《我獲得一個願望，我選擇左係學校做一次男神》: 第二章：威脅
「遲到喎你。」
「對唔住啦，啱啱去左跑步。」其實我係要安頓好個兩隻醉貓。
「你想食咩？」
「唔...食M記。」下，女神話食M記，打死都去啦，估唔到，女神並唔係好難接近，行近左，就覺得份人幾隨和。
「好啊，女神話食m記，一定奉陪。」我亦都唔知幾時，我變左個口花花嘅男仔。去到M記，我好後悔答應穎心話黎食野，因為我見到阿軒條友係到買野食。
「穎心，不如我地食第二間啊，好多人啊。」「下，咁都多人？」的確一啲都唔多，而且仲有好多空位，但係諗盡辦法，都唔可以比阿軒見到我同穎心一齊。
「唔得啊，難得我今日想食M記。」佢仲要拉住我隻手，哎，今次玩完啦。
「咦，咁啱嘅穎心。」
大鑊，條友終於因為我地太大聲所吸引望左過黎。
見到我之後即刻擺出一個神憎鬼厭既樣。
「做咩食M記啊，食垃圾對身體唔好啊。」呵，你個人都幾搞笑，自己排隊買M記，跟住係到話唔好食垃圾。
「不如我帶你去對面食西餐啊。」穎心聽完呢句之後，即刻扁嘴，仲要眼泛淚光，但仍保持可愛嘅氣質。
「點解你地一個二個都係咁架，人哋想食餐ｍ記都唔比，都要管住晒。」我知道穎心今次真係唔開心啦，我即刻哄下佢，摸下佢個頭。
但係與此同時，我感受到一種無形嘅殺氣，正係我前方出現。
穎心係到，我睇你可以做到啲咩。
估唔到，條友一野撥開我隻手，暴露出佢真正嘅性情。今次睇黎你係穎心面前都唔會有好日子過。
「喂！做咩打阿明！」穎心竟然為左我罵阿軒。
為免破壞女神嘅形象，我即刻攬住穎心，希望佢可以冷靜落黎。 我眼角睇左阿軒一下，見佢無再想郁手，我都算數啦，佢亦慢慢行開。
「穎心，我肚餓啦，去買野食好無。」佢無答我，穎心反而更加大力咁攬住我，本身我諗住慢慢推開佢，但係今朝已經拋棄左佢一次，而且攬住穎心真係有份好簡潔幸福嘅味道。
企到有啲攰，穎心成個細佬女咁，捉住我隻手，話要扶佢去坐，仲吩咐我買野食，我會心微笑。
多謝「後生阿伯」，多謝你比我有機會擁有到穎心，更加有機會去品嚐做男神嘅滋味。 老土都要講句，百般滋味在心頭。諗起以前係毒男嘅我，真係好唔爭氣，完全唔似男人，而家嘅我，簡直可以話係風靡萬千少女。
「兩個魚柳包餐，兩杯橙汁，唔該。」 當我返到位個陣，穎心唔見左？！ 心急如焚嘅我，即刻打比穎心，但係無人聽；啱啱先仲係到，突然失踪左，唔通比阿軒個賤人捉左？
如果係咁嘅話，穎心真係渣都無得剩。
我又去問下附近嘅人，睇下見唔見穎心，揾左成半個鐘，都揾唔到佢。
唉，做男神做到我咁失敗都有。莫講男神，連普通男仔都好過我。
係我垂頭喪氣，漫無目的咁行嘅時候，有個無顯示嘅號碼打黎，我即刻聽電話。
「喂，白痴明，你而家係邊。」哦，原來係阿峰打比我，見佢講野咁心急，唔知咩事。
「我係銅鑼灣M記。」「我頭先見到一個女仔好似穎心，佢比人捉走左，你係咪同佢一齊。」心諗，今次真係無了。
「你係邊到見到佢？我即刻過去。」兩個都鍾意穎心嘅男人，心裡面都有著同一份著急。
「好似係世貿，你快啲跑過黎，佢地上左架黑色波子。」唔通比有錢人捉走左？ 黑色波子？諗諗下，會唔會係成日拍係學校門口個架呢。啊！個架野就係阿軒揸翻學個架車。
