哇!嚇到我成個都人彈左起身!

我望住閃身走左入嚟,對我講左句“Surprise!”嘅凌嘯峰。。。

呢一刻,我真係好想同佢講,我一啲都覺得Surprise,反而係覺得好Scare囉。。。

而佢呢,就完全忽略我嘅感受,自顧自咁走埋嚟拉走左我張櫈,然後坐底響度,問我睇緊啲咩!

嗯?睇緊啲咩。。。?





丫!比佢嚇一嚇,我差啲唔記得左!我明明係要睇下二樓咩情況架喎!

於是,我就即刻望番住個屏幕!而入眼嘅係。。。二樓嘅情況,竟然同三樓一樣!都係混亂無比!

不過,響度搗亂嘅並唔係第二個鬼看更!而係我地最熟悉嘅鬼娃娃!

果度大約有十多隻拎住武器嘅鬼娃娃,正響度圍攻緊我地班手足!而我地班手足就為左要保護住宣傳部嘅人,所以受到鬼娃娃嘅攻擊,都無辦法去還手!只能夠拎出伏魔棒,將佢地嘅攻擊,一下又一下咁擋住!

見到咁嘅情況,凌嘯峰就即刻拉住我隻手向外跑!同時仲一邊跑,一邊對住通訊裝置講





“呀朗!二樓有一堆鬼公仔!班兄弟需要支援!呀皓!我而家帶埋天晴落嚟!”

秦天朗一聽到,就即刻推開果個嚇傻左,淨係識響度叫救命嘅羅永倫,然後講左句

“呀峻跟我落嚟!呀皓幫我照顧晴晴!”

之後,就快速咁衝左落去!而凌嘯峻聽到後,亦都即刻緊隨其後咁跑落去!

軒轅皓見佢地都走晒落去,就轉身望一望身後。。。





見到鬼看間唔再亂飛,守護靈唔再捉佢,男人已經落番地,班手足無再追住佢,啲參加者亦都無再周圍走!

佢微微點點頭,對此表示好滿意!因為唔洗佢出手,都已經回復番一片平靜!

好快,凌嘯峰同秦天晴就已經跑到落嚟!而隨住佢地同時間咁出現響度,就意味住呢個活動,亦都同時間咁結束!

或者,對於班參加者嚟講,呢個係一件好事!因為佢地個個都已經筋皮力盡咁坐晒響地下度,顯然係唔想再繼續玩落去!

凌嘯峰帶住我行去軒轅皓嘅身邊,然後開口問

“呀皓,我地洗唔洗落去幫手?”

軒轅皓聽到之後,就微微咁搖頭,同佢講

“有呀朗同你細佬響度,夠啦!”





聽到佢地咁講,我就走去同班守護靈做心靈交流!問下佢地好唔好玩丫?玩得開唔開心,而佢地聽到之後,都對我笑住咁點頭拍手!

見到佢地因為高興而展露出嚟嘅笑容,我個心都覺得好欣慰!雖然,我無辦法可以幫佢地解除守護靈既狀態,但至少,我能夠令佢地有一個開心嘅經歷!

至於羅永倫呢,我當然有走過去關心下佢啦!

我慢慢行埋去佢身邊,無視住鬼看更惡狠狠嘅目光,對住有啲受驚過度,搞到神智不清嘅佢落左個《寧神咒》!同時,亦都對佢講左聲“對唔住!”

因為。。。呢個活動比我地搞到咁。。。

而羅永倫聽到我咁講,漸漸咁回復番意識嘅佢,就對我苦笑左一下,然後講左句”算啦!大家都已經盡晒力!其實。。。某程度上,個活動都算係成功左!”

講完,佢就伸手指一指我嘅身後面!





嗯。。。?我跟住佢隻手所指嘅地方望過去,見到嘅係果班近乎虛脫嘅參加者!我隨即明白到佢係咩意思!

百貨驚魂夜。。。佢地應該都真係過左個驚魂之夜!

而呢個時候,耳機就傳嚟呀朗把聲!佢開口同我地講,二樓已經搞掂,可以帶人落得去啦!

於是,我地就照佢所講,全部人都浩浩蕩蕩咁向住二樓進發!

當我地落到去二樓嘅時候,就發現所有嘅鬼娃娃,都已經比佢地打到支離破碎!啲碎片仲搞到一地都係!

唔單止咁,就連成個環境都變得凌亂不堪。。。

我諗。。。二樓同三樓聽日都唔洗止意做到生意啦!

如是者,我地將佢地送到去一樓離開之後,就開始今晚嘅行動!





不過行動之前,呀朗就帶住我地上門左口架貨櫃車上面,將一件件嘅特製裝備交比我地!

有一套黑色嘅迷彩軍裝,一隻同軒轅皓同款嘅手錶,仲有。。。一副運動太陽眼鏡!

我地接過之後,就輪流咁響貨櫃入面嘅大布簾後面,開始換衫!

而換完之後,我就拎住手上果副太陽眼鏡,響度諗。。。應該要幾時帶佢先至好。。。

因為我真係唔明。。。夜麻麻帶太陽眼鏡做咩。。。但係眼見佢地個個都好忙咁整理緊其他裝備,我又唔好意思打擾佢地!唯有自己響度研究下先啦!

