第四十六章--聖盃戰前夕(一)

「聖盃戰?為左爭奪聖盃既比賽?」真鳳對於這一個陌生的詞彙產生了好奇。

斯龍只是一笑,就望向明鋒,示意由他作出解釋,明鋒亦沒有露出什麼麻煩的樣子。「聖盃戰係九大組織一同舉辦,四年一次既比賽。而所謂既聖盃,唔係指一個確實既盃,而係指九大組織會議中,主席既位置。亦即係,邊一個組織係聖盃戰勝出,該組織既會長,就係下一任九大組織會議既主席。」

「即係可以見証住世上最強既九人互相對戰!」真鳳雙眼彷彿露出了充滿期待的目光,能夠見到如此高手對戰,定必可以從中獲益良多。他的面上彷彿刻著興奮二字。

明鋒乾了一杯生果汁,再繼續說著。「聖盃戰,九大組織會長都唔會參與。」真鳳聽到這一句,那張面孔就突然硬化起來,那雙眼中的期待一掃而空,興奮二字隨即如塵埃般被清風吹得一乾二淨,只能夠呆望著明鋒。真鳳的反應令執劍其他人都不禁笑起來,小冰更笑得兩頰通紅,二人對望之後,小冰眼中的溫柔彷如秋水般湧向真鳳心中。





明鋒沒有理會其他人的笑臉及空氣中曖昧的氣息,只是目無表情地向著像是發呆的真鳳說著:「每個組織都會派出三個二門者作為一隊應戰,每場初賽都係一隊打一隊,目的係搶到對方身上既勾玉,每搶到一個勾玉加一分,每被搶走一個勾玉扣一分,隊伍可以隨時投降。十個鐘後計分,高分則勝。如果分數平手,兩隊都會直接當輸。主席隊伍可以免卻初賽,直接進入決賽。而決賽就係五隊混戰,同樣需要搶到對方既勾玉。唔同既係,三個人其中一個身上既勾玉係紅色勾玉,其餘兩個係藍色勾玉。紅色勾玉代表三分,藍色勾玉代表一分,同樣搶到加一分,被搶扣一分,一星期後結算,高分則勝。如果有隊伍同分,隊伍就會進入初賽既區域進行最後決賽,無限時間,三個人之中只有一個身上帶有勾玉,只要搶到對方勾玉就代表勝利。」

真鳳才開始有點明白這個聖盃戰的模式,之後就帶著一點疑惑問道:「咁聖盃戰,有冇咩規則架?」

「唔可以殺投降既人,除此之外,無任何規則。」明鋒越是沒有表情,真鳳對這一句就越感驚訝,甚至有一點毛骨悚然。

「一場賽事,得呢條規則?即係,其實聖盃戰係鬥獸場,打到死為止?」真鳳望一望執劍的其他人,其他人都紛紛輕輕點一點頭,彷彿他們都見証或聽聞過這個名為聖盃戰的比賽。只不過是把門者都當作棋子般,放在棋盤上玩弄,只為他們的權力及地位的鬥爭。

「係。兩次聖盃戰,多數都係至死方休,否則你認為點樣可以係一個門者身上搶到勾玉?就只有殺死佢。而每負一分,組識就要比五億美金出黎。每多一分,就可以得到五億美金。投降就直接當作所有勾玉被人搶走。真鳳。」





「係?」真鳳初時以為聖盃戰是各組織鬥快爭奪到一個聖杯樣物體的競賽,結果又是一個以生死相搏的世界。心中不禁想著,到底這個門者界是多麼的殘酷,多麼的現實,為什麼人就不可以擁有更大的器量,包容別人,尊重別人,既然擁有更多,就應付出更多。

「如果你想知更多,你可以選擇去睇下有關既資料。」明鋒又再次目無表情地指向那基地內的小型圖書館,雖然他沒有介意一直解釋,但總覺得真鳳應該靠自己知道更多,找到更多資料。

「呀...我呀...咳咳。我會架啦。」真鳳這句說話簡直難以說服別人,無論是語氣或表情,真鳳不是一個說謊的材料,明鋒亦只是點一點頭作為回應。

「聖盃戰,我打算以小倩、殘影同風仔出去應戰。聖盃戰選手條件係二門者或以下,但只限於初賽之前。殘影,風仔,你兩個都係高階二門,希望你地可以係比賽之中,突破三門,咁樣對你地既勝算多好多。小倩,你要作為全隊既眼睛,連接佢地精神溝通;殘影,你唔可以再繼續再咁衝動,要冷靜行事;風仔,三個之中你最冷靜,所以你要作為全隊既大腦。」斯龍一面認真地說,帶同所有人都慢慢認真起來。「哈哈哈,不過生命係最重要,萬一真係遇到生命危險,就直接投降啦。錢,我完全唔在乎,我只係唔希望會失去你地任何一個,哈哈哈。」再次豪氣地大笑的斯龍,令其他人都慢慢放鬆起來。斯龍不只是執劍中最強的人,更是連繫著他們的一個人。

斯龍在,執劍在。





「總監,你想做主席嗎?」殘影突然問出這一個問題,而這一個問題亦令全部人再次望向斯龍,能夠在會議上做主席,的確可以令推行議案難度降低。如果斯龍要改變門者界,就一定要走上主席之位。

「哈哈哈,如果可以係你地唔死既情況之下,我。」斯龍就彷彿故意在此停頓,吊一吊他們的胃口。斯龍閉眼輕輕一笑後,就望向所有人的面孔,他們都期待著斯龍的回答。

當中只有明鋒沒有任何期待的表情,他一開始就知道斯龍想改變門者界,但他只有一道頂天立地的豪氣,和一份堅定的信念,明鋒就是被他這種特質所吸引,希望一直能夠在他身旁,輔助他,因為明鋒相信,單憑豪氣,是沒有任何可能可以改變世界,至少,不能改變其他八個中階三門者。

「想!我只希望呢個世界會走向真正和平,而唔係眾人係各自背後勾心鬥角,爾虞我詐,透過呃或威脅而達到自己目的。雖然只係一個幻想,夢想中既烏托邦,不過我都好想可以盡我能力去做。或者到最後,我見証唔到呢個時代真正既來臨,但我都希望你地可以,或者未來既一代可以。」

「要改變門者界,就只有企到最高,無論係文或武。但如果以武服人,唔係長久既辦法,再者,我亦無呢一份力量去挑戰八個中階三門者;但如果以會議訂下既規則去限制,就可以長久去令門者界慢慢改變,一代接一代,一代傳一代。」

「用武力去訂主席既位置,實在太唔公道,不過我無辦法改變。你地唔係我既棋子,你地係我既同伴,係我願意以生命相換既親人。我只希望大家,能夠以執劍為榮,以執劍作為自己既驕傲。」

斯龍豪氣一笑,自己苦笑著,搖一搖頭。「哈哈哈,我果然唔係咩領袖材料,我自己都唔知自己講緊咩,諗到咩,就講咩。哈哈哈!各位,同我一齊,一齊去改變呢一個世界!」