就響我得到答案嘅時候,電梯門亦都同時咁打開!

一開門,我就聽到無數女人嘅尖叫聲!當然,呢啲尖叫聲並唔係受驚而發出嚟啦!而係興奮!

當中仲夾雜住一句句嘅“哇!好靚仔丫!”,“男神丫”,“佢望過嚟啦!”。。。

聽到呢啲說話,唔知點解。。。總係有種似曾相識嘅感覺。。。

於是,我就向住人群嘅方向行過去,同時響度諗,自己究竟響邊度聽過呢類說話呢。。。





隨著我一步一步咁前進,慢慢咁接近人群嘅中心點,睇清楚企響中間嘅果幾個人之後。。。我終於都知道,點解呢個情境會好似熟口熟面咁啦!

因為引起騷動嘅人,除左有呀朗同凌嘯峻之外,仲有一個發生過同類事件嘅人物響度!就係軒轅皓!

而當我望真啲佢地而家個look嘅時候,我唔多唔少都有啲明白到班女人點解會咁瘋狂!

因為,佢地三個嘅外表本來就已經唔差,家下仲著埋《終結的熾天使》— 百夜米迦爾嘅果套白色衫!殺傷力完全提升左一倍有多!難怪瞬間秒殺大批少女嘅心!

我摸摸個下巴,心諗





”嗯。。。真係唔錯!果然生意人即係生意人!一套衫就可以做成最大嘅宣傳效果!羅永倫的確係勁!”

軒轅皓見秦天晴已經出現左,仲對住佢揮揮手,就覺得有啲無奈。。。

明明周圍嘅女人都想接近我架。。。點解秦天晴偏偏就可以咁淡定咁望住我架呢?

唔通響佢嘅眼中,自己連一啲魅力都無!?

如果秦天晴知道佢咁諗嘅話,一定會眨眨眼,然後一臉認真咁話比佢知





“咪玩啦,你點會無魅力丫!只係。。。因為你係男神,所以只能遠觀!不能褻瀆!如果唔係會有報應架!”

而所謂嘅報應,就係受到無數女人瘋狂嘅報復!

秦天朗好尷尬咁甩開抱住佢合照嘅果個女人之後,就望一望身邊嘅軒轅皓,竟然發現佢比個女人拉住隻手都毫無反抗!仲呆呆咁望住一個方向,出於好奇,就跟住佢望過去!

點知,佢居然見到自己個妹企左響果邊睇戲!睇得好開心之餘,仲對住自己比左個like!

於是,佢開始明白軒轅皓點解會有啲咁嘅反應!心入面有啲幸災樂禍咁諗

“軒轅皓丫軒轅皓,你都有今日啦!”

但係,當佢睇清楚秦天晴所在嘅位置果陣,就發現佢旁邊竟然企左隻細路鬼響度!

秦天朗瞬間覺得唔對路!出於擔心,佢即刻走過去拉住秦天晴,向住羅永倫安排比佢嘅果間房度走過去!





而軒轅皓同凌嘯峻見到咁嘅情況,就即刻跟住佢地尾一齊走!

呀朗突如其來咁走埋嚟拉我走,令到我有啲愕然!不過我都照樣跟住佢行!反正佢又唔會害我嘅!

佢一直行,一直行,行到去我果間房前面,佢先至停低落嚟!然後擰轉身,好嚴肅咁問我,剛才係咪發生左啲咩事!

聽到佢咁問,我死都擰頭同佢講乜事都無發生過!

咪講笑!比佢地知道我啱啱嘅果啲不堪入目嘅行為,仲唔比佢地笑死!

秦天朗見到秦天晴呢個反應,其實都知道肯定係發生過啲事架啦,不過既然佢唔想講,咁都無辦法啦!

佢就唯有伸手摸摸秦天晴個頭,然後再指一指佢身邊嘅小妹妹,開口問





“咁佢係邊個?”

嗯?邊個!?我跟住佢隻手指一望。。。

哈。。。啱啱食花生食得太高興,將佢完全咁遺忘左添。。。

我有啲尷尬咁摸摸個鼻頭,然後開口同佢地講

“佢就係我地要搵嘅細路!至於詳情。。。我一時之間都唔知點同你地解釋好!所以。。。等我入房諗一諗,再組織一下先至再講你地知!”

講完之後,我就側身舉起隻走手推開道門!而響我郁手嘅時候,響我身邊就出現左三把聲

“等等!”

“停手!”





“唔好丫!”

因為軒轅皓佢地同時醒起,有個怨婦哩埋左響間房入面!如果打開道門嘅話,佢肯定會。。。

可惜。。。道門已經比秦天晴一下咁推開左!

而隨住道門打開左嘅一瞬間,就有個著住黑袍,長髮披臉嘅女人向住佢直直咁撲埋去!

“哇丫!”我被撲緊埋嚟嘅女人,嚇到尖叫左一聲,然後本能咁舉起隻腳向上踢!

