《我獲得一個願望，我選擇左係學校做一次男神》: 第五十八章：對待

「你...無事阿嘛？」

「無...」係我面前既就係阿明。



「你...」我想同佢講野，但係講唔出，點解會咁...

「我做咩？小姐你無事嗎？」





「無，唔該你，加油。」

「哦。」



好酸，點解阿明係我面前但係我要走左去，點解佢好似完全唔識我咁，佢個病會搞到佢失憶架咩？無理由，係咪偏偏唔記得我...


對唔住，穎心，我唔想認得你，估唔到你會返黎，我唔知點解你會係到，可能係有緣，又或者你特登過黎，但係點都好，我唔想再入侵你既生活，之後你又再次離我而去，你而家都好好啊，有未來老公，我扮唔識你，都係為左你好啫。








「喂，阿明。」

「男班長？你打比我做咩？」

「穎心有無黎揾你？」





「...」我唔知點答佢好。

「有...」

「點解佢話揾你唔到？」

「可能我見到佢，佢見我唔到掛。」

「無可能，穎心今次返黎就係為左見你，你係咪咁對人，見到人都無諗住追住佢？」為左見我？

「我...」

「唔洗講啦，快啲揾返人哋啦，你個負心漢。」負心漢...邊個先係真正既負心漢...

「我睇緊波喎。」





「睇你個死人頭咩，女仲要啲定係波仲要啲啊！」其實，我真係唔係幾在乎，無左咪無左囉，都唔會係我架啦。

「得啦，我點揾佢啊。」

「我點知你啊，總之你唔好搞到人哋帶住遺憾離開香港啦。」

「人哋講過話以後都唔返香港，但係因為你，穎心知道你病左，先特登搭飛機黎見你，揾你，係咁啦！」

Bye bye都唔講，咁無禮貌。




穎心，你係邊，我雖然唔係幾在乎，幾想揾你，個天比我見返你最後一面，都已經好足夠，雖然只係一秒既時間，但係已經可以勾起我地千萬回憶。








「機場啊，唔該。」的士司機望一望後面，見到個女仔喊晒。

「做咩啊，小妹妹。」

「無...」

「睇黎你都係因為情搞到咁傷心啦，但係都唔洗搞到離開香港喎。」

「我本身住係英國，而家返黎為左揾一個男仔，但係佢好似唔認得我，或者佢唔想認我。」

「opps，聽個電話先。」





「喂？」

「穎心，你去左邊啊，點解阿明話見到你，你又見唔到佢既？」我都知道，阿明一早知道係我，但係始終都係介意，唔想理我。

「我去緊機場，當我無返過黎香港，sorry，麻煩左你。」

「機場？點解啊？」

「既然阿明都唔想見到我，我都唔難為佢，或者我同佢既關係就係無辦法圓尾。」

「係咁啦，男班長，我地有緣再見。」








唉，搞咩啊明，人哋一心一意返黎，你就一心一意踢返人哋走。




「喂，白痴明！」

「又打黎做咩。」其實我無去揾穎心，我只係去左HMV睇碟。

「人地而家搭飛機返英國啦，你開心啦，你以後都唔會見到穎心架啦。」都話左無所謂...

「唔緊要啦，走左咪走左囉，都唔係第一次啦。」

「你係咪咁啊！」

「咁你想我點啊？係咪要我去機場追佢？我一定唔會咁做。」雖然我咁講，但係我對腳好想離開，好想跑出去。

「好，我唔阻止你，你鍾意點就點，幸福係你自己選擇既。」幸福？幸福一早都離我而去啦。

「我同你講多最後一樣野，穎心諗住同你結婚。」

「係咁！」




結婚？我對腳即刻軟晒，更加唔明點解佢都訂婚啦，仲要同我結婚？

但係，我好想，我好想同穎心結婚，我諗起其他人同穎心結婚既場面，穎心着住好靚既婚紗，走係白色地毯上，慢慢走入教堂，而身邊既人卻唔係我...




「唔該！機場！快！」