【英雄系列5】天使與吸血鬼: 15
15.Archangel
一星期後
10樓訓練場
「嘭！嘭！嘭！」
身穿運動服既瞳瞳以左右連拳不停抽擊沙包
「唔夠，再快d」
旁邊既友美督促住瞳瞳
「係..！」
瞳瞳加快拳速，打得沙包都就要快脫
「唔錯...都打得幾快」
友美遞上一支冰水:「休息下先啦」
「唔該友美小姐」
「估唔到你都響勤力架喎」
友美道:「成個禮拜，朝早練格鬥術，下畫練槍法，你都算幾落力」
瞳瞳大口大口地吞下冰水
「因...因為...我想快d變得更強，行動既時候可以靠自己」
「嗯...」
友美亦飲下一口水:「原本我以為你只係三分鐘熱度，不過你..真係令我跌眼鏡」
「因為我依家知道...我應該要為咩而戰啦」
「唔係為左石仔，而係為自己....」
瞳瞳站起身:「友美小姐，再黎啦」
「嗯，好呀」
「砰！！！」
奈央神色凝重，跑進訓練場中
「瞳瞳、友美！！今次大件事啦」
「奈央小姐？做咩呀？」
「Archangel...好似出左問題呀」
「！！」
「撻撻撻撻撻撻撻撻撻撻撻撻撻撻撻撻撻撻」
洛迪古斯不停用鍵盤打住程式碼
「唔得呀，佢個系統完全reboot唔到...」洛迪古斯苦惱道
「IT狗，知唔知點解會呀？」奈央問
「鬼知咩，頭先訓訓下教，Archangel就自己熄左」洛迪古斯道
「係....係.....唔該哂」
大久保放下手機:「問左世界各地既Archangel小隊啦，佢地都係同樣情況，Archangel完全入唔到」
「咁既話，可能係關Archangel部主機事..」
洛迪古斯摸住下巴:「但係...Archangel部主機唔響香港喎」
「吓...咁部主機...響邊架？」瞳瞳問
林聰道:「呢層就真係唔知啦...但係我印象中Archangel好似係由幾個富豪整出黎，再由兩個唔係IID既人帶返比IID既」
「唔係IID既人.....」
「咦，乜你地想搵果兩個人咩？」
辦公室門口傳黎一把聲音
「我有辦法搵到佢地喎」
「...係發叔？！」眾人先呆一呆，因為發叔好少出現響呢度
「哈哈，好耐冇落黎啦」
發叔開口道:「瞳瞳，響呢度做得慣唔慣呀？」
「嗯...大家都對我好好呀...」
「咁就好啦...」
發叔道:「講返正題先，果陣係我叫果兩個人去拎Archangel既主機」
「佢地兩個係由我一個舊朋友訓練出黎既盜賊，不過果單野之後已經金盤洗手啦」
「不過好可惜，除左IID局長之外，依家冇人知道Archangel主機響邊，希望響果兩個人身上會搵到d線索啦」
「咁點解...唔直接問局長呀？」奈央問
「IID既局長一直都神出鬼沒，根本無人聯絡到佢」發叔苦笑道
「咁我地...可以點搵佢地呀？」瞳瞳問
發叔將一張寫上地址既紙條，遞比瞳瞳
「佢地兩個依家住緊海怡半島，應該唔難搵啦」
「咁...搵人既工作靠你啦瞳瞳」
「呃.....嗯...」
瞳瞳點一點頭
「咪住..以防有咩問題，我都跟埋去啦」
友美道:「瞳瞳冇車牌，我車佢過去會快少少，而且萬一受到咩襲擊，瞳瞳未必應付得到」
「友美小姐...」
「咁好啦，今次呢件事可大可小，希望你地快d搵到Archangel既主機」
「友美小姐....」
「做咩？」駕駛住IID公用汽車既友美問
「唔該哂你..送我過黎...」瞳瞳含笑道
「小事姐，我唔識太多電腦既野，留響總部都冇意思」
友美望望旁邊既瞳瞳:「而且，你都仲係需要保護架嘛」
「.....」
「唔駛灰心，瞳瞳你咁勤力，好快就唔駛我教架啦」
響瞳瞳眼中，最近既友美，好似比以往更溫柔
「海怡半島第三期20座17樓A室...」
瞳瞳同友美到達海怡半島後，就向住20座進發
「唔該，請問兩位係搵邊個呀？」
樓下既看更臉色黑如墨斗，問
「吓...我地...」瞳瞳一時諗唔起會有管理員，支吾以對
友美二話不說，取出口袋中既一張假警員證
「我地係警察，我地黎係為上星期一單案件搵一個證人姐，佢響17樓A室」
一聽到友美自稱警察，管理員既態馬上180度轉變
