「...講多啲離聽吓!」我講。
  
「...點講好呢,其實果陣係你阿媽睇先嘅,佢話喺未識我之前,跟過啲朋友去睇。
當時個睇相佬話佢第時會嫁個姓張嘅老公,最好笑嘅係當時佢個男友又真係姓張架喎,
你阿媽話聽到果刻幾開心呀,心入面諗住一定係佢啦,哈哈...但係佢兩個喺兩個月之後就散左啦,
不過到最後佢都真係嫁左個姓張嘅老公,想話佢唔準都唔得。」老豆憶述中。
 
「...咁其實陳李張黃何係大姓,撞中都真係唔奇嘅!」我都開始有啲動搖,講出離都冇咩自信咁。
 
「...聽我講埋先啦,當年果個睇相佬喺西環一帶都真係幾出名吓,


搵佢睇相要預早起馬成個月先可以book到。當年經你阿媽介紹,
我同你果三個阿姨媽同埋舅父都分別book左唔同嘅日子上去睇。
其實佢叫做(盲公陳),不過其實依家都好多人叫(盲公陳),
所以唔知邊個先係真啦,不過當年依個(盲公陳)呢。
每次搵佢算命,佢都會用錄音帶即時幫你錄起佢同你講過嘅野,
等你日後可以拎返出離聽返。咁當時呢...佢話你大姨媽依世都注定做人第三者,
結果到依家佢都仲係同你果個唔知離左婚未嘅uncle一齊緊。而你二姨媽呢,
佢當時就話佢冇兒冇女孤獨終老,而家五十幾啦,連拖都未拍過一次,到你細姨...
佢直頭話佢會有一個女,而且最後離婚收場,你諗吓喎...三十幾年前嘅人離婚就係好小有,
邊同依家十個有六個都離過婚嘅。至於講你舅父呢...就話佢同你阿公相剋,


一日有你阿公喺度,一日都冇得發圍。結果雖然你舅父讀完理大出離都叫做到個(物理治療師),
但係喺瑪麗做左成廿幾年都係做個第二把交椅,結果你阿公一走左佢就即刻升左做主管,
走左幾年咋嘛,已經連升幾級上到去管理層添。咁你話佢係咪好準呢?」老豆憶述完畢。
 
「...聽落又好似真係似層層咁喎,咁佢點講你呢?」我開始好有興趣咁追問落去啦。
 
「...至於我呢,佢話我乃係大富大貴之相,就算點差,都至小會中一次六合彩頭獎。
本來我當時同你一樣聽完就算架啦,係依家隔左咁多年諗返先知準架姐。
但係過左幾年之後發生左一件事,令我將佢依番說話擺左上心。」老豆繼續認真,
講到依度佢停一停低,飲左幾啖啤酒。


 
「...好緊張呀,繼續講啦!」我心急追問,唔好賣關子啦...。
 
「...幾年之後嘅有一日,我記得係一個好普通嘅日子離,當時冇工開,
我就坐左喺西環師父間舖頭度等運到。果日係開六合彩嘅日子,
當時無無聊聊坐喺度冇野做,我就喺牆上面撕左頁日曆落離,
再拎起左枝度呎用嘅紅色沿筆喺紙上面度左六個number,
寫完之後就叫我師母一陣去開馬會就順手幫我買左佢啦。
我當時張張日歷釘左喺道牆上面,之後就突然有客人入離要求我上去佢度睇報價,
於是我就出左去做野啦。到我做完野返離之後已經好夜,實際時間我唔記得幾點,
總之就係差唔多開六合彩嘅時間啦。因為當年打工係包伙食,所以返到舖頭,
師母就準備開飯啦,於是我地幾師徒就坐哂埋枱。一坐埋枱我就望到果張比我釘起左嘅日歷,
查問之下得知師母原來唔記得左買,而最諷刺嘅係,食緊飯果陣六合彩剛好攪珠,
我就眼白白咁睇住果六個號碼一個一個咁中哂,而果張飛竟然係冇買到。」阿爸講到好感慨咁。
 


「...嘩...嬲爆喎!」我搭嘴。
 
「...嬲架,但係又可以點呢?果個係我師母,唔通我爆粗鬧佢啦喎,
當時尊師重道係好緊要架,師父唔鍾意,打你都仲得呀!咁咪唯有沉默接受囉,
我仲記得當時頭獎獎金有成八十幾萬,當年嘅八十幾萬差唔多可以買十幾個單位架啦,
雲吞麵都係講緊兩三蚊碗咋。」老豆憶述中。
 