軒轅皓搞掂好晒自己套裝備之後,就望到秦天晴佢一直把玩住手上副鏡,一臉不解咁嘅樣,就知道佢有所誤會!於是就同佢解釋

“呢副唔係太陽眼鏡,而係夜視鏡!”





講完,佢就伸手拎走左秦天晴手上嘅夜視鏡,然後輕輕咁幫佢帶上,再繼續話

“呢副特製嘅夜視鏡,同一般嘅夜視鏡一樣,要響微弱嘅光源之下,先至可以使用!而佢嘅特別之處,就係可以用靈力嚟轉換模式,將普通嘅鏡面變成夜視鏡!同埋佢對靈火嘅火光特別敏感,只要附近有靈火嘅火源響度,就算只係一叮點,都可以將周圍嘅環境睇得特別清楚!”

凌嘯峻聽到軒轅皓嘅說話,就接住話

“我地一陣要遊繩落去電梯槽果度,下面會黑蚊蚊咩都睇唔到,所以我地就需要帶住呢副鏡!”

哦。。。原來係咁!

響我地全部人都準備好晒之後,就向住百貨公司嘅地庫一樓,果架電梯嘅位置出發!

一到達,我地就發現度電梯門已經打開左三分之一!唔洗問,啱啱班鬼娃娃肯定係響呢度爬出嚟!

凌嘯峰同凌嘯峻就將手上果一大袋野放低,然後就打開佢,將入面嘅野拎出嚟,開始做遊繩嘅setting!

而呀朗同軒轅皓呢,就拎左條安全帶比我,同我開始上遊繩教學班!

其實遊繩呢樣野,並唔係我嘅第一次!記得響好耐之前,學校搞嘅營區團體活動入面,就已經做過好幾次。。。

至於點解會做左好幾次呢,就真係要多得嚴正晞!佢話第一次會驚,第二次會驚,第三四五次都可能會驚,但係再做多幾次就會麻木左,唔再驚!

結果我就比佢拉住我上上落落左好多次,由本來驚到腳軟,死都唔肯踏出第一步,到之後就自動波,一上到去就自動自覺咁遊落嚟!以免佢又再次拉我上去!因為真係好鬼攰丫!

雖然係有經驗,但係我都打醒十二分精神,去聽佢地嘅講解同埋指導!因為地形環境嘅唔同,就算再多嘅經驗,都係要小心為上!

講完晒同準備好晒之後,呀朗就打頭陣,第一個摸黑咁遊落去!而我地就企晒響電梯門果度Stand by!

但係,隨著時間一分一秒咁樣過,呀朗佢竟然一啲回音都無,令到我有啲擔心,佢到低係咪遇到啲咩。。。出左咩事!

不過,軒轅皓佢地就叫我放心,因為打頭陣要比較謹慎,步步為營,所以時間耐啲係正常嘅!

果然,佢講完之後,呀朗就通知我地無危險,可以遊得落嚟!但係基於安全問題,我同軒轅皓就必須要一齊遊,唔可以分開!

聽到佢咁講,我就明白到點解凌嘯峰佢地setting左兩條繩響度,原來係預左有個人要傍住我落去!

呢一刻,秦天晴只係以為佢地擔心自己遊得唔好!並唔知道佢地咁樣做,完全係用心良苦!

因為遊落去嘅過程,除左要經歷伸手不見五指嘅環境,仲要經過一啲可怕嘅野。。。

不過,好在佢乜都唔知!如果唔係佢肯定死都唔肯落嚟!

我同軒轅皓重新咁檢查一次啲裝備無問題之後,就開始遊落去!軒轅皓落先,之後再到我!

一開始,我就有啲緊張!踏出第一步嘅時候有啲遲疑,不過,聽到背脊後面傳嚟軒轅皓把聲,同我講左句“唔洗驚,我響度!”之後,我就鼓起勇氣,開始慢慢咁遊落去!

響軒轅皓指引之下,我地一步一步咁向下遊,周圍嘅環境開始變得越來越黑暗,甚至去到伸手不見五指嘅地步!

同時,我亦都開始聽到一啲怪聲。。。

於是,我就輕輕咁開口問軒轅皓

“呀皓。。。你聽唔聽到。。。?”

軒轅皓當然係聽到啦,仲知道係咩聲添!不過佢就唔打算話比秦天晴知。。。所以就回應佢

“無丫。。。”

聽到佢咁答,我就覺得有啲奇怪。。。明明啲聲越嚟越響,越嚟越密架!點會聽唔到丫!而且啲聲就好似。。。

我即刻搖頭否定!心入面不斷默唸

”唔係掛。。。唔係我諗咁掛!千祈唔好同我諗嘅一樣丫。。。”

可惜響下一刻,我聽到軒轅皓嘅鞋底所發出嚟嘅“噗吱!”一聲,就印證左我心入面嘅想法,係完全正確!

我可以好肯定呢度有蟲!好多蟲!呢度周圍都係蟲!
已有 0 人追稿