對於男神呢個身份,我好珍重,亦都唔會諗過要濫用,因為我對愛情仍擁有希望,信心。其實當我應承Vincy話要去一齊食野,某程度上都叫做利用左佢,因為我要做一個實驗,究竟我做男神既時候,同女仔相處,尤其是係女神級既女仔,唔知能唔能夠駕馭到,不過經過琴日既實驗,一切都好順利,睇黎對住穎心都可以用同一種方法,隨和,好似平時咁就無問題。

「好飽啊。」Vincy難得有真性情流露,話自己飽,都嚇我一跳。

「不如我地走啦,都夜啦,呢到返馬鞍山都幾耐下。」雖然我地去左貓cafe,但係都無乜點同啲貓玩,只係影左幾張自拍,係幾張相到,都覺得自己幾上鏡,仲有啲明星相。

「好啦。」到埋單既時候,雖然我變左做男神,但係小家呢個壞習慣真係累事,搞到我好忐忑,不過算啦,唔請食飯又真係衰仔左啲。

「我埋得架啦,你著返鞋出去等我啦。」





「嗯。」



出到街上面,Vincy企左係到,唔通佢漏左野?

「做咩?...」唔,點解咁主動既,我咩都諗唔到,從前對錫好多既幻想,而家實現既時候,感覺截然不同。

「多謝你。」原來女神多謝人就係鍾意錫人做回報,咁都幾好喎。雖然Vincy係靚,但係我唔可以動心,因為我個心仍然要放得落穎心;穎心,睇下我幾慘,為左你,我比人強吻,都係為左你架咋。








「唔洗,男仔請食飯應份。」

「唔係啊,我話你今日肯陪我,好多謝你。」原來係咁,我真係樣衰到爆,原來我仲記掛住埋單呢樣野,真係死性不改。

「哦,好啦,夜啦,我地搭車走啦。」

係車上面,雖然無乜人,但係無大家想像既情節,Vincy無挨落我到訓覺,我地無手拖手,佢只係成程車都望住窗外,我就係玩電話。








差唔多十點幾,我地先返到屋企,我whatsapp Vincy,問下佢返到屋企未?

「Vincy,你返到屋企未?」

「返到啦,準備沖涼,你呢?」

「我都返到啦,好攰。」

「你都快啲沖涼!今日成陣臭汗味,唔沖涼唔準訓覺!」

「我就唔沖,奈我咩何。」





「好囉,你唔好沖涼囉咁,下次唔會同臭人出街!」下次?嘻嘻,睇黎Vincy都幾享受同我出街。

「講下咋,而家即刻去沖涼得未?:)」

「算你啦。」




其實沖涼既時候,真係最令人清醒既時間,可以思考人生,究竟我而家鍾意穎心定Vincy?唉,諗到個心都亂晒,穎心?Vincy?

「穎心,聽日得唔得閒?」本身Vincy約左我聽日去街,不過我話有功課未做晒,所以就婉拒左佢。

「做咩?我得啊。」





「相約你啫。」

「哦,今晚再講。」

到左夜晚,我都係無收到穎心既回覆,我諗,佢應該唔記得左,又或者唔想赴約。

「Sorry,聽日陪唔到你,約左其他人。」心情真係有啲灰,究竟穎心約左咩人呢,男仔?男朋友?點都好,而家既我只係一個朋友既身份。




難得今日放假,自己去左旺角行下,但係又唔想同Vincy出街,因為我驚佢會鍾意我,更加驚自己會鍾意佢,而放棄穎心,所以委屈都要委屈下,靚女都無情講。

「一碗叉燒拉麵,清酒。」一間後巷既日本餐廳,因為朋友介紹先識黎,唔係既話,都唔覺呢到會有間餐廳。





我好怕係街上飲酒,不過今日唔知咩事,可能心裡面鬱悶,想借酒消愁,飲清酒飲到個頭痛痛地。

「先生,洗唔洗幫你叫的士返去?」

「唔洗,我住得好近。」無端端同人講左個大話,明明自己住係馬鞍山,但係呢到係旺角。




「咦,咁熟面口既?」係後巷,加上我迷糊既意識,已經唔知自己見到既野係真係假。

見到一男一女,個男係到強吻個女仔,女仔完全無力反抗,而我見到既好似係穎心。女仔不斷想甩脫個男仔隻手,男仔將女仔逼到牆上,捉緊雙手,然後在黑夜中放任。

我?花生兩碟。而且我咁醉都唔知前面情況究竟係點,亦無力幫助個女仔,只遺憾個女仔遭遇太差。








第二日返學,我當然遲到,琴晚成隻醉貓咁,今朝沖埋涼先出門,仲發現Vincy有whatsapp我,但係我無睇到。

「早晨啊,穎心。」我放低書包,令轉頭望住穎心,發覺佢臉上毫無喜色,跟有比人刮打既痕跡。

「早晨。」哇,點解沙聲沙到咁既?去完演唱會黎?

「你無野阿嘛,做咩今日咁奇怪。」

「無野,上堂啦。」

佢雙手疊住,好似遮緊啲野咁。我慢慢撥開佢隻手,見到全部都係傷痕。

「喂!」佢將立即雙手放係裙上,唔比我睇。

「做咩傷晒架?」

「無野,琴日跌親啫。」哈,你以為你可以呃到一個社工咩?見到你迴避眼神,都知道你講緊大話。

「真係?」

「呃你做咩。」咪住,唔通琴晚個個真係穎心?