《我獲得一個願望，我選擇左係學校做一次男神》: 第四十三章：失而復得？

快啲聽電話啦，芊雪。心急如焚既我，好想快啲揾到芊雪，好想將心底話全部一一講比佢聽。

點解仲未聽電話架，唔通訓左覺？其實我真係從醫院偷走出黎，完全係犯法既行為，但係而家最重要既都係揾到芊雪，其他野唔理得太多。

究竟芊雪會係邊呢？

我去過中大，但係行極都揾唔到，中大實在太大，亦都無謂係中大晒時間。

再去我地第一次見面，互相認識既大排檔，好可惜，芊雪都唔係到。





我好頹咁係到行，都已經無心機再揾，但係比我見到男班長，身邊仲有一個靚女，相信就係男班長之前所講鍾意既組媽。

「Hi，阿明，出左院都唔話比我知既？」

「唔好意思囉，下次實叫你接我出院。」其實我只係偷走出黎，估唔到會見到男班長。

「哎，唔好講衰野，邊有下次。」

「介紹比你識，阿松，我女朋友。」





呢個女仔都幾有禮貌，主動同我握手；有啲野真係要改變左先會有，從前男班長係最毒，個樣最唔掂個個，但係入到大學，而家有埋女朋友，成個男神咁款，睇黎男班長仲比我更加能夠駕馭呢個角色。

「你好，我叫阿明。」

「係呢，咁耐無見，不如去飲杯野。」但係你女朋友點算...

「我有野做啊，唔阻你地兩個。」

「好啦，今晚見啦，BB」





「Muah。」我的天啊，咁肉麻既情況竟然出現係男班長到，變了，變了...

「唔好意思阿明，我地係咁癡纏架啦。」

「唔緊要，我地行啦。」


我地去左銅鑼灣海旁飲野，都叫近我間醫院既，可以早啲潛返入去。

「最近點啊你，咦，點解你仲着住件醫院衫既？你偷走出黎架？！」

「係啊，細聲啲啦，你係咪想我比人拉返入去。」

「點解你要偷走出黎既？」





「其實我係出黎揾人，之後就會返去架啦。」

「哦，揾邊個啊？」

「講你都唔識，成匹布咁長。」

「講啦，我想聽啊。」唉，平時都係我做聆聽個個，而家都係時候分擔下比人。

「好啦，聽住啦，可能有啲長，不過我會盡量簡短架啦。」

「嗱，之前呢我咪係大排檔識左個女仔既...」



「哦，咁你而家就決定揾返人哋，不過人哋就唔比你揾返...」





「我唔信，我揾唔返佢。」我攞起支藍妹，一飲飲左半支。

「哇，你傻左咩，咁飲法，十支都唔夠你飲喎。」

「如果飲晒十支，我可以咩都唔記得，我寧願飲。」

「乜你個心係咁諗咩。」男班長認真起黎，永遠都係最恐怖。

「我而家可以做咩喎，佢而家好似穎心咁，粒聲唔出走左啊！」

「粒聲唔出走左？明明就係你趕人走，而家就係到話人。」

「你估我想架咩，我好渣，忍受唔到呢啲誘惑。」





「但係我而家知衰啦，更加知道自己最愛既係邊個。」

「無用啦，人哋全心避開你，你都係死心啦。」雖然男班長講得賤啲，但係又唔錯。

「唔通真係要死心... 」

「點都好，緣分會黎就會黎，唔黎就唔黎，無得強求架。」

強求？我對芊雪一直都無強求過，一直都係順其自然，覺得必定係囊中之物，但係而家，知道我唔用力留住芊雪，佢真係會走。



「多謝你今日同我飲野。」

「洗乜客氣，得閒再揾我啦，我而家要揾返我BB啦。」





哈，估唔到男班長上左大學，有埋女朋友會成熟左咁多；望下自己，上到大學，完全唔知做緊啲咩，雖然入左院做唔到啲咩，但係仍然覺得自己仲係一個中學雞，凈係掛住想拍拖，睇靚女，無諗過話要為自己夢想努力，第一步都未曾踏出，唉，我係咪大學生...

最衰都係我個病，究竟幾時先可以出院，重拾大專生活啊。