腦海入面突然之間諗起左一個人。。。
“唔好意思。。。打斷你地一下！如果你地所講嘅大人叫魍嘅話。。。我諗佢應該無辦法幫到你地啦！”我弱弱咁舉手發話
當我講完之後，所有人都好愕然咁望住我，而呀茹就即刻好大聲咁反駁
“無可能！魍大人明明應承左會幫我架！你亂講！”
唉。。。果然真係佢！黑袍人— 魍！
我望住佢，淡淡咁話“哦。。。如果係幾日之前嘅話，佢應該都仲可以幫到你嘅，不過今日就唔一定囉！”
講到呢度，我停左一停，然後對住佢笑一笑，繼續話
“你認為得番個死人頭嘅人，仲可唔可以幫到你呢？”
呀茹聽到我講之後，就好似癲左咁一直話
“無可能！你呃我！無可能！無可能會咁！大人話過會幫我架！”
呀漢見呀茹失晒控咁，就即刻伸手攬住佢，然後望住我冷冷咁話
“你到底係咩人？”
正當我想開口答佢嘅時候，呀茹就已經甩開左呀佩，然後露出長長嘅指甲向住我飛撲埋嚟，同時話
“你亂講！我要殺左你！”
我馬上閃身避開佢嘅攻擊！但係當我企定想反擊嘅時候，就發現有啲野拉住左我隻腳！
我耷低頭一睇，原來係一束頭髮！
我即刻伸出右手，想凝聚小火球將佢燒毀，點知有人出手比我更加快！
呀峻響呀佩比呀茹甩出去嘅時候，就已經執番自己枝長槍，所以當佢見到我比頭髮纏住嘅時候，就幫我一下咁將束頭髮斬斷！
而恢復行動嘅我，就馬上抽出腰間嘅九節鞭！向住佢反攻過去！
兩個打一個，就算呀茹啲頭髮再多，啲指甲再利，都根本就無辦法可以傷到我地！
我同呀峻互望左一眼，就打算嚟個左右夾攻！
但係當我地打過去嘅時候，呀茹竟然只係避開呀峻嘅攻擊，對我嘅攻擊，選擇左不閃不躲！
顯然殺敵一萬，自傷三千呢個兩敗俱傷嘅做法，我地根本就無法去理解！所以當我用鞭打中佢嘅同時，佢亦都用頭髮對住呀峻個傷口狠狠咁抽落去！
呀峻即刻慘叫一聲，然後跌左響地上面！而佢手上枝長槍就脫手而飛！
大獲！雖然我唔知佢地做咩要拎呀峻嘅武器，但係我可以肯定，果個死人頭做嘅野，一定唔方係好野！
所以我第一個反應就係，一定要執番枝長槍！唔可以比佢地拎到手！
我拎出符紙對住呀茹飛出去，開口唸
“乾坤無極，風雷受命！雷降！”
同時將九節鞭向住枝長槍嘅位置掃過去！
就響條鞭剛好纏住左槍身，我正想用力一拉嘅時候，枝長槍就比人一下咁抽走左！
我抬起頭一望，係呀漢！
佢拎到之後，就即刻向住山坡嘅方向猛跑！
而呀峻就即刻追上去，呀佩就跟住呀峻一齊跑！
呀茹見呀漢拎住左枝長槍，然後跑左上山坡之後，就響度哈哈大笑！
佢一邊避開我嘅攻擊，一邊開口話“哈哈哈！打碎佢！好快我就好以翻生啦！哈哈哈。。。”
佢講完之後，就掉低左我，向住山坡嘅方向飛過去！
打碎。。。？打碎啲咩。。。？
我望住佢地個背影響度諗，果邊有啲咩係打得碎呢。。。
打得碎。。。打得碎。。。弊！唔通係講果塊鎮魂碑！？
諗到呢度，我都馬上追住佢地跑過去！
可兒望住呀峻佢地跑晒上山坡嘅背影，有啲猶疑咁話
“咁我地點算。。。？追上去？”
大家聽到可兒嘅問題，都沉默左。。。因為大家都知道，就算佢地追到上去都好，都根本就乜都幫唔到手，仲可能會變成負累！
最後，都係由思語開口話
“ 我地都係唔好上去好啲。。。我地同佢地唔同！我地根本就無能力去保護自己，一陣令到佢地分左心，出左意外就。。。”
思語都未講完，為食狗就對住佢地“汪汪”左幾聲！
為食狗想表示嘅係 “你地呢班暴力狂終於都知道危險啦咩！哼哼！算你地有番啲自知之名！”
其實為食狗把口係咁講，但係佢個心，係真心咁為佢地擔心，一來係因為秦天晴拜託過佢要保護好佢地，二來佢係覺得，佢地除左有啲痴線，有啲暴力之外，全部都係好人，所以唔想佢地有事！
當我氣羅氣喘咁跑到上山坡嘅時候，呀漢佢地就已經向住鎮魂碑嘅方向跑緊過去！
你個死人頭！果然個目標就係鎮魂碑！
我即刻出盡全力咁向下跑！但係響我跑緊落去嘅時候，我眼前嘅畫面就已經係呀漢同呀峻響地上面扭打埋一齊！
到我跑到一半嘅時候，呀茹就已經挾持住呀佩！
而當我跑到過嚟嘅時候，呀佩就已經拎起左枝長槍，向住鎮魂碑一下咁劈落去！