<明明係黑社會，我就同老婆講自己係臥底>: 第一回
是咁的，我叫Billy仔，我就係電影入面成日出現既老土情節中一位小人物－細細個係屋村波地踢波，讀中五果年，有一日係波地被人踢左入會。
老實講，我知道自己唔係讀書既材料，又唔打得又唔睇得，雖然話係俾人踢入會，但我唔撈偏都唔知撈咩好，所以其實唔係黑社會揀我，係我揀黑社會。
係江湖打滾左十幾年，都係浮浮沉沉咁，直到兩年前開始跟左阿森爺，當初都只係諗住做下散仔可以搵到兩餐，後黎森爺見我手車唔錯，又有ｄ小聰明，所以就放係佢身邊做下跟班，我以為自己會就咁過一世，誓估唔到果一晚，同老婆講左一句說話，搞左個大頭佛出黎．．．
有一晚，同班兄仔食完宵夜，飲到有少少醉意番屋企，一開門就見到老婆。
我老婆個樣同身材其實唔錯，講真，娶到佢算係我執到，不過佢就有Ｄ港女性格，講野同諗野又周不時ｏｎ九９咁，所以我都唔帶佢出去見我班兄弟，廢撚事講錯野啦。
我老婆今晚又唔知做咩，見到我番黎，個樣又面燶燶．．．
屋企得我地兩個人，唯我就放下身段，狗衝咁撲去老婆側邊：「Boey，今次又係邊個激親你呀，等老公鍚番～」
老婆並無正面望住我：「Billy．．．我地．．．我地都係算啦．．．」
我一面無奈：「老婆，又做咩事呀？好地地，算咩姐？」
老婆突然發晒老脾：「你睇下你似咩，我跟你咁多年，你就混混噩噩左咁多年，我想我既男人可以有一番作為呀！」
一聽到佢咁講，我都嬲嬲地：「做咩姐，你跟我果陣時就知我係咁架啦！」
老婆：「Come on Billy，成熟ｄ啦，以前係我傻，諗住跟個古惑仔可以好威，但宜家咩時代呀？你出去同人講你行古惑，人地都笑你老土啦！
你知唔知呀，琴晚我同班姐妹食飯，佢地話果次英爺落區見市民，係電視見到成班金毛阿叔，問你有冇去幫手撐下場，又問你地收左幾多錢．．．佢地仲話，ｄｕｍｐ膠樽果個細路個樣好似你，問係唔係我地個仔，佢地一路講一路笑，搞到我幾瘀呀！」
頂你個肺，又係你果班八婆姐妹！
我：「Boey，宜家係唔係人地講幾句，你就要搞到咁大件事先！？」
老婆：「Billy，你都仲係唔明．．．唔關其他人事呀，係你，係你唔明個時代已經唔同左，你就好似一部Nokia，但宜家已經興Sam鬆！」
我：「屌，講咩呀，我自己都用緊唉ｐｈｏｎｅ啦，咩Nokia呀？」
老婆：「總之，我係你身上，睇唔到有將來，你問下你自己，幾時有做過台好戲俾人睇？」
我感覺到，Boey今次真係講到好絕，似乎依段感情已經無得救．．．
正當我想放棄之際，我見到茶几上放左本八掛雜誌，封面寫住「Laughting哥接拍第三集．．．」
可能因為有少少醉意既關係，可能因為唔想無左Boey，唔知痴撚左邊條線，我捉住Boey，好認真咁講：「老婆，你聽我講，我唔係你想像中咁架！！」
老婆一手推開我：「算罷啦Billy，你裡裡外外我都好清楚，我並唔係一時意氣先提出分開．．．」
我：「你就係唔明！我．．．有ｄ野，我一直都無同你講，我．．．」
老婆唔耐煩咁問：「你咩姐？」
我好激動咁再捉住老婆：「我．．．我其實係．．．係一個警察！」
