秦天晴 — 有鬼 新章《畫》正式展開: 百貨驚魂 — 終章（上）
咦！？呢把聲。。。咪就係。。。
我即刻輕輕咁拍一拍軒轅皓，諗住話比佢知！點知佢居然一手撳住我個膊頭，一手做左個禁聲嘅手勢，示意我唔好出聲同唔好郁！
見到佢咁嘅反應。。。我就唯有揞住自己個咀，對佢做左個OK嘅手勢，表示自己知道！同時將剛才想同佢地講嘅說話，收埋響個心入面！打算遲啲先至講佢地知！
如是者，我地就繼續哩埋響條樓梯嘅牆身後面，採取敵不動，我不動嘅狀態！
然而，我無諗過呢個狀態，維持唔夠一陣，就比佢嘅另一句說話所打破！
“就算你而家唔出嚟，我都一樣知道你響呢度。。。秦天晴！”
聽到佢突然開口叫我個名，我成個人都打左個突！心諗
唔係掛！？咁你都知！莫非你識得《隔山打牛》個Friend，《隔牆睇人》！？
而軒轅皓佢地聽到佢叫我，就好驚訝咁望住我！因為佢地並唔知道叫我嘅人，到底係響個！同埋我到底幾時開始同奉靈教嘅人有來往！
見到佢地呢副表情，我就將啱啱無機會講嘅果六個字，“巫蠱師，姚魅兒！” 對住佢地做口型咁講出嚟！
之後，我就企左起身，行前幾步，抬起頭望住企響祭壇中央嘅姚魅兒，微微咁笑一笑，然後好隨意咁話
“Hi，姚魅兒！又見面啦！”
佢見到我嘅出現，就冷笑左一下，然後一臉囂張咁話
“嘿。。。係囉！我都估唔到你會咁大命！咁都唔死得。。。不過。。。今次你就唔會咁好彩啦！骷髏！同我。。。”
聽住佢所講嘅說話，再望埋佢副表情，呢一刻，我真心想一腳踢佢入個坑入面！不過，我亦都好好奇，點解我地第一次見，佢就想殺我，而第二次見，佢都仍然係想我死！
我明明係唔識佢架！點解佢要咁做！？
於是，生為好奇寶寶嘅我，就立刻大叫左一聲“等等！”，打斷左佢嘅發施號令！然後問
“我同你無仇無怨！點解你要置我於死地？”
聽到我咁問，佢就好似聽到一個天大嘅笑話咁，不斷響度大笑，同時亦邊笑邊話
“哈哈哈！你竟然問我點解！乜你家族嘅人無話你知架咩！自古姚家同你地秦家都誓不兩立架啦！唔止秦家！凌，柳，軒轅家嘅我地都唔會放過！哈哈哈。。。仲問我點解。。。”
聽到佢咁講，我正想開口講啲咩，點知呢個時候，軒轅皓佢突然企左起身行嚟我身邊，望住響度大放厥詞嘅姚魅兒冷冷咁話
“哦？咁我地就拭目以待啦！”
對於軒轅皓突如其來嘅出現，姚魅兒好明顯就嚇左一嚇，而佢嘅呢一嚇，就令到我覺得有啲莫名奇妙！
我心諗。。。既然你都知道我響度啦！咁點會唔知有其他人響度丫！？
莫非。。。佢響度做緊戲！？
其實，並唔係姚魅兒響度做戲，而係佢真係唔知道除左秦天晴之外，仲有其他人響度！
剛才佢之所以會知道秦天晴嚟左呢度，完全係因為佢身上果隻被小木魚所傷嘅蠱蟲！
正所謂仇人見面，份外眼紅！
果隻蠱蟲響秦天晴一進入祭壇範圍嘅時候，就已經感應到佢嘅存在！
於是，佢就馬上支會佢嘅主人—姚魅兒！希望主人可以幫佢報仇！所以，姚魅兒先至會響個大坑入面上番嚟搵秦天晴！
因此，姚魅兒直到剛才為止，都真係以為呢度淨係哩埋左秦天晴一個響度！
望住企響秦天晴身邊嘅軒轅皓，姚魅兒愕一愕然之後，好快就恢復正常！
但係，佢並無好似見到我果陣時咁嘅樣，而係換左副嬌媚嘅表情，對住軒轅皓嬌嗔咁話
“哎喲，靚仔！你幾時哩埋響度架！真係嚇到人地個心肝怦怦，怦怦咁跳丫！”
聽到佢咁講，再望下佢發晒姣咁嘅樣，我下意識咁望一望軒轅皓，想睇下冰山會有啲咩反應啦！
點知，佢居然對姚魅兒嘅神態視而不見，只係望住個地下淡淡咁講左句
“好快就唔會跳。。。”
好快就唔會跳。。。！？咁。。。咪即係咒佢死囉！
哈哈哈！我忍唔住笑左一下！皆因我真係估唔到軒轅皓會咁樣答佢！
不過，我笑嘅呢一下，就再次吸引番姚魅兒嘅注意！
