《90後銀行小妹甩轆記》: 《比ATM機食錢你會點做？》

以下為比ATM機食錢後的錯誤示範：
 
 「哎呀！我頭先㩒完錢唔記得攞！」
 
「點算呀？點算呀？」
 
今日有個女人喺分行櫃員機㩒完錢唔記得攞，然後就不停喺度做人肉播音機。
 
佢首先搵咗A字膊同事，但A字膊同事好順理成章地卸咗佢比我：「你幫佢填ATM嗰份form啦。」咦？大家明明同grade，點解會係我填？不過老闆成日話做嘢唔好咁計較，咁好啦，我填啦。
 




我一邊填一邊問番佢事發經過，頭幾秒都冇乜嘢，但當佢問筆錢幾時先會入番户口時，我答最快要3至4個工作天，佢就發癲啦⋯⋯
 
客：「無可能㗎！唔係會即刻reverse架咩？！」
 
我：「筆錢會比部機食番，師傅會定期開機埋數，而家幫你填表，之後對番report，只要同份表的資料match到，筆錢就會入番你户口，因為牽涉不同部門，所以需要一啲時間處理。」
 
客：「我頭先問咗你哋高層（吓？咁快搵高層嚟壓我？），佢話會即刻reverse，即刻入錢㗎喎，而家無攞到錢都扣左數，點解會咁架，一定係有人拎左，你即刻幫我check CCTV，我要報警啊！」
 
我：「可以幫你同入面講check CCTV，請等等⋯⋯」（的確係有機會比人拎咗，但點解要信個離地高層講嘅嘢呢，佢地無做operation好耐啦喎⋯⋯）
 




之後⋯⋯
 
我：「佢地睇緊CCTV，不如我繼續幫你填表，如果見到筆錢呑左入櫃員機，可以幫你遞表。」
 
客：「而家個數扣咗，我無攞到錢啊！一定係比人攞咗㗎！」
 
我：「呢個要睇閉路電視先清楚，如果真係見到有人拎咗錢，建議小姐報警處理。」
 
客：「我而家入嚟銀行你唔幫我，你仲叫我報警？你知唔知你咁講好大獲架！我都係做銀行，你BM(老闆)知道咗會好嬲，我要見你supervisor！」小姐，頭先明明係你自己話要報警㗎喎，仲有，原來你係同行！同行何苦難為同行呢？
 




無辦法，唯有要勞煩我個經理岀去KO呢個麻煩友。但究竟真相係點呢？
 
事後，其他同事話見到個小姐一邊講電話，一邊講咗句「我而家㩒緊錢啊」，然後就目送筆錢呑咗入部機，拎都拎唔切。哦，明哂，都知世界上邊有咁多Jessica C.啊！
 
（特別鳴謝［阿仔］分享經歷，內容經銀行小妹編輯）