秦天晴 — 有鬼 新章《畫》正式展開: 百貨驚魂 — 第七章
“呼。。。好在有你咋！如果唔係。。。比果堆野左右夾攻嘅話，我地實死無生架啦！”萬師父坐響個地下到，望住我好感嘆咁話
而萬師父講完之後，張天師就一邊摸住佢執羊咩鬚，一邊接住話
“咪係囉！秦小姐果然係青出於藍丫！我地呢啲老野根本就感覺唔到果堆邪娃嘅存在！但係你竟然響佢未嚟到之前就已經感應得到！唉！真係長江後浪推前浪！想唔認老都唔得囉！”
聽到佢地嘅讚賞，我除左傻笑之外，根本就唔知應該比啲咩反應佢地好。。。
因為救左大家一命嘅並唔係我，而係軒轅皓！
啱啱如果唔係佢剛好打比我嘅話，我都唔會突然之間拎部電話出嚟。。。如果唔係聽到佢講個系統無問題嘅話，我亦都唔會響眾目睽睽嘅情況底下，打開個GPS嚟睇。。。
不過，好在佢地都係企響我嘅前面，所以應該係睇唔到我部電話嘅畫面！
但係，游大叔我就唔敢擔保！因為佢啱啱係企左響我嘅隔離！
我有啲心虛咁擰轉頭，向住游大叔嘅方向望過去，果然！佢正響度用一種好複雜嘅眼神望住我！
而佢嘅呢個眼神，就令我諗番起，佢剛才先至問過我係咩人。。。點知啱啱就比佢見到我拎住部可以偵測到鬼娃娃位置嘅電話。。。
我諗呢一刻，我響游大叔嘅眼中，無論前睇後睇，左睇右睇。。。都應該係一個形跡可疑嘅人。。。
唉。。。咁樣落去都唔係辦法！始終大家都係一team人，如果互相猜疑嘅話，分分鐘會出意外！所以。。。我決定同佢地坦言自己嘅真正身份—靈界警察！
然而，就響我想開口同佢地講嘅時候，我忽然間又再次感覺到果種好唔舒服嘅感覺！而呢種感覺嘅強烈程度，甚至令到我個人即時彈起身，企左響度！
或者，我嘅反應實在太大！所以當佢地見我企左響度，仲周圍咁望，就即時企晒起身，同我一樣好警惕咁望住四周圍嘅環境！
而游大叔見到咁，就馬上行嚟我嘅身邊，開口問
“天晴！呢度有古怪？”
聽到佢咁問，我就望住佢，好認真咁話
“係！雖然我仲未見到係啲咩。。。但係我嘅感覺係唔會有錯。。。呢度的而且確係有啲野響度。。。而呢樣野。。。甚至。。。”
講到呢度，佢地幾個同時間望住我！而我吞一吞口水之後，就繼續話
“甚至比出面嘅鬼娃娃更難以對付！”
聽到我咁講，大家都愕左一愕！不過五秒之後，佢地就已經將身上面嘅架生拎晒上手，準備迎戰！
嗯！果然係行家一出手，便知有沒有！只係用左五秒時間，就已經消化左呢件事，仲順帶咁做埋準備嘅功夫！呢個真係令我佩服到不得了！
但係，當我望真啲佢地手上所拎住嘅武器果陣，就有啲無言。。。
因為。。。佢地手上拎嘅有銅錢，有八卦，有桃木劍，仲有黃旗！但係偏偏就無一個人係拎住張符紙
於是，拎住張符紙嘅我，就響度諗
唔通。。。以前唔興用符紙嘅！？明明符紙幾好用丫，又輕又方便！大大張咁用又得，接埋細細張咁用又得！丫！仲有送禮自用亦得！得左！
不過我對符紙嘅讚美，好快就比啲“砰砰碰碰”嘅聲音打斷左！
雖然果啲聲音係好細微，但係響呢個寂靜嘅環境底下，就完全係好清晰咁傳入我地嘅耳中。。。
而聽到呢啲聲音嘅我地，就同時咁望住廣播室嘅盡頭！因為果啲怪聲。。。好明顯就係從果邊嘅大櫃裡面所傳出嚟。。。
咁我地而家點算好呢。。。？
究竟係企響度等佢出嚟好丫。。。定還是係我地主動出擊好呢！？
就響我地猶疑不決嘅時候，游大叔就向我地提議，不如由佢去打開個櫃門，再由我地對住櫃入面隻野進行攻擊！
但係佢一講完之後，就遭到張天師嘅反對！因為一個人咁行過去，實在係太危險啦！
結果佢地就各執一詞，互不退讓！最後搞到大家都企晒響度，完全郁都無郁過。。。
有見及此，我就唯有搖搖頭，嘆嘆氣，然後自己一個人行過去啦。。。
其實。。。我自己都好鬼驚架！好驚一打開門果陣，入面果隻唔知乜鬼野會兜口兜面咁撲埋嚟我度！
雖然係咁，但係我都照樣咁走過去！因為我有降魔金鈴。。。同埋護身手繩可以保平安！而佢地無！所以由我去會比較適合。。。
於是，我就慢慢咁向住個櫃門一步一步咁行過去，同時，我嘅左手就凝聚左一個靈火球，準備到時遇到啲咩事嘅時候，就可以即時咁反攻！
可能，我嘅火球實在係太惹人注目啦，令到本來仲響度爭執緊嘅游大叔佢地，馬上就發現左我嘅行動，然後響我嘅身後面大叫“停底！”，“停手！”。。。
不過佢地已經嚟唔切阻止我！因為我已經企左響個櫃門面前，而我隻右手，就已經捉實左個門柄！
我深深咁吸左一口氣，然後響心入面開始數
一。。。二。。。三！
就響我數到三嘅時候，間房入面嘅所有燈都忽然之間熄晒！搞到成間房都變得漆黑一片！
而呢個突如其來嘅情況，就嚇到朱道長佢地發出左一陣陣嘅驚呼聲！
不過佢地嘅驚呼聲只係叫左幾下，就已經比另一把尖叫聲所覆蓋！
而果把尖叫聲，好不幸地就係由我把口度所發出嚟。。。
因為當我數到三果陣，啲燈全部咁熄滅晒嘅果一剎那，我隻手就已經拉開緊道門。。。想停都停唔切。。。
所以對門就已經比我完全咁拉開左！
又由於我有靈火球響度嘅原故。。。所以我嘅視線並唔係好似萬師父佢地咁，突然之間乜都睇唔到。。。
反而係將眼前嘅野睇得清清楚楚。。。
響櫃入面嘅。。。係一個全身腐爛嘅人形物體。。。而呢個物體。。。
就係。。。啱啱同我握過手嘅。。。王仙姑。。。！