佢一見我響度笑，就即刻對住我惡狠狠咁話
“你。。。你！笑咩丫笑！賤人！”，
丫。。。我摸摸個鼻頭，心諗
”洗唔洗變臉變得咁快丫。。。你性別歧視丫！？”
而呢個時候，聽到姚魅兒話秦天晴係賤人，凌嘯峰同凌嘯峻就忍唔住行左出嚟，對住佢一人一句咁話
“笑你咪笑你囉，洗比面你丫？”
“你呢副尊容，再加埋你所講嘅說話，好難令人唔笑架喎！”
就連秦天朗都緩緩咁走埋出嚟，然後好不屑咁話
“哼！媚功都未到家，仲敢拎出嚟賣弄！乜你家族嘅人無教下你架咩？”
哈哈哈！佢地把口真係一個比一個毒丫！不過，媚功。。。？乜東東？
“媚功？咩媚功？”我望住軒轅皓，有啲疑惑咁問
軒轅皓聽到之後，就答我
“姚家嘅另一個家傳秘法。。。 專用嚟色誘男人！再控制佢為自己做事！佢啱啱想控制我嚟對付你丫！”
哦。。。原來係咁！好一個收兵大法！好在軒轅皓佢無中招！如果唔係。。。後果就真係不敢想像！
姚魅兒眼見自己嘅媚功失敗，又聽到凌嘯峰佢地嘅冷嘲熱諷，惱羞成怒嘅佢，終於都忍唔住爆發！
“骷髏！同我上！男嘅同我活捉！我要拎嚟做人蠱！女嘅同我殺左佢！”
隨住佢嘅話音一落，骷髏大軍就向住身處響祭壇兩邊嘅我地殺過去！
我地即時令出武器嚟迎戰！不過我令嘅並唔係腰間果條九節鞭，而係褲袋入面嘅果叠符紙！唔止我，就連凌嘯峻都同我一樣係咁做！
因為，我地之前就已經對付過呢啲咁嘅骷髏鬼！所以好清楚咁知道一般嘅物理攻擊根本就傷害唔到佢地！一定要同時使用符咒攻擊，先至可以將佢地打碎！
於是，我同凌嘯峻就開始對住周圍嘅骷髏鬼出咒術狂轟！
“天地無極，風雷受命！雷降！”
“雷電之刃！斬！”
一道道嘅雷電瞬間向住周圍嘅骷髏鬼劈過去！發出劈劈啪啪嘅聲響！同時亦都響骷髏鬼嘅骨頭上面，產生左無數咁多道嘅裂紋！
而軒轅皓佢地見到呢個情況，就已經了解到我地咁做嘅目的！因此，佢地就專揀果啲經過雷電洗禮嘅骷髏鬼嚟打！同時，亦都響度邊打邊拉近我地雙方嘅距離！
因為，我地唔知姚魅兒會幾時出手！假如佢突然對我地任何一方出手嘅話，我地都會好危險！所以，我地必須要儘快咁會合埋一齊！而為左達到目的，大家都全力咁施展渾身解數！
凌嘯峰同軒轅皓嘅攻擊再次配合得天衣無縫！
“火焰槍！”隨住凌嘯峰佢大喝一聲，帶住火焰嘅長槍就馬上插入骷髏鬼嘅身上面！將骷髏鬼串成一串之餘，槍身上面所發出嘅烈焰，亦都將佢地身上嘅裂痕不斷咁擴大！
見到咁嘅情況，軒轅皓亦都施展佢嘅拿手絕技
“神兵火急如律令！飛劍！”
飛劍就好似一發子彈咁向住骷髏鬼打過去！令到果堆骷髏鬼完全咁粉碎！
而呀朗佢地果邊呢，雖然只有兩個人，但係身為特殊部隊嘅隊長同副隊長，又點會一啲本事都無丫！
只要凌嘯峻嘅符咒一出，呀朗就會拎住佢果兩把雙刀，向住呀峻所打中嘅目標出手！
佢不停響骷髏鬼堆中左穿右插！步點靈活，完全貫徹左雙刀嘅《葉裡藏花，雙蝶飛舞》嘅姿態！不斷咁將骷髏鬼一一斬碎！
姚魅兒望住班骷髏鬼遲遲都未制服到軒轅皓佢地，仲比佢地打到節節敗退！就決定自己親自出手！
佢趁秦天晴出完咒術，而其他人又忙住打骷髏鬼嘅時候，就將身上嘅蠱蟲，向住秦天晴一野咁彈過去！
蠱蟲以肉眼都難以察覺嘅速度，向住秦天晴嘅正面直直咁撲過去！而秦天晴佢本人，以及佢身邊嘅人，根本就絲毫都察覺唔到！
眼見成功在望，姚魅兒忍唔住笑起上嚟！不過，笑左幾下之後，佢嘅笑聲就戛然而止！
因為。。。佢所放出去嘅蠱蟲，竟然同佢失去左感應！
唔單止咁，佢面前仲忽然出現左個粉紅色嘅光球，向住佢一下咁撞過嚟！搞到毫無防範嘅佢，“哇丫！”一聲咁向後跌番落個大坑入面！
而與此同時，一把響亮嘅聲音，就對住大坑入面嘅姚魅兒，奶聲奶氣咁話
“哼！你個醜大嬸！居然又想欺負我娘親！”