跑到世貿中心門口，見到阿峰好心急嘅樣，但其實我心裡面比所有人更著急。
「阿峰，佢地去左邊個方向走？」
「上車，我叫左司機黎。」估唔到呢個阿峰平時收埋收埋，原來屋企咁有錢。上左架７人車之後，我地往灣仔方向出發，差唔多去到會展中心，我地見到架黑色波仔。 我地即刻叫司停司機，
「司機，停車。」開門之後，我即刻跑左出去，但係阿峰行左去車尾箱。
「喂，阿明，攞住，唔洗我教你點用啦。」佢無端端比左把黑色手槍我，大佬，我打機就打得多姐，你比支真槍我，都唔知點算。
「如果唔係必要，都唔好開槍。」佢自己都攞左一把手槍。
梗系啦，犯法架，我唔想一做男神就要坐監啊。
「咁我地而家點揾穎心？」手機突然響起，我都無禁落去，自己彈左個視頻出黎。
「白志明，穎心而家係我手上，估唔到你個白痴都可以揾到黎呢到，一定有人幫你手。」手機嘅自拍鏡頭自動轉黎轉去，我諗佢亦都見到阿峰係到。
「咦，阿..阿峰都係到阿。」點解條友見到阿峰就口窒窒，有啲古怪。
「講，你點先肯交返穎心出黎。」見到穎心係視頻入面，暈低左，黑布蒙頭，手腳都用麻繩綁實，阿軒呢個人真係變態，我今日打唔死佢，我唔姓白。
「呵，你真係唔知個死字點寫，今日同你講完，你又咁快唔記得啦？」
「你憑咩話穎心係你架！」我對住部電話大叫。
「憑咩？憑而家睇住你個傻仔揾極都揾唔到穎心，但係偏偏穎心就係我手上。」睇住佢呢個賤人個樣，真係想一槍打死佢。
「阿明，我司機揾到佢地係邊，我地快啲上去。」阿峰係我耳邊講，今次好彩阿峰係到，唔係嘅話，穎心一早就...
「你睇住黎，唔好比我揾到你，唔係嘅話我一定將你碎屍萬段。」上左車之後，司機遞左部平板電腦比我地，地圖上面有兩個閃緊嘅點，一個係綠色，即係我地，一個係紅色係穎心，而紅色點正正係灣仔會展中心入面。
「我地入去啦，龍叔，如果我地好耐都未出黎，你就走啦。」阿峰咁同司機講，已經預左有生命危險。
「好，萬事小心。」
我地係金紫荊廣場門口行入去，望下隻錶，原來已經夜晚１１點，唉，都唔知過唔過今晚。
「阿明，攞定支槍，上面有電筒，開左佢。」開左電筒之後，照到嘅範圍都唔係好多，都係勉強睇到前面嘅路。
行左差唔多５分鐘，我諗起成龍套新警察故事，唔知阿軒會唔會好似套戲咁虐待穎心，如果係嘅話，我對佢十倍奉還。
手機再次震動，我攞起睇，原來又係阿軒嘅視頻。
「見你懵懵下咁，睇你聽朝都未揾到我地，為左減輕難度，我同你講，我地係會展中心嘅５樓，我比一個鐘頭你揾，揾唔到嘅，我就砍穎心一隻手指落黎。」
人癲起上黎，連自己鍾意嘅女人都可以傷害…
「電梯停左，我地跑上去啦。」當我想跑上去扶手電梯嘅時候，阿峰即刻捉住我衫袖。
「唔好咁衝動，睇下。」佢用電筒照住扶手電梯嘅底部，一條紅外線打橫凌空係到，我試下攞個一蚊銀掉落去，點知條紅外線切開左個銀仔，好在，切斷嘅唔係我對腳。
跟住落黎，我同阿峰都小心翼翼咁行，但係一個鐘好快過，我地加快腳步，靜到聽到大家嘅呼吸聲。
到左一樓，一切好似好順利咁，去到一個空曠嘅展覽場地門口，入面有啲嘢吸引左我地入去，因為我地見到穎心被人綁左係入面。