[農曆七月應節故] 校園鬼故事 - 紅衣女孩: （三十八）
天賜和阿詩仿佛知道校長的存在，對我的說話一點也不感到驚訝。
「點呀？搞掂未呀？我隻指南針停左無郁啦，小詠係咪上左你身啦？」天賜緊張的問。
「吓，我都唔知呀，我頭先應承左幫佢，跟住佢就變左一速光咁向我飛埋黎。但我又無咩特別感覺喎！」我嘴上雖然回應天賜，但視線卻不曾從校長身上挪開。
「你地幾個唔好留係度啦，小詠嘅靈魂睇黎非常虛弱，我開車送你地走啦！」校長對我們說。
「知道，子鋒你行唔行到，駛唔駛我地扶你？」天賜對我說。
「我……我無事！校長……你……」我話還沒有說完，已經被校長打斷了。
「有咩上車先傾，唔好再留係度！你地直接係出面大街位等我！我會開車去路口接你地！」校長說完便先行離開了。
我本想問校長，為甚麼不直接在校內上車，然後突然記得，學校的車子都停泊在操場那邊，旁邊正正是堅叔住的小屋。
然後我、天賜和阿詩一起離開學校，並上了校長的車。
「天賜，你爸爸係咪仲係深水埗幫人睇「病」？」校長問。
「係呀，無變過，都仲係果個地址。」
「好，咁我知點去啦，後座果度有水同野食，你地可以食住野先，放心，無落降嘅！」校長平淡的道。
我此刻真的的合不攏嘴，想不到校長可以感應到小敏的存在，還知道降頭的存在，她究竟是甚麼人。
「陳子鋒同學，唔駛咁驚訝，簡單講，我都算係天命嘅半個師妹！」
我把視線投向天賜和阿詩，詢問他們是否早已知情。
「唔駛望啦，我地兩個都係早你少少知。其實臨放學前果堂，我地俾校長叫左落去見佢。跟住校長就同我地講，佢知道左我地身上發生的事，而且佢有同老豆的合照，所以我地都相信佢。」
聽完天賜的解釋後，我們稍為休息了一會，便來到天命叔的道壇。
推門開來，只見天命叔一身衣服，比上次見到他時要整潔得多，看起來就像是天賜的成長版，只是略帶一點蒼老的氣息，但也不失為一個型男。
「哇，天命叔你搞咩執得咁正經呀，呢個look唔岩你喎，都係維園阿叔似你D！」我忍不住把內心的說話從口中吐了出來。
換來的是天命叔那能殺死人的目光，仿佛下一秒就要把我生吞活剝似的。
「天命……師兄，好耐無見啦！」校長對天命叔說。
「係呀，真係好耐無見啦，依家係咪應該叫你杜太啦？」天命叔正經的說著。
「唔駛咁見外喎，你叫返我師妹，又或者.…..阿賢都得！」
這兩人一問一答的互相看著對方，那種神情感覺是多年無見的喜悅，又像是交往多年的知己一樣。
看來他們亦有一些往事發生過，有機會以後再研究吧，現在重要的是處理我身上的小詠。
「係喎，你地入黎先講啦，仲有，細......阿鋒你先去沖涼房，洗一洗身上嘅污氣先，之後換好衫再出黎，我要準備叫返醒小詠！」天命叔在校長面前變得正經了不少，看來我抓到了他的把柄了。
但此刻我還是先聽他的說話，先沖洗一下好了。
洗好澡後，我回到客廳，只見在原本的神壇面前，放了一個神主牌，而且還有一碗黑色的不知名液體。
而在道壇前，只見校長和天命叔在有說有笑的，好不開心。
我走到了天賜旁邊，輕聲問：「喂，你知唔知佢兩個咩關係？」
天賜小聲的跟我說：「我記得老豆係我面前吹水以前幾咁受女歡迎嘅時候，佢有提過有個師妹，佢話當時師妹同我阿媽都鍾意左佢。不過老豆提過自己有種能力，可以感應到邊個係佢生命中嘅另一半，當時佢就係咁揀左我阿媽，無揀到師妹。我估校長就係我老豆成日提嘅師妹掛。」
只見阿詩不知何時，已經站在我們背後，在偷聽我們的說話。
看來，不論是多麼斯文，多麼有修養的女士，對八卦的話題還是會感到興趣。
「喂，你幾個搞咩呀？阿鋒你出左黎都唔出聲，係咪想等小詠一世跟住你呀？」天命叔呼喝著我們。
我們都走到神主牌面前，然後天命叔把那碗黑色的液體遞給我。
「黎，飲左佢！」
「吓，又黎？上次果碗清補涼，咁今次呢碗又係咩呀？廿四味呀？」我嫌惡的說。