“噗!”一聲,黑袍女人中個正著!然後佢就瞓左落地,用雙手揜住某個位置不停咁左滾右滾,同時開口不停咁話

“哎呀!好痛。。。好痛丫!痛死我啦!會唔會斷左架!”





我望住呢個狀況,成個人當場石化左。。。

因為聽到呢把聲。。。我可以好肯定呢個黑袍女人。。。就係凌嘯峰!

咁樣嘅話。。。我剛剛。。。貌似係對佢做左樣不得了嘅事。。。

凌嘯峻同軒轅皓見到咁嘅情況,就即刻衝入去睇下佢有無事!而呀朗呢,就走去閂番埋道門!然後響我身邊輕輕咁講左句

“放心啦!佢無事嘅!”

聽到佢咁講,我就有啲猶疑咁話

”係咪真係無事架。。。啱啱果下我無十成都有八成力架喎。。。”

結果我一講完,呀朗佢就神色古怪咁望住我,微微咁點頭“嗯。。。”左一下!就連果個小妹妹都對住我笑一笑,跟住點點頭!

於是,我地就默默咁企左響度,等道門自己打開。。。

而隔左一陣之後,軒轅皓終於都打開門放我地入去!

一入到去,我就見到著住巫婆裝,帶住長假髮嘅凌嘯峰,正響度一臉哀怨咁望住我!我即刻對住佢雙手合十,不停咁道歉!

佢聽到之後,就好慘情咁同我講

“人地要扮女人已經夠慘架啦。。。你仲要重創我。。。好在呢套衫有連帶護陰咋!如果唔係。。。人地肯定變公公啦!到時我下半生嘅幸福咁就無左啦。。。”

丫。。。!?你指下半生定下半身先。。。同埋。。。明明係你自己突然撲埋嚟先架喎。。。

當然,呢句說話我只係心入面諗啦!邊敢對住佢講出口丫!一陣佢喊比我睇咪弊!

凌嘯峻見到咁情況,就即刻出嚟打完場!

“呀哥,你而家無事就好!天晴,你講下個細路究竟係咩一回事!”

聽到佢咁問,我就將成件事簡略咁講比佢地知!當然,關於游大叔同佢師父嘅事,我就完全咁省略左啦!

聽完晒成件事嘅來龍去脈之後,佢地就開始量討應該要點做先至好!而得出嚟嘅結論就係,今晚嘅活動之後就馬上行動!嚟個速戰速決!

於是,呀朗就馬上聯繫自己啲隊員,叫佢地準備好一啲游繩工具,照明用品同埋通訊器材!而軒轅皓,凌嘯峰同凌嘯峻就出左去各個樓層度,再檢查一次佢地尋晚所安裝嘅針孔攝影機,仲有道具佈景入面嘅裝置到底有無問題!

至於我呢,就響房入面對住班守護靈,一個一個咁叮嚀佢地,玩還玩,千祈唔好太過火!因為佢地而家嘅形像已經夠晒煞食!如果佢地再加埋啲《鬼主意》嘅話。。。我怕啲參加者會支持唔住。。。嚇破膽!

如是者,大家都準備就緒之後,就開始各就各位!

凌嘯峰所扮演嘅黑心女巫,就上左去九樓度stand by,呀朗,凌嘯峻同軒轅皓就響一樓大堂度接待啲參加者,而我就去左八樓祭壇佈景嘅後台入面,坐左響度研究緊圍繞住我嘅果三個電腦屏幕!

因為響個屏幕上面所顯示嘅,就係每一層樓嘅狀況!而且,只要點擊想睇哪樓層,個畫面就會自動放大!

而就響我呢度睇下,果度望下,玩得不亦樂乎嘅時候

“Calling,天晴!聽唔聽到?over!”軒轅皓沉穩嘅聲線從我耳仔入面嘅微形通訊器傳出嚟!

“嗯?收到丫!做咩丫?over!”我望住軒轅皓嘅影像開口問

聽到秦天晴把聲,軒轅皓就繼續話

“你一個人響八樓,要小心啲!記得有咩事就call支援,唔好自己死撐!知唔知道?over!”

聽到佢咁講,我就笑左一笑,然後話

“知道啦!你自己都小心啲啦!over!”

得到秦天晴嘅關心,軒轅皓馬上回應一句

“嗯。。。唔洗擔心,我會注意安全!over!”

本來一切都好和諧,但係。。。響呢個時候,凌嘯峰佢忽然開口講左句

“Calling,你地兩個!人地夠係一個人啦!點解你地唔關心下我架?over!“

就令到氣氛變得有啲尷尬。。。

不過,既然佢都開到聲求安慰,咁我都應該關心下佢嘅!於是,我就吸左一口氣,然後就諗住開聲同佢講啦!點知。。。

“clear!”軒轅皓淡淡咁話

噢。。。可憐嘅凌嘯峰,我為你默哀!

而就響我地嘅對話結束之際,遊戲亦都正式展開!
已有 0 人追稿