幻想永遠都係美好,而現實卻係。。。

當軒轅皓佢地離開左間房之後,我先至醒起。。。

我對手搞成咁,咁我點樣飲水?點樣食飯?仲有點樣沖涼丫!!!???

我耷低頭,望住呢兩隻《唔知點解比人打晒石膏,仲包到連手指頭都見唔到》嘅手,內心崩潰緊嘅同時,亦都響度諗

“究竟邊個咁大整蠱丫!!!!?”





嗚嗚嗚。。。本小姐同你誓不兩立!

而被秦天晴誓不兩立嘅果位人兄,就正正企左響離房門不遠處嘅位置!

所以,當軒轅皓佢地一出到房,就見到明明一早走左,但係而家就企左響度嘅呀朗,於是佢地就行過去

凌嘯峰一行埋去,就即刻伸手搭住佢個膊頭,同佢講

“你個死仔,係都要醫生包到天晴隻手咁!你知唔知啱啱佢問我地果陣,我地真係完全唔知點答佢好丫!”





凌嘯峰講完之後,凌嘯峻就接住話

“咪係!呀頭,人地只不過無望你一眼就暈左之嘛,你點可以咁樣整鬼佢架!話晒佢都係你個妹丫!”

最後,連身為冰山嘅軒轅皓,都神色古怪咁望住佢講左句

“嗯。。。估唔到你為左留佢響度望多幾眼,竟然會用埋啲咁嘅手段。。。”

秦天朗望住呢班識左咁多年嘅好兄弟,竟然為左晴晴而對佢連珠砲轟,都唔知應該為佢地對自己個妹咁好而開心丫,定係為佢地竟然咁樣睇自己而感到悲哀!





佢好無奈咁嘆左一口氣,然後就開口解釋

“你地諗左去邊丫。。。我咁做都係為佢好!你地都知佢遇到危險嘅機率有幾高架啦。。。”

聽到秦天朗咁講,軒轅皓佢地三個都不約而同咁點點頭!比左個《不能同意更多》嘅表情比佢!

秦天朗頓時滿頭黑線。。。望住佢地停左幾秒之後,就繼續話

”如果幫佢用最普通嘅方法嚟包紥,佢肯定會周圍走,你地都知佢而家兩隻手都傷左架啦,根本就無能力去保護自己!所以。。。我先至會用呢個辦法。。。將佢留響呢度!”

《只有將佢留響度。。。留佢響自己身邊。。。守護住佢。。。先至係最放心!》最後嘅呢一句話,佢並無講到出口

軒轅皓聽完之後,或多或少都能夠理解到秦天朗嘅心情,因為佢清楚咁知道,因為某啲原因,佢地兩兄妹自細就分開左生活!

雖然佢地係分隔異地,但係秦天朗對自己妹妹嘅關心同愛護,就從來都無缺少過!就算自己無辦法去見佢一面,都會交托其他人幫佢代為照顧!





只可惜。。。秦天朗做左咁多,但係秦天晴到而家都仲未知道,自己原來係有個呀哥!

諗到呢度,軒轅皓就有啲猶疑咁問

“呀朗。。。你諗住幾時同天晴相認?”

秦天朗諗左一諗之後,就開口話

“我諗。。。等呀爸呀媽番嚟之後,先至再同佢講會好啲。。。因為我擔心而家就同佢講嘅話。。。佢會接受唔到。。。咁你呢?你有無同佢講過你係。。。”

秦天朗都未講完,軒轅皓就即刻急急咁打斷佢

“咳咳!呢啲野遲啲先至算!而家天晴都已經應承左留低響度,咁你應該可以安心咁叫人幫佢拆左個石膏佢啦?”





而秦天朗聽到之後,就只係望住佢邪氣咁挑眉一笑,然後左一個右一個咁搭住佢地膊頭,推佢地向前走

其實,呢一刻佢係心諗

“咁快叫人拆左個石膏佢,咁咪見唔到晴晴果個手足無措嘅表情囉。。。唔得。。。唔得。。。”

由於今次係秦天朗第一次見到長大成人嘅秦天晴,所以對於秦天晴嘅一颦一笑,佢都覺得相當難得,珍而重之!以至於秦天晴響呢七日入面,《享受》左不同嘅待遇。。。

時間好快咁就過左七日,而呢一日,我終於都嚟左羅氏集團度見工啦!

回想起呢幾日入面,果個呀朗一直響身邊跟出跟入,不停咁做埋的奇怪野,就覺得莫名奇妙。。。雖然佢係無惡意,但係。。。真係騎呢到唔識得點去形容囉!

可憐嘅秦天朗響毫不知情嘅情況之下,被自家妹子嫌棄到一個極點。。。

“秦天晴,你可以入去啦!”一把女聲,打斷左我嘅思想





我即刻砰砰聲咁企起身,然後走入房,但係一入到去,我就好愕然咁企左響度,望住房入面嘅人

因為果個人,正正就係羅氏二公子—羅永倫!

堂堂羅氏二公子竟然走嚟IN一個小小嘅售貨員!?奇怪啦。。。

我回過神來,然後慢慢咁行去佢嘅面前,而佢見我行埋嚟之後,就揚一揚手示意我坐底,同時開口話

“請坐丫秦小姐,我地又見面啦!”

聽到佢咁講,我下意識咁望一望佢隻手,然後掛上職業性嘅微笑同佢講

“係丫,羅先生!估唔到我地仲有機會再見。。。你最近幾好嘛?”





羅永倫見秦天晴呢副公式化表情,同上次一見到佢就撲出嚟,死死咁捉住佢隻手臂唔放嘅果個樣,好似判若兩人咁,就有啲好笑咁話

“託你嘅福,過得唔錯!秦小姐,其實我地都已經唔係第一次見,第一次講野啦,你唔需要咁見外架喎!”

