《每個人點都要食一次檸檬》: 曖昧

去到後尾，西西都係一句野都無同我講過，直到放學，阿門。

我平時放學都會落街場打下波，打到夠鐘，天黑，學校關門，先捨得走。

我去更衣室吹下風扇，同班波友吹下水先走，一出黎，已經天黑了。

反正我屋企人又唔管我，正確黎講係管唔到。

但我一出學校門口，就撞正西西。



我好驚訝，下？咁夜佢仲係度？我個腦海中閃過無數既可能性。

「咦，咁夜仲未走既？等緊我呀？」我試探下佢。

「唔係呀！」佢講完就走左去，望都無望過我。

哈哈哈，見到真係幾好笑下，佢岩岩個表情超正！超可愛。

我心情大好，追上去，捉住佢隻手，呀，係拉住佢先岩。



「做咩姐，咁夜啦，我送你返去啦，你都係住附近姐。」我試圖安慰佢。

點知完全無用，「唔洗你送呀！」佢發曬脾氣咁。

我拉佢過黎我果邊，要佢對住我，面對面咁講清楚。

「好啦，唔好嬲啦，搵我咩事姐，你成個下就無同我講野。」我平心靜氣咁講。

「咁我果陣真係唔開心同嬲呀嘛。」佢終於肯坦白。



「咁咩事唔開心呀？」我望住佢。

「明明你肯努力就做到，你做咩唔肯俾心機姐？」佢講到有d委屈咁。

「咁我真係無興趣讀英文呀嘛，無興趣既野點做都無興趣架啦。」我斬釘截鐵咁講。

「我唔理，之後放學你都要留低同我學英文！」

「下？咁咪無得打波囉？」我第一時間都係諗起打波。

「打波緊要d定學野緊要d？」佢反問我。

13歲既我，答佢，打波！

但原來23歲既我唔會咁樣答...



人真係會變。

無論過去點美好，幾開心都好，依家係我身邊既，都未必係你。

但係依家既我邊有得反抗，人地都咁為左著想，係度等左我成晚。

「係啦，唔好嬲啦，我會跟你學好d英文架啦，好無？」我用輕鬆既語調去講。

「你係先好呀。」佢兇我。

其實我地真係識得唔係好耐，前前後後都係一個月度姐。

但就好似識左好耐咁，相處既時候又唔覺得尷尬，好舒服。



反而同晶婷相處起黎就好尷尬，因為我會諗起李sir。

一諗起佢，就咩感覺都無，連同佢講野都覺得吃力。

（中一既我，無意識到呢d係咩黎。

如果我早一點意識，早一點珍惜。

我地就會唔會…唔會搞到今時今日呢個田地？）

「緊係啦。」我信誓旦旦咁講，「係呢，話時話你又肯等咁耐既？」我低一低頭，斜斜地咁望住佢，用認真既語氣問佢。

因為我知道佢係好關心我，想試下佢姐。

「無呀，我等緊一個承諾姐。」西西佢用力咁合埋個口。



女仔講野真係好含蓄既姐。

果一晚，我覺得我好似有d鐘意左佢咁。點解？

因為果晚，我覺得好溫馨，有d 甜蜜既感覺。

細細個已經會鐘意人架啦，自己都明白鐘意人係咩感覺咁。

就好似鐘意玩具咁，鐘意打機果種感覺咁。

成日做都唔會厭，依家對西西唔會討厭，反而想親近多d。

中學既時候，我知道咩係鐘意，但去到大學甚至更遠既時候。



我先真係明白咩係愛一個人。

果晚我係送佢返屋企既路上，一路都有講有笑，好開心。

真係好單純咁樣開心，無其他原因，就係開心，因為一個人而感覺開心快樂。

自從打開左西西心扉之後，佢對我好似毫無保留咁。

但佢對其他人又唔會咁熱情奔放，始終會保持住一段距離。

我好慶幸可以同到佢坐，如果唔係我只係佢保持距離既其中一個。

我到依家都好記得，果一晚我返屋企既時候，就已經係度細細回味頭先既果一段時光。

唔知你地會唔會，同心愛既人一齊，然後返去既時候，不停回憶起頭先開心既位。

講真，我好想果一part開心位不停loop，不停重複又重複。

第一次有女仔係學校門口等我，真係好驚喜，果一份對你既重視呃唔到人。

係果個手機無上網既年代，默默咁等你一兩個鐘，真係唔係咁易。

真係越諗越開心架，係巴士上面，聽住歌，然後諗起岩岩既事。

幸福，不過如此簡單。

一邊望住巴士窗外既風景，一邊諗起大家都開心既位，就會忍唔住自己笑左出黎。

成個傻仔咁，好彩巴士上面無咩人姐。

但呢d真係中學生應有既權力，因為擁有單純而感到開心既自己。