“痛。。。”手腕上面傳嚟一陣陣嘅痛楚,令到我嘅意識慢慢咁恢復過來。。。

我慢慢咁擘大對眼,望住白雪雪嘅天花板,然後。。。開始回憶番自己暈低之前所發生過嘅野。。。

究竟。。。果陣突如其來嘅粉色光茫,係響邊度傳過嚟架呢?

我地激活左個陣法之後,班骷髏鬼係咪真係全部都封印晒響個山頭入面呢?

響我失去意識之前,一直咁同我講野,叫我唔好瞓,然後恐嚇我果個,到底係邊個呢?





仲有。。。修羅閻君佢地。。。最後有無成功咁捉到鬼王嘅殘魂呢。。。?

呢一個又一個無答案嘅問題,不斷咁響我嘅腦海入面徘徊。。。

於是,我深深咁吸左一口氣。。。試圖令自己可以放鬆啲!點知。。。呢一口氣,令我發現左呢度並無醫院獨有嘅果陣消毒藥水氣味!

咦!?唔通。。。呢度唔係醫院。。。?如果呢度唔係醫院嘅話。。。我究竟係去左響邊度呢。。。?

唔得!我要起身確認下先至得!





就響我啱啱產生呢個想法嘅時候,對房門就突然“砰”一聲咁打開!嚇到我成個人都呆住左,眼定定咁望住企響門口度嘅人

而完全唔知到自己嘅暴力行為,嚇親秦天晴嘅凌嘯峰同凌嘯峻兩兄弟,對於一打開門就見到秦天晴已經醒番,仲用好愕然嘅表情望住佢地嘅時候,佢地竟然震驚到好似比人點左穴咁,企左響門口度郁都唔郁!

直至到秦天晴開口叫左聲“呀峰,呀峻”之後,佢地先至回過神嚟,直直咁衝去床邊,同時好緊張咁話

“天晴!你醒番啦!”

“天晴!你有無事丫!?”





見到佢地呢個咁緊張嘅樣,我就對住佢笑一笑,然後同佢地講

“放心啦!我無事喎!”

點知,當我講完之後,就有兩下咳嗽聲響佢地嘅身後傳過嚟!嚇到佢地兩個即刻一左一右咁快速彈開!

而隨住佢地嘅彈開,我先至發現,響佢地嘅身後面,原來係有個人企左響度,而果個人。。。就係軒轅皓。。。

軒轅皓冷冰冰咁走過嚟,彎低身幫我較高啲張床,令到我個人可以坐直響床上面之後,就坐響我嘅床邊,眼定定咁望住我。。。

響佢望住我嘅眼神入面,我可以讀到,除左有責備之外,仲有另外一樣野。。。就係擔憂。。。

望住佢嘅雙眼,我忽然間諗番起佢之前對我嘅叮囑。。。叫我唔好周圍走,話我好容易出事!結果。。。我唔止走左出去,仲發生左好大件事

我被佢望到越嚟越心虛。。。所以就下意識咁伸手,想去摸摸自己個鼻頭,點知。。。我一郁,就發現左一樣好恐怖嘅野。。。而果樣野就係。。。





我對手!我果兩隻手!竟然包到好似豬碲咁!

我耷低頭,瞪大雙眼,好難以置信咁望住自己對手,停頓左足足十秒!然後。。。

我抬起頭,望住凌嘯峻好平靜咁問

“我傷得好嚴重。。。?”

凌嘯峻望住我搖搖頭,然後我就移開視線,望住凌嘯峰,開口問

“我隻手斷左。。。?”

凌嘯峰聽到之後,就不停咁響度笑,然後邊笑邊話





“你只不過係割脈之嘛,又唔係斬手!點會斷左丫!”

聽到佢咁講,我輕輕咁“哦。。。”左聲,然後淡淡咁講左句

“既然我隻手無斷,又唔係傷得好嚴重。。。咁點解我兩隻手都會打晒石膏丫。。。!?”

講完之後,我嘅目光就打橫咁掃過晒佢地三個,發現佢地都用一種好奇異嘅表情,再加埋好奇怪嘅目光,靜靜咁望住我

嗯!?唔出聲唔講野,咁即係咩意思?

得唔到答覆,我就諗住再問一次啦,點知響呢個時候,佢地身後對房門就再次被人打開,然後就有個唔識嘅男人走左入嚟

凌嘯峻見到佢之後,就即刻對佢叫左聲呀頭,而凌嘯峰同軒轅皓亦都同果個人打左聲招呼

呀頭?佢就係特殊部隊嘅隊長!?





我望住行緊過嚟我床邊嘅特殊部隊隊長,唔知點解,心入面有一種莫名嘅親切感,雖然我地明明素未謀面,但係偏偏就有一種好熟悉嘅感覺。。。

可惜,呢個好感唔維持得好耐,就已經粉碎左!因為。。。佢一行到埋嚟,就即刻開口同我講

“秦天晴!由於你嘅傷勢嚴重,所以由即日起開始停職!直到另行通知為止!”

傷勢嚴重,停職!? 咪住先!我明明唔係傷得好嚴重咋喎!仲有。。。呢把聲。。。咪係我暈之前同我講野嘅果把聲!原來恐嚇我嘅就係你。。。。!

聽到佢咁講,我即刻對住佢好認真咁澄清番

“呢位隊長!我只係割傷左隻手,並無啲咩所謂嘅傷勢嚴重!所以我覺得自己並唔需要去停職!”