聽到佢咁講,我望住佢,然後一臉認真咁話

“唔得。。。!我係嚟見工架嘛!點可以無大無細架呢!”

點知羅永倫聽到之後,竟然好嚴肅咁話

“秦小姐,唔好意思。。。我諗。。。我唔可以請你啦!”

下,我見都未見你就話唔請我!?你唔請我,咁我點混入去丫!?

我好驚訝咁望住佢,而佢見到我咁嘅反應,就繼續話

“你唔好誤會丫。。。我只係為左你嘅安全著想咋!其實我今次親自過嚟,除左係想再次多謝你令到Yuki可以沉怨得雪之後,亦都係為左阻止你入嚟呢度做!因為你係我地嘅恩人,所以我唔希望你會遇到危險!”

遇到危險。。。?唔通。。。佢知道左百貨公司入面有鬼娃娃響度!?咁樣嘅話。。。呢個絕對係入去嘅好機會!所以我即刻開口問

“羅先生,你公司係咪發生左啲咩怪事丫?定係你公司有鬼丫?係嘅唔怕同我講喎!你都知我見到果啲野架啦,你同我講嘅話,或者我有辦法可以幫到你呢!”

羅永倫聽到秦天晴咁講,就諗番起自己之前曾經唔相信佢所講嘅野,以為佢響度呃神騙鬼。。。直至到。。。

佢耷低頭望一望手上面隻戒指,沉默左一陣之後,就決定將件事講出嚟!

“大約響個幾月之前,我地間百貨公司開始鬧鬼!一開始嘅時候,只有少數嘅職員話自己見到鬼。。。但係隨著時間一日一日咁過去,越嚟越多職員都話自己撞鬼!甚至連某啲老顧客都見到!搞到我地公司嘅生意一落千丈之餘,仲有好多員工遞信辭職!

見到咁嘅情況,我地就即刻搵法師番嚟作法驅鬼啦,點知都無用!

而班員工知道搞唔掂之後,就個個都堅持話要走!為左留住佢地,同封住佢地把口,等佢地唔好亂講野,我地就唯有加左佢地10%嘅人工,再簽左份保密協議,先至搞掂個罷工潮!

而為左挽留住啲顧客,我大哥就對外宣稱,所有撞鬼嘅傳聞,其實係我地百貨公司嘅宣傳手法,為嘅就係營造一種恐怖嘅氣氛,嚟迎接月尾嘅萬聖節活動,名為《百貨驚魂夜》!

因為有左呢個宣傳廣告,所以我地公司嘅人流亦都慢慢咁上升番,但就響最近嘅呢幾日。。。”

講到呢度,羅永倫就停一停,想睇下秦天晴嘅反應,因為佢擔心自己所講嘅野,會嚇親佢!點知,竟然發現佢好專心咁聽,連少少驚嘅表情都無,就繼續話

“我地公司開始有人死。。。仲一日死一個,直到尋日為止,已經死左三個!因為死嘅人,都係夜更保安,而且佢地都同我地簽左保密協議,所以我地都只係對佢地嘅家屬賠左一大筆錢,就已經封住左佢地把口,令到呢件事無流傳出去。。。

其實。。。我地已經無辦法再去控制公司嘅情況。。。因為。。。就算我地呢幾日繼續咁搵左好多個法師番嚟作法都好,都仍然係無用。。。甚至有幾個法師仲差啲連命都無!所以。。。成件事就係咁囉。。。”

聽佢講完之後,我就響度諗,既然佢已經將成件事都講晒比我知,咁如果我表現比佢睇,我有能力幫到佢嘅話。。。佢咪會請我囉!?

我即刻企起身,走埋去搭住羅永倫嘅膊頭,望住佢好誠懇咁話

“羅先生!你相信我,我一定可以幫到你架!”

講完之後,我就響裙袋入面拎左兩張符紙出嚟,響佢面前揚左幾揚,然後就擰轉身,將其中一張符紙摙成一個波咁拋上天,同時亦都將另一張符紙向住天上面嘅果舊符波飛過去,開口唸

“乾坤無極,風雷受命!雷降!”

語畢,一度度嘅雷電迅速咁向住符波劈落去!

“啪!”一聲,符波已經化為塵埃。。。

搞掂!我拍一拍隻手,然後擰番轉身,用最燦爛嘅笑容開口同羅永倫講

“咁你而家可以請我啦!?”

好可惜,睇完我嘅表現之後,羅永倫就淨係瞪大雙眼呆住左咁望住我,對我所講嘅野竟然一啲反應都無。。。

見到佢咁嘅樣。。。我就諗。。。唔通。。。我啱啱嘅動作太快。。。所以佢睇唔清楚!?

我嘅眼球左轉右轉,左望右望咁諗左一諗之後,就下定決心!為左要入你公司!我拼了!

於是,我就響裙袋入面拎左十張八張符紙出嚟,打算再重覆一次啱啱所做嘅動作!

但係,當我將果叠符紙遞到佢嘅面前,揚都未開始揚,佢就已經。。。

“砰”一聲,連人帶櫈咁向後跌左落地。。。

見佢咁跌法,我就好心咁伸隻手過去,諗住扶起佢,同時就出於關心咁問下佢

“羅先生,你有無事丫?”

點知。。。佢竟然成個人自動咁彈番起身!然後同我講

“請請請!請你!我請你!你冷靜!冷靜啲!我請你!聽朝九點上嚟搵我!唔好激動!”

請我?請我!YEAH!作戰成功!等我一陣打電話講比呀皓知先!

達到目的,我同現任老闆羅永倫揮手say goodbye之後,就開開心心咁離開左羅氏集團
已有 0 人追稿