飲醉左酒，真係咩撚都講得出．．．咁撚樣都講得出
勢估唔到，老婆第一個反應唔係笑９我，而係認真咁問：「你．．．你講咩話？你講多次」
唔撚係下化！？咁撚樣都信！？ 睇黎佢真係睇無記D低能劇集睇到上撚晒腦．．．
但唔講都講左，如果宜家同佢講我只係9up，就真係咩霸氣都無撚晒，唯有繼續吹落去：「我話．．．我係一個警察．．．應該話，我係一個臥底，為左掩飾身份，我一直都無同你講．．．」
老婆半信半疑：「你講真既？你係臥底？」
我眼都唔眨一下繼續吹：「係真架Boey．．．你記唔記得呀，兩年前我本來跟開大佬B，後黎先跟阿森爺，你都有睇果d臥底戲架啦，只有臥底先會成日換大佬之ma，拉完一個大佬，我就跟第二個lor．．．」
老婆：「之不過．．．我記得，你話阿大佬B心臟病發死鬼左，你先轉去跟阿森爺架wo．．．」
我：「咪．．．咪就係因為大佬B發現左我係臥底，激氣到心臟病發死鬼左lor！．．．仲好講，果次幾撚驚險，好彩佢死左先無俾人揭發我係臥底咋！」
屌你，真係唔到我唔佩服自己，我唔去做果ｄ寶藥黨真係浪費人才．．．
老婆就由厭惡既眼神，慢慢轉為仰慕：「咁．．．咁即係話，你就好似無間道入面果個朝偉？」
我：「咪．．．咪臭係好似佢咁lor～」
老婆：「依！衰鬼～～～做咩唔一早同人講wo，搞到人地誤會左你咁耐，我就係一早知你唔係咁簡單架喇～～」
好耐都無見過個衰婆咁貼貼服服，開始連我自己都以為自己係臥底：「傻豬，你真係睇得Laughting哥睇到傻撚左，以為真係有人會做臥底做到周街都知，都仲可以繼續做臥底．．．我既身份好危險，我唔可以連累你架，Boey」
老婆抱實我：「老公豬，你好Man呀～」
我：「呀呀！痛，好痛！．．．」
老婆：「咩事呀老公？你隻手掌做咩事咁紅既？」
我：「無．．．頭先同班兄弟．．．即係果班壞人呢，同佢地打邊爐，唔小心熝親隻手，起晒水泡．．．」
老婆：「陰公豬呢！你咁樣唔得架，等我幫你包紮啦！」
果衰婆好耐都無咁好服侍，雖然幫我包紮包到成隻糭咁，但見到佢咁細心，當堂成條氣順番晒。
包紮完之後，Boey仲主動同我講：「老公呀．．．我地好似好耐都無．．．無咩過啦．．．今晚不如等我服侍你啦．．．」
衰婆，宜家做臥底真係馨香d架咩！好，就調教一下你！
就係咁，果晚Boey坐係我身上，合埋雙眼，好努力咁搖曳，我望住佢果個咁enjoy既樣，我都好high，咩臥底咩警察，我已經完全拋諸腦後，我當然知道，大話始終都係大話，
但唔撚理啦，過得一日得一日，話唔定我聽日就中六合彩，到時就可以用佢傻婆講我完成任務，要移民重新生活呢！
成個過程，我都俾Boey做主動，而我就好好咁享受依一刻，唔知係因為酒氣未散，定還是我high到有幻聽，係Boey搖曳既時候，好似叫左一聲「朝偉」．．．唉，事撚旦啦，嗚呀～～～
咩完之後，我就訓著左．．．誓估唔到，琴晚９吹左一大輪，會為自己帶黎殺身之禍。
第二朝早，森爺個得力助手豪哥打俾我：「喂，Billy仔，今晚有大茶飯要搞，一陣大家先上去鐵館集合！」
我：「大茶飯？咩大茶飯呀豪哥？」
豪哥：「你咪撚問咁多啦，一陣集合你咪知lor。」