但係。。。佢聽完之後,並無回應我,而係對我挑挑眉,伸出一隻手指,指一指我果兩隻手。。。





見到佢呢個行為,我當堂成個人啞左。。。完全唔知道點接落去好!講真。。。對手包成咁。。。連我自己都以為佢斷左啦!又點可以用嚟說服佢喎!。。。嗚嗚。。。

軒轅皓見秦天晴好可憐咁嘅樣,於心不忍,就開口話

“呀朗,醫生話佢只係失血過多,個傷口並唔係好深,所以休養一個禮拜就好!無必要要佢停。。。”

點知佢講都未講完,呀朗就已經望住秦天晴,同佢講

“如果你答應我留響呢度休養一個星期,邊度都唔去嘅話,一個星期之後,你就可以復職,出任務!你點睇?”

出任務?出咩任務?雖然我好好奇,但係我都係決定答應左佢先,有啲咩野留番之後再問!

因為我驚佢一陣會反悔丫!

我對住佢點點頭,表示答應,然後佢就笑笑口,貌似心滿意足咁開門番出去。。。

望住佢個背影,除左無言之外,我都唔知可以點。。。

而呢個時候,我突然醒起有野要問佢地!就係。。。呢度到底係邊度嚟?

仲有,軒轅皓同凌嘯峰兩個,點解會響呢度?當然,仲要問埋響我暈左之後,發生左啲咩事啦!

而軒轅皓聽到我咁問之後,就話比我知,佢地本來就響呢度,因為呢度就係靈警總部!至於之後發生左啲咩事,就由呀峻開口講我知。。。

原來,當日呀峻收到我隻護身符公仔之後,就即刻影左張相whatsapp左比佢呀哥—凌嘯峰,同佢確認一下我嘅身份,而凌嘯峰見到呢張相,就非常肯定果個就係我,所以就交代呀峻,如果有事發生嘅話,一定要保護好我!同時,凌嘯峰亦都將我上山露營嘅呢件事話左比軒轅皓知!

而軒轅皓知道左之後,就即刻去調查下果座山上面,有無啲咩潛在危險響度,唔查由至可,一查就發現不得了!果座山竟然係鬼王殘魂嘅其中一個封印點!而呢個殘魂,仲要係其中一個有意識嘅主魂!嚇到佢立刻通知總部要求支援,同時亦都準備搭直升機飛過去幫手!因為佢知道,有我響度。。。十有八九都會出事。。。

聽到呀峻咁講,我即刻一臉哀怨咁望住軒轅皓,而佢見我咁既樣,竟然仲淡淡咁回應我左一句“呢個係事實。。。”!

凌嘯峰見到我地咁,就即刻接著話

”當時,我同呀皓就已經上左直升機,但係,響我地等緊起飛嘅時候,總部派嚟嘅人就已經出現左,而果個人,就係呀峻嘅上司—呀朗!

呀朗一嚟到,就以情況太危險,要完全由特殊部隊接手事件為理由,將我地兩個趕左落機!然後佢自己就帶住部隊嘅人飛過嚟支援你地!”

聽到呢度,我就響度諗。。。呀朗都幾不近人情架喎。。。

軒轅皓見秦天晴聽到皺晒眉頭咁,為免佢對呀朗反感,就即刻解釋番

“我地幾個係由細識到大嘅好兄弟,呀朗佢咁做,只係唔想我地有事!”

講完之後,見秦天晴點點頭,無再皺眉頭,即時鬆左一口氣!於是佢就擰轉頭,對呀峻打打眼色,示意佢繼續講落去!而呀峻收到命令之後,就繼續話

”佢地嚟到嘅果一刻,正正就係五行封印陣出現嘅時候!骷髏鬼被五行陣完全咁封印左響地底之下,佢地就從雲梯上面爬落嚟,將思語佢地一個個咁接上直升機,然後進行催眠,令到佢地忘記晒當時所發生嘅一切,之後再響佢地嘅腦海入面,加入左山火嘅呢個記憶!

而你當時就失血過多暈左,好在呀頭有帶隊醫過嚟,及時輸血比你,你先至可以平安無事。。。不過。。。”

講到呢度,佢停左一停,然後好疑惑咁望住我問

“你做咩要自殺式咁割脈丫。。。?”

下。。。自殺式咁割脈?我幾時有自殺丫。。。

凌嘯峰望住秦天晴一臉不解咁嘅樣,就不停響度大笑,然後話

“細佬,我可以好肯定咁話比你知,天晴佢應該係唔明你講啲咩!哈哈哈!天晴!呀峻係指,你做咩要靜脈同動脈一齊割落去丫!咁樣做,同人地自殺係無分別囉!”

聽到佢咁講,我就即刻急急咁反駁佢

“邊有!我明明係學呀峻咁做架喎。。。”

我一講完,軒轅皓同凌嘯峰就即刻擰轉頭望實呀峻,嚇到佢馬上舉起雙手話

“我對燈火發誓,我無割丫!丫!唔係,我係有割脈,但係我只係割左靜脈咋!我無自殺囉!”

我囧!時間咁趕你都仲可以揀割邊條。。。我認輸了!

當佢講完之後,大家都好似沉默左咁。。。

軒轅皓見我地都唔出聲,就同我講

“想唔想知道,你要出嘅係咩任務?”

聽到佢咁講,我即刻用好期待嘅目光望住佢,等佢話我知

軒轅皓見秦天晴雙眼發光咁嘅樣,覺得有啲好笑,於是就伸手輕輕咁拍一拍佢個頭,然後同佢講

“你要去百貨公司做臥底!”
已有 0 人追稿