唔怪之得佢捉住我隻手果陣,我會有種好唔舒服嘅感覺啦!

又唔怪之得小木魚條手繩會突然閃左一閃啦,原來係幫我趕走啲蠱蟲!仲等我以為佢走埋嚟我度,係想同我握手示好!

哼!呢個女人真係惡毒!

我即刻走埋去軒轅皓嘅身邊,然後好急切咁同佢講

“呀皓!我知道邊個係巫蠱師啦!我地快啲番百貨公司啦!佢可能仲響果度架!”





點知,軒轅皓聽到之後,並無帶我番去,而係捉住我行去沙發嘅位置度坐低,然後叫我慢慢咁講佢知到底係乜野一回事!

聽到佢咁講,我就將剛才姚魅兒同我握手件事,仲有條手繩發光嘅事,再加上小木魚所講嘅野,一五一十咁講晒比佢知。。。

而佢聽完之後,就神情凝重,不發一語咁望住我,皺埋個眉頭唔知諗緊啲乜。。。

其實響呢一刻,軒轅皓個心係響度慶幸緊,好在有小木魚條手繩響度,如果唔係。。。秦天晴今次就真係兇多吉少!

因為對方好明顯就係想設個局,將所有人置諸死地!而本來要做餌嘅人選,顯然就係秦天晴!





如果佢無估錯嘅話,果個姚魅兒本身係想將啲蠱蟲放響秦天晴嘅手上,點知比小木魚察覺到,搞到失敗左!所以就響唔可以無餌嘅情況之下,搵左王仙姑嚟頂上!

諗到呢度,佢望一望坐響秦天晴嘅大脾上面,抱住為食狗嘅小木魚!

雖然唔知佢當初點解會出手相助,亦都唔明佢點解要跟住秦天晴,仲要叫佢做娘親!

但係,佢深信小木魚係唔會傷害秦天晴!

因為,如果佢真係立心不良嘅話,就唔會將唯一嘅桃木精粹凝聚成護身手繩,交比秦天晴去配戴!亦都唔會費盡心思咁附上一絲元神,無時無刻咁守護住秦天晴嘅安全!





果然!當初說服秦天晴去收留小木魚,係一個明智嘅決定!

“哎喲!軒轅叔叔!你做咩情深款款咁望住人地丫?人地會唔好意思架。。。”小木魚見軒轅皓一直眼甘甘咁望住自己,於是就開口問

噗!聽到小木魚咁講,我忍唔住笑起上嚟!

小木魚!你究竟知唔知情深款款係咩意思丫!?哈哈哈。。。

我望住軒轅皓冷酷嘅俊臉上面,居然露出左一啲尷尬嘅表情,就有啲衝動想拎部電話去影低佢!

而軒轅皓見我地一大一小都望住佢,就輕咳兩聲,然後話

“咳咳!細路,你諗多左!天晴,我而家番去搵呀朗,你就響度休息下,唔好諗咁多,早啲瞓!有啲咩我聽日過嚟話你知!”

聽到佢咁講,我就唯有送佢出門口,然後洗漱上床休息啦!





第二朝一早,我就收到羅永倫嘅電話,佢驚驚青青咁同我講,我淨係聽日番工,幫佢做宣傳就OK,其餘嘅日子都唔洗再番去!至於份合約方面,佢已經取消左,但係今個月份人工會照出比我,叫我唔洗擔心!之後,佢就收左我線!連比我講一句說話嘅機會都無。。。

我聽住電話入面傳嚟嘅“嘟嘟”聲,完全唔明白佢做乜打嚟好似撞鬼咁款!

乜自己真係有咁恐怖咩!?

其實,並唔係秦天晴好恐怖,而係佢個親親大哥同佢個上司實在係太可怕!佢地竟然一朝早就殺上去羅永倫間公司果度,向羅永倫佢表明身份,然後幫秦天晴拎番份合同,仲順便比左啲無形嘅壓力比佢!

而呢份壓力嘅原由,係來自於佢地尋晚路過塊百貨公司宣傳版果陣,見到《百貨驚魂夜》嘅宣傳海報,以及。。。秦天晴張Cosplay相!

軒轅皓知道秦天晴本來係扮巫婆,但係比羅永倫換左套衫,先至變成咁嘅樣!所以就將呢件事,話左比佢身邊嘅秦天朗知!而秦天朗知道左之後,就覺得自己個寶貝妹妹比人蝦,所以。。。件事就演變成咁!

不過,身為當時人嘅秦天晴,就對此事完全毫不知情!





我好無言咁放低左部電話,然後輕輕咁”唉!”左一聲之後,就開始整理下聽日所需要嘅道具!

其實,聽晚嘅活動,算係一個角色扮演嘅遊戲!所有嘅參加者都會化身成為勇者魔法師,以五個人為一組,由一樓至到七樓入面搜集神聖之羽,然後去到八樓嘅祭壇面前,放低果七條羽毛,召喚出神聖天使,再上去九樓上面,打敗黑心女巫!