「叫你飲就飲啦，唔好話廿四味啦，七十二味你都要飲架啦！係咪又要我灌你飲呀？」天命叔手部作出動作，應該是來真的。
避免像之前一樣，給人灌藥，我寧可自己來。
我把整碗黑色液體都送入口中，這藥的強烈惡臭，使我感到有點反胃。
「哇，我屌，好撚難飲呀，爭少少連胃都反埋。」我已顧不得校長也在場，只想把這種感覺透過語言抒發出來。
過了一會，只見一縷輕煙從我身上飄了出來，然後天命叔點起了三支香，再放在神主牌的香爐前面，然後那縷輕煙圍著神主牌轉動。
只見神主牌原來已經寫上了李麗詠的名字，生辰八字等資料。
「果......果團煙就係小詠？」我疑惑的看著天命叔。
「咩煙呀？點解我咩都見唔到嘅？」阿詩和天賜同時詢問。
「大家坐低先，慢慢講慢慢問，小詠靈魂俾小敏傷得太緊要，依家我將佢轉移到神主牌，等佢慢慢恢復。」天命叔吩咐我們坐低。
「首先，子鋒同學，天賜同學，美詩同學，今次學校帶俾你地麻煩，真係唔好意思啦！」校長誠懇的對我們說。
「吓？」我們三人同時發出疑問的聲音。
「其實，子鋒同學，當你一入學嘅時候，我已經有留意你！」校長看著我。
「吓？留意我？」都說了這校長是看上了我的美色吧！
「無錯，細路，你知唔知點解小敏個個都唔揀，係要揀著你？」天命叔向我詢問。
我沉思了一會兒：「因為我靚仔？」
「噗哧」一聲，我看見了阿詩正在一旁偷笑著。而天賜亦在旁笑得不亦樂乎。
「你睇佢兩個嘅反應就知唔關靚唔靚仔事啦，同埋重點係你一D都唔靚仔。你之所以俾小敏睇上，係因為你嘅時辰八字，同小敏一模一樣！而小詠的八字，亦是如此！再加上，你條命係至陽之相，陽年陽月陽日陽時出世。正所謂物極必反，至陰則生陽，至陽則生陰，而你生陰嘅情況，以今年最為嚴重，所以唔搞你搞邊個！同埋你依家明白，點解在場除左我之外，得你睇到團煙啦！」天命叔解釋得頭頭是道。
正所謂「你的樣子如何，你的日子也必如何」。
想不到，我是「你的生辰八字如何，你的撞鬼指數也必如何」。
我真的快要瘋了！
「但係，師妹，點解你又會知道佢地出事嘅？唔通你又走左去學道？」天命叔不解的問。
「無啦，當年我拜入師父門下，其實都係師父見我天生靈感力強，先叫我試下。但入左去幾個月，你選擇左......發生左果件事之後，我就一直無再學道啦，都係作育英才比較適合我。至於，我點解會知道出左事，其實果陣係我邀請左張師兄張真人做法事，佢單獨同我講過，要我留意每一年入學嘅學生，有無同小敏一樣嘅生辰八字，有嘅話就要睇實佢，如果唔係就好易出事。另外，佢仲交低左條紅繩俾我，如果條繩斷左，就要即刻搵佢幫手，如果佢唔係香港，就搵天命師兄你幫手。」
至此，我終於明白，當年為何學校的法事能成事，原來校長自己本身也曾經學道，更認識張真人，所以才會有當年的法事出現。
而且，更解釋左點解小敏和小詠可以出現在我腦入面，時辰八字，真是奇妙的東西！
就在我沉思之際，校長把張真人給她的紅繩展示出來，只見紅繩斷成兩截。
「估唔到佢咁快衝破埋個法術，睇黎我地有嘅時間只會更短！佢吸左小詠的能量後，怨念和力量應該更加強大，睇黎要搵一日，係學校對付佢，否則呢間學校只會淪為一間鬼屋。」天命叔憂心的道。
「學校果度，我可以幫手安排，全體師生放一日假！咁到時你可以過黎做法事！」校長向天命叔提議。
「唔好，咁樣只會令對方有所防備，同埋最重要係，陣間堅叔同堅嬸都走埋，咁就無辨法完美地處理好呢件事！一於搵日六點鐘，我過去搞掂件事！」天命叔認真的提議。
只見校長突然一臉驚訝：「關阿堅佢地咩事？」
然後我們把事情的經過和一些疑點告訴校長。
「我一直以為阿堅同堅嬸係信得過，估唔到......唉，我又睇錯人。仲要一D懷疑都無。」
就在我們討論之際，感到神主牌那邊動了一下。
我們五人十目的注視著神主牌，它又晃動了一下。
「睇黎，小詠嘅能量恢復左D啦！係時候等佢話俾我地知，佢究竟知道D咩啦！」
慢著，這不會是又要附在我身上吧。