《每個人點都要食一次檸檬》: 不知不覺(上)

不過我未接觸佢，我仲未會落定論既。

佢身邊果d八婆我都係事後先至知，不過婷婷就唔覺得有咩問題，呢下先死。

好唔容易黎到中午，12點20分放飯，12點40分就可以出課室，周圍去玩。

我就同班fd 40分已經沖左落去打下排球呀籃球咁。

但中午落去打波真係好向左走向右走熱，烈日當空，曬到頭頂都熟埋，水煮龜頭咁款。



我後尾頂唔順返左去課室，去涼冷氣。

一返到去，課室空空如也，無咩人咁制，應該都係出曬去啦。

西西又唔係度，婷婷同果班女就圍埋係度吹水。咁又係既，西西未融入度，應該成日都自己一個。

依家諗落又覺得佢幾可憐下，我份人鋤強扶弱既，我都唔想佢咁可憐。

但依家又搵唔到佢，一陣撩下佢傾計先得。



Hi，課室既冷氣仲慘過d風扇，一d都唔涼。

於是我沖上去圖書館度涼冷氣。

去到圖書館，要簽名，簽完名就經過d圖書櫃呀之類既，因為係入面有沙發坐，好舒服。

一去到個沙發，發覺俾人坐左。無錯，無第二個，正是西西。

西西見到我，有點愕然。但愕然完就繼續睇佢既書，完全無打算理我既理由。



「喂！乜你份人咁無禮貌架？見到人都唔打聲招呼既？」我扮嬲咁講。

「噓！」佢比左個叫我收聲既手勢，「呢度圖書館黎架，有咩咪返去講囉。」可能我大聲得制，我自己講野大聲左自己都唔覺架。

但佢見到咁大聲同佢講野，對我都柔弱返，態度唔再強硬。

「做咩上左黎既？」我調低返個聲線同佢講。

「反正我都無咩野做，咪上黎hea下囉。」言語間，都感到佢孤單既心酸。

佢繼續睇佢手頭上既果本書。唔知點解，我就係唔想佢再孤單一個。

我偷睇下佢睇咩書啦。《三分球神射手》？佢會睇呢d咁既書？我忍唔住，細細聲咁笑左下。

「喂！笑咩姐！」佢啤一啤我，擺明係話俾我知，『有咩好笑呀？』既意思啦。



「無，我估唔到你會睇d咁既書姐。」我輕鬆咁帶過嚴肅既moment。

「咁...如果唔係你覺得我會睇咩書呀？」佢反問我。

以我果陣時知識，對書既認知實在有限。「Um....Q版特工啦，又或者係君比既叛逆歲月囉。」我正係識呢d炸。

「我先唔會睇呢d無營養既野，呢本好睇呀！」佢對眼好似發光咁，呢本書真係咁好睇？

睇書?估唔到佢會鐘意睇書，而且又咁岩鐘意我果類，打波既書。

搞到我都有d興趣想睇下添，但我見佢係睇緊第三集，於是我就問，「第一集呢?」

「下?你又想睇?」佢嘟起個咀問我，我都唔明點解要嘟咀，可能無意啦，但咁睇落的確係幾可愛幾吸引。



「係呀，我都鐘意運動既，咪睇下囉。」「

點呀，係邊姐?」我見佢微微咁笑左一下，睇黎佢係開心左既。

唔知點解見到佢開心，我又會開心，可能覺得自己幫左人咁啦。

「係你前面果兩個書架姐，自己去揾啦。」佢指俾我睇。

跟住我就走去揾果本書，其間我都會望下佢，睇下佢有無望下我咁。

雖然係好低能，但始終都係忍唔住，睇下係咪好似呀雄咁講，佢係鐘意我。

我見到佢好專心咁睇緊書，一眼都無望落我度。不過由佢既，遲下仲有機會證明既。

定還是只係我諗多左呢?我又唔想承認呢個事實。揾到啦!揾到第一集。



佢既封面殘殘舊舊咁，確係幾難令人望得上眼，如果唔係佢介紹我睇，我都未必會睇。

跟住我就返去佢隔離坐，我地無傾計，好專心咁睇書。

估唔到一睇就上左癮，因為佢寫到打波好似打功夫咁，好鬼過癮，我完全俾佢吸引住，一邊睇文字，一邊幻想到果個畫面，好似睇緊電影咁。

唔經唔覺，我地睇到鐘聲起。「返去上堂啦。」我摺一摺隻書角，合埋本書。

「喂，唔好摺埋個書角呀，咁樣會好傷本書架。」佢不滿我呢個行為。

「下?」呢樣野我真係第一次聽。

「咁唔摺既話，應該點呀?」佢拎起佢本書，打開俾我睇，入面有張書籤。佢對我笑一笑，露出佢既牙cool，的確笑起上黎唔係咁好睇，所以呢次我都係第一次見佢露齒笑。



估唔到佢之前都係微微咁笑，依家笑就唔同曬?因為我一直盯住佢個牙cool，佢先意識到d野。

佢即刻合返埋。然後就走左去借書。

我地一齊行返去課室，沿路我都有同佢講下野既。

「頭先唔該曬，我之後會用返書籤架啦。」

「唔洗客氣。」佢又回覆返頭先既冷淡。十成九係尷尬啦覺得。

「但我又無書籤喎，咁點算呀?」預左俾佢串架啦。

果然﹗「自己去買囉﹗」佢望都無望到我。