成個流程睇起上嚟好似好簡單咁,但事實卻係有難度響入面!一來我地需要人手嘅配合,二嚟我地仲要保障參加者嘅安全!

本來我同軒轅皓係諗住將靈警嘅兄弟叫過嚟,隱藏響每一層入面,保護參加者嘅安全!不過。。。而家既然有成隊特殊部隊嘅人員響度。。。咁不如就問下呀朗可唔可以幫手配合下啦!

“叮噹!”就響我整緊最後一枝符咒魔杖嘅時候,門鈴就突然響起上嚟!

小木魚講左句“好多叔叔!”之後,就抱住為食狗,從沙發上跳左落地,然後一彈一彈咁跳過去打開道門

而道門一打開,小木魚就好乖巧咁叫

“舅舅!軒轅叔叔!凌大叔!凌小叔!”





聽到小木魚嘅稱呼,我手上枝魔杖即刻“啪!”一聲咁跌左落茶几上面!

我望住小木魚嘅背影,滿頭黑線咁響度諗

小木魚丫小木魚。。。你啲稱呼到底係點嚟架。。。又叔叔,又大叔小叔,而家又無啦啦開口叫舅舅。。。會唔會有朝一日你突然之間開口叫爹爹,然後同我講,佢係我夫君咁樣架。。。

就響我胡思亂想緊嘅時候,呀朗佢地已經行左入嚟,坐左響我嘅身邊!

而佢地一坐低,軒轅皓就即刻開口同我講

“天晴!我地尋晚搵過晒成間百貨公司,都搵唔到你口中所講嘅果個姚魅兒!”

軒轅皓一講完,凌嘯峰就接口話





“唔單止搵唔到果個女人!就連堆鬼娃娃都搵唔到!明明我地已經地毯式咁搜查晒咁多層架啦!都竟然會一隻都搵唔到!唉!都唔知佢地走晒去邊!”

聽到佢地咁講,我諗左一諗,然後就同佢地講

“其實。。。個GPS係咪真係無問題架?呀皓,你應該記得我尋日咪話過,個GPS搵唔到鬼娃娃嘅!但係夜晚就突然《群娃亂舞》咁唔知響邊度走晒出嚟!我懷疑。。。唔關我郁唔郁到個setting嘅事,而係佢地真係用左唔知咩方法,將自己隱藏起嚟!”

呀朗聽完我講之後,就開口話

“照你咁講嘅話,其實並唔係無可能。。。皆因GPS的確係有機會因為環境嘅因素而受到干擾!不過。。。我地無辦法可以證實得到。。。”

聽到呢句說話,大家都沉默起上嚟。。。

而呢個時候,坐響我隔離嘅小木魚,就放低左為食狗響沙發度,然後就企起身,跳過去我地面前嘅茶几上面,舉手答話

“可以丫!”

聽到佢咁講,我地嘅目光就同時間望住佢,而呀朗就伸手摸摸佢個頭,然後問

“小木魚,乖!話比舅舅知,你指嘅可以係咩意思?”

秦天朗知道,小木魚佢嘅行為雖然係細個啲,外表又細個啲,但係佢諗嘅野就一啲都唔細個!話晒佢都係存活左幾百年嘅桃木精,點都食鹽多過佢地食米!所以。。。佢講得出嚟嘅說話,肯定係有佢嘅意思!

小木魚聽到秦天朗嘅問話,就爬過去佢個身上面,拎左佢褲袋入面嘅果部特製電話出嚟,然後爬番去個茶几上面,企番起身,打開左個GPS,同時開口話

“娘親,響呢度!”

講完,佢就將部電話向前遞比我地睇!

我地一望,上面的確係有個紅色點點響度閃下閃下,不過,當佢講左句“娘親,唔見左!”之後,果個紅色點就響個屏幕上面完全咁消失左!

我地好震驚咁望住小木魚,完全唔明發生左啲咩事!而小木魚就無視我地驚訝嘅目光,奶聲奶氣咁講左“結界!”呢兩個字!

結界!?。。。結界可以避過GPS嘅偵測!?

我望住茶几上面嘅果推魔杖,再諗番起班鬼娃娃哩埋左響唔知邊度嘅結界入面。。。唔知點解,我腦海入面忽然諗起左套戲名

“消失的密室。。。”我喃喃自語咁話

一個令到佢地全部都消失晒,令我地搵唔到佢所在位置嘅密室!

聽到我果句自言自語說話,呀朗同軒轅皓都同時“噗!”一聲咁企左起身,然後互望左一眼,點一點頭,再望住我講低左一句“你講得啱!”之後,就頭也不回咁打開道門走左出去!

而凌嘯峰同凌嘯峻見自己個呀頭走左去,就馬上跟住佢地尾而離開!

最後就淨番我同為食狗,仲有小木魚三個響度你眼望我眼,完全處於狀況之外。。。
已有 0 人追稿