「......!」我都鄧老豆無奈。
 
「...不過有啲野係整定嘅,依家諗返轉頭,如果當日真係買左,可能又唔會有今日嘅你同文蔚啦,
又或者當時發左達年少氣盛嘅我根本就唔識點運用果筆錢,同啲豬朋狗友亂咁揮霍哂都未定。
果次之後我諗返起(盲公陳),我當時諗唔通佢算錯?從此之後我keep住買六合彩,雖然唔係期期買,
但係記得就一定會買,而且仲係買返果六個number添,我覺得有一日我一定會攞得返我失去嘅野,
結果到今時今日....終於都破鏡重圓啦!」講到依度,老爸嘆左一口氣。
 


「...記住呀...仔,做人千其唔好冇目標,要有夢想,如果無夢想,你中左六合彩同冇中根本就冇分別,
只不過係數字遊戲...。」老豆講到依度,阿妹就啱啱沖完涼走返出離。
 
「...咁大個人啦,你自己慢慢參透吓啦。」老豆拍一拍我膊頭之後就輕飄飄咁行返入房啦。
 
 
「傾緊咩呀?」八卦嘅阿妹,一邊用毛巾抹頭,一邊行過離問。
 
「...冇呀...老豆話(花世界沐浴露)好好用咋嘛!」我搞左啲難gag。
 
「...頂...又講埋哂啲廢話!」阿妹怒啤住我。
 
「...仲有呀,我地屋企中左六合彩依單野真係唔好爆出去呀,知唔知呀?」我叮囑阿妹!
 
「...知啦...長氣!」阿妹回應。


 
「...連你條仔都唔好講住呀,ok?」
 
「...er...得啦。」阿妹er左幾秒,表情相當尷尬。
 
「...做咩咁嘅表情呀?唔係同Ringo佢發生左啲咩吖嘛?」我問。
 
「...我地..散左啦。」阿妹答得相當細聲,答到頭dupdup咁。
 
「...er...,點解嘅?」我有啲驚訝咁問。
 
「...性格不合姐,冇咩特別嘅!」阿妹繼續尷尬回應。
 
「...哦...算囉,依個唔啱咪搵個第二個囉,放心喎...依家有老豆同大佬養你,
慢慢揀吓都可以架喎!」我安慰緊佢,但係阿妹又表現得好冷靜喎,


好似真係唔當係咩一回事咁,睇離佢對依段感情又真係唔係睇得咁重咋喎。
 
「...嗯...!」阿妹嗯左一聲。
 
「...拿...得閒呢,就幫手諗吓間新屋點裝修,同買啲咩新傢私。成間屋嘅設計就交哂比你架啦,
我地嘅室內設計師ivy cheung。」我拍一拍阿妹個頭講。
 
「...我邊係室內設計師姐!」阿妹講。
 
「...你讀理大果陣唔係讀室內設計咩?我記得果陣成日見你係度畫圖架喎!」我問。
 
「...我係讀室內設計,不過畢左業之後都冇做過依行,點算室內設計師喎!」阿妹解釋。
 
「...話時話啦,點解你讀完又唔做返依行呢?」諗落阿妹讀完果科又唔係做返果行咪好嘥?
 
「...er...因為怕辛苦囉,啲同學讀完出離,個個都呻話人工又低,晚晚ot,o到凌晨,
啲design成日比老闆改離改去,改到最後根本就唔係自己想要嘅野,聽埋聽埋咁多負面野,
咪唔敢入行囉。」阿妹講到口都室埋,睇離依行真係唔講得笑喎。
 
同阿妹傾完之後,我就返左入房上床訓覺啦。訓喺房度,我諗返起老豆頭先同我講嘅一席話,
(做人最緊要有目標),諗諗吓...做左廿幾年人,都真係一個目標都未有過,
就算以前讀書果陣嘅(陸運會)好多時我都係得過且過,可以唔參加嘅話直頭唔參加,
讀書又係考得好唔好都由得佢,連玩都係一樣.....打機過唔到版就玩過第二隻,
打籃球唔夠人打就放棄直頭唔打,突然覺得咁嘅人生好似好冇意義咁。
 
「...咇...!」咦...咁夜邊個whatapp我呢?
 
「...Jennifer Wong?」咦...我個電話幾時入左個叫Jennifer wong嘅連絡人架?
 
「...聰哥,訓左未呀?」一打開,入面出現一個訊息,咦...知我個名嘅?
 
「...你係?」我回應。
 
「...思敏呀!」原來係思敏,係喎...晏晝果陣借過個電話比佢玩架喎,唔通佢果陣幫我set左?
 
「...哦...咩事呀?」聰11;30PM
 
「...無呀...冇野做悶吖嘛,咪hi吓你睇吓你訓左未囉!」思敏11:35PM
 
「...哦...差唔多訓啦!」聰11:40PM

「...係牙.........」思敏11:42PM

「...有事?」聰11:45PM
 
「...冇呀,過幾個禮拜我生日呀!」思敏11:50PM,無啦啦...做咩同我講佢生日呢,唔係想我送禮物比佢掛?
已有 0 人追稿