《我獲得一個願望，我選擇左係學校做一次男神》: 第五十章：朋有愛

係呢一個禮拜，芊雪無黎探我，晨曦亦都無黎揾我，我只能係花園，病床放空自己，究竟我仲可以點繼續行落去。



「阿明。」

「係你啊？」即使見到佢，我亦毫無心機，只係好似一部機械人咁。

「做咩咁頹。」仲好意思問？都係托你既福。





「對唔住，我覺得我地始終都做唔到情侶。」

「唔緊要，我知道，或者我地做朋友都幾適合。」



唔好同我講一直維持係曖昧既關係，知道有一日雙方會有一個忍受唔住，向對方表白，最後都只會爆煲。

「揾我有咩事？」





「我想知道你係咪仲嬲緊我，因為晨曦...」又係晨曦，兩個敗壞我愛情既女人。

「佢同你講左？」

「嗯，希望你唔好嬲我，我地都可以和好如初。」如初？睇黎你真係唔記得如初既感覺係邊，你已經忘記自己係大排檔既懵，單純。

「我似係啲咁小氣既人咩？」我露出強硬既笑容，好辛苦，未試過笑都要咁辛苦。

「咁就好啦，不如我地去花園行下？」花園？係咪痴左線定係失憶，完全唔覺得尷尬架咩？





「其實你明唔明我諗乜？」講真，我唔明。

「我一直都好鍾意你，甚至成日想同你一齊，希望你快啲表白；但係經過上次晨曦個件事，我對你或者對愛情已經失去信心。」

「可能都唔可以完全怪你既，我自己都喪失意志，亂搞關係，最後令到自己受傷。」好牽強既解釋，見到芊雪既表情，我知佢講緊大話，佢個心根本就唔係咁諗。

「算啦，係我衰，一時見到身邊靚女話係我女朋友，係人都會答應，不過我應承你，我以後都唔會亂黎，凈係愛你一個。」

「唔洗啦，應承你自己得架啦，應承自己要好好珍惜愛情。」無愛情，點樣珍惜...

「咁你諗住點？」

「點？其實人唔一定要拍拖既，仲有幾年大學時間，洗乜愁無拖拍啫。」

「啱，有道理。」





「所以你出左院都要比心機讀書先啊。」唔係掛，上大大學仲比心機讀書？

「咁先有女仔鍾意架。」

「嗯。」

「其實你真係要比心機溫書喎，你咁多日無返學，咩都唔識。」芊雪幾時變到咁煩，咁囉嗦。

「係啦，你都係。」

「我梗係會啦，唔想大學repeat咁樣衰。」

我地一直傾，一直傾，都係啲無聊野，客氣說話，我講過既野已經全部唔記得，因為我無諗過就講，對芊雪，已經毫無感情可言。








其實，單身都係一種享受，唔洗諗等陣食咩，唔洗鬧交，更加唔洗接受殘酷既分手；咁樣，唔係幾好咩？



「喂，溫書好悶啊，有無其它野搞？」我同芊雪係中大圖書館溫書，回想完係醫院既事，覺得好遙遠。

「溫書！」

「我想踢波。」

「唔得，除非你溫晒呢一本先。」





「一本？成本字典咁厚，我諗到我死都未踢到一次波。」

「死你個頭，認真溫就好快溫晒:）」

「係咪先，次次都係咁講，最後都溫到死死下，仲點踢波。」

「咁咪唔洗踢囉，踢波危險啊。」

「...」咁既說話都講得出。




「呼，終於走得。」





「今晚一齊食飯？」

「唔啦，今日約左人啊。」聽到呢句之後，覺得好刺耳，硬係覺得佢係同男仔食，而我又被放在一旁既感覺，真係好難受。

「哦...好啦。」明明我話唔鍾意佢架啦，咁介懷做咩啫。



不過，有樣野我都幾介懷，就係我個roommate，自從上次暈左，都無見返佢，睇黎，今日係時候結識結識。

係房門，我手都震埋，好似見校長咁緊張，究竟會發生咩事呢？