秦天晴 — 有鬼 新章《畫》正式展開: 貓妖 — 第四章
我對軒轅皓點點頭，“嗯”左一聲表示知道了，然後我地就分開，佢地要去做野，而我就要上去睇王婆婆
上到去王婆婆屋企，我敲敲門，然後話“婆婆，我係天晴丫！我嚟睇你啦！”
等左陣之後，王婆婆同上次一樣咁出嚟迎接我，“Hello！後生女，你終於嚟睇呀婆啦！”王婆婆興奮咁話
我見佢除左要拎住支拐杖行走之外，身體上面並無損傷，個心都安心啲
我上前扶住佢，然後同佢講“婆婆，你唔乖丫！做咩話自己就快死丫！話左下次見要健健康康架嘛！”
婆婆聽到之後就話“你話嚟睇呀婆，呀婆唔知你幾時嚟丫嘛！呀婆驚你唔再嚟睇我啦！”
聽到佢咁講，我好笑咁話“人地而家咪嚟左囉！你睇下，我仲帶左山楂餅比你食丫！”一講完，王婆婆就成個小朋友咁即刻問我拎嚟食，仲食得好開心
之後，我一直陪佢傾計，傾到連個天慢慢咁黑落嚟都唔知，到發現嘅時候，望一望個電話，已經差唔多七點，就起身打算同王婆婆告辭，但係王婆婆一見我起身就捉住我隻手唔放，叫我食埋飯先走！
我諗一諗，如果而家走，得番佢一個響度食飯嘅話，佢肯定食得唔開心，咁就唯有陪多佢一陣啦！直到最後，我走嘅時候都差唔多成十點半了
我搭電梯落到街之後，就再次拎起部電話打開個google map嚟搵路，然後一邊睇，一邊行，但係行行下，突然覺得有啲怪怪地，但係又講唔出係咩怪。。。於是就繼續行，直到行左十分鐘之後，我終於知道有咩咁奇怪。。。
點解。。。周圍一個人都無嘅。。。？
要知道，屋邨入面總會有啲公公婆婆鐘意夜晚走出嚟公園行下坐下，又或者會有啲青年響度周圍走，再唔係都一定會有啲夜歸嘅人番屋企！根本無可能行左十分鐘連人影都無個，甚至安靜得連聲音都無！
我決定打開陰陽眼睇一睇！結果。。。竟然連鬼影都無一隻。。。
呢個情況令我傻左咁企響度，而腦海中忽然諗番起軒轅皓果句。。。“我地響度做緊野，如果無咩事嘅話，唔好留響度，快啲番屋企！”
原來佢係想提我快啲走！？
可惜我而家先領略到好似已經太遲了。。。咁嘅情況我應該點做。。。繼續行。。。？定等人經過！？
我諗左一諗，既然軒轅皓響附近做緊野嘅話，佢一定知而家咁嘅情況係咩一回事，與其我自己亂咁走，不如問下佢意見仲好！所以，我決定打電話比佢！
我打開聯絡人電話簿，搵到軒轅皓三個字，按撥出！ “嘟。。。嘟嘟。。。” 拜託！軒轅皓你一定要聽電話丫！如果唔係我可能要企響度企天光啦
等左陣之後，“秦天晴？”耳聲傳來軒轅皓冷冷嘅聲音，我頓時安心了
我直接咁問“軒轅皓！我響條村入面，一個人都見唔到。。。連鬼都無隻。。。點算？”
點知我一講完佢就瞬間爆發咁話“Shit！你點解仲響度！！？你而家響邊？企定定等我過嚟搵你！你千祈千祈唔好走開！”
聽到冰山爆發，我愕一愕然，然後弱弱咁話“屋邨公園。。。有個搖搖板。。。同氹氹轉。。。”
“等我！”講完呢兩個字佢就收左我線
於是，我就乖乖咁企左響度等佢，但同時亦都響度諗，如果能夠令冰山緊張成咁嘅話，咁呢度肯定係發生左好大件事！諗到呢度。。。再望下周圍嘅環境，無限嘅恐懼感響內心度不斷咁產生！我警惕咁望住四周，驚隨時會有啲咩出嚟襲擊我！
突然，我身前嘅花圃度有啲野響度郁郁下！我即刻握住裙袋入面張符紙，準備對呢個不知名物體進行攻擊！而當我全身都進入戒備狀態嘅時候。。。佢竟然郁郁下就無再郁
雖然對方突然停左落嚟，但係呢一刻，我一啲都唔敢放鬆，反而緊緊咁盯住果個位置！因為我怕一放鬆嘅話就會令到自己陷入萬劫不復嘅地步
果然！“噗！”一聲，有野向我撲埋嚟，我即刻退後一步！同時，己經準備好將手上嘅符紙飛出去！
就響呢個時候，對面個物體突然“汪”左一聲，我隻手頓左一頓，而呢一頓，足以令我睇清楚前面嘅物體究竟係咩嚟，竟然。。。係上次隻狗仔！？
我眼定定咁望住前面隻狗仔，因為我好懷疑佢到底係咪真係一隻狗，通常響呢啲咁怪異嘅情況，突然出現一樣你認識嘅野，點睇都係覺得唔正常！所以當佢一步步走近我嘅時候，我本能咁一步步向後退
直到我退無可退，背脊已經貼住牆壁嘅時候，佢終於都作出行動！趴底，轉身，四腳朝天！然後。。。一邊“嗚嗚”叫一邊響度滾來滾，仲帶有哀怨嘅眼神一直咁望住我
唔知點解我見到佢好似小朋友瞓響地下度扭計咁嘅樣，忽然有一種罪惡感渾然而生。。。
丫。。。好吧。。。我唔應該去懷疑你。。。
我踎低輕輕咁對佢叫左聲“為食狗”，佢即刻從地上彈起，然後跑過嚟用頭係咁磨我隻手，我比佢搞到忍唔住笑左出嚟，但係呢個歡樂嘅氣氛維持左十秒都唔夠，就被一把男聲打破了！
“救命丫！！！！”一道求救聲突然響起！我被嚇到成個人彈起身，而第二下求救聲亦隨即響起
“救命！！！救命丫！！”
突如其來咁聽到有人救求，救人深切嘅我瞬間忘記左軒轅皓嘅叮囑，立刻沿著聲音嘅方向跑過去，而我跑過去嘅時候，把聲嘅主人叫得越嚟越歇斯底里！
“救命丫！你走開丫！！！”
就響我越嚟越接近聲音源頭嘅時候，為食狗突然衝去我前面攔住我，同時發出一陣陣低沉嘅“咕咕”聲
我焦急咁同佢講 “狗狗，快啲行開！！”但係無論我向左行定向右行，佢都一樣咁攔住我唔比我過去
而呢個時候，求救者發出左響亮嘅“哇！！！” 一聲！
我即刻唔理得咁多！兩手一伸，一下抱起左隻狗仔就向前衝過去！而當我跑到去轉彎位嘅時候，我見到一個令我畢生難忘嘅畫面！
一個人。。。。同一隻野獸！