「哦...原來係搵林生呀，兩位madam請入！」管理員更主動為兩人開門
「唔該」
「叮！」
兩人進入升降機中
「下次預備定一張警察證啦，方便行動」友美冷冷道
「...係....」
「似乎呢個林生冇乜危險，至少管理員講得出佢既姓，即係話佢經常都會出入」
友美對瞳瞳道:「一陣，你試下開口問佢啦」
「但係...」
「你驚？」友美嘴角一揚:「放心啦，我會睇住你架啦」
「嗯....」
兩人走到A室既門前
「瞳瞳，準備好未？」
「...嗯！」
瞳瞳吸一口氣，準備按下門鐘
「叮噹！」
「叮噹！」「叮噹！」「叮噹！」「叮噹！」
瞳瞳見未有人開門，按下多次門鐘
「咔！」
打開門既係一個頭髮亂翹既男子
「你..你地係邊位呀？」
「我...」
「我叫凌愛瞳，係IID香港分部既」瞳瞳緊張道
「IID.....」男子想一想:「咁熟既...」
「阿德！咩事咁嘈呀，邊個黎架？」
一個身穿睡衣既曲髮美女從屋中走到男子旁
後面既友美行上前，遞上IID特工證件，道
「睇黎兩位就係當年...將Archangel帶到IID既人啦」
「我叫友美，我地兩個係IID Archangel隊既成員，我地有d問題想問下你，唔知你地方便嗎？」
「阿德...」曲髮美女不安道:「唔通係果次果單野...」
「睇黎係啦...」
呢一個叫阿德既男子示意兩人進來:「咁...你地入黎啦」
「好啦，打搞哂」
「我叫阿德，呢個係misa，我女朋友，你地想問咩呀？」阿德坐回真皮梳化
「其實問題都好簡單既姐..」
友美吸一口氣:「你地當時負責將Archangel主機帶返比IID，咁你地知唔知道，主機依家響邊？」
「呢層就真係唔知喎...果陣我同misa兩個將主機交左比果個...好似叫發叔既人之後就冇再理啦」
阿德道:「大佬我都係收錢做野姐，邊會理咁多丫」
「我記得...發叔好似講過，部主機會交比果個乜鬼野IID局長」
阿德身旁既misa回應:「所以我地都唔理啦」
「哦...即係話，你地都唔知主機響邊啦」
友美認真地望住兩人
「嗯，當然啦」阿德答得直接
「咁好啦，呢件事我地IID會自己解決，多謝你地既合作」
阿德為兩人打開大門:「嗯」
友美跟住瞳瞳離開單位
「咔」
「果個王生又話手尾跟既！」
「咪係囉，阿德你一早就唔應該比佢地入黎啦！」
「對...對唔住囉」
瞳瞳對友美此舉感到意外:「友..友美小姐...點解咁易就問完呀？」
「你睇唔到咩？」友美輕輕一笑:「佢地兩個答得咁直接，同我講野既時候眼神冇閃縮，就證明佢地...係冇講大話，再問佢地都冇用」
「頭先我由佢地開門既時候，已經觀察緊佢地既表情」
友美道:「調查都係一門學問黎，唔止聽佢地答既內容，仲要睇下佢地既表情有冇異樣」
「係....」瞳瞳專心聽住友美既教導
「不過...依家連唯一既線索都冇左，咁點算好呀？」
友美亦感無奈:「唯有.....返去再搵辦法啦」
「鈴鈴鈴鈴鈴鈴」友美既手機響起
「喂？....我明白啦，我同凌愛瞳返黎啦」
「友美小姐，係邊個黎架？」瞳瞳問
「洛迪古斯，佢話已經有人搵到IID主機既位置」
友美走進升降機:「咁...我地快d返去啦」
「嗯！」
兩人迅速返到IID既總部
「丫你地兩個返得黎啱啦」洛迪古斯道
「響大概45分鐘前，美國既IID總部利用過往Archangel指令既記錄作反方向跟蹤，終於搵到...」
「呢個位置」
一個世界地圖從電腦中彈出，地圖上亦顯示一個紅點
「呢度係....」
「斐南...共和國....」大久保有點吃驚道:「竟然....係呢度！」
瞳瞳問:「斐南共和國？係咩..國家黎架？」
「佢係一個1990年立國既國家，佢地一直都同鄰國阿富汗處於敵對狀態」
林聰叉起雙手講解:「更重要既係，斐南係少數....無IID分部既國家」
「咁...咁咪好危險？！」奈央問
「咁又唔算既，只係...我地去到要靠自己，無如何支援姐」
「去到...？即係我地都要去斐南共和國？」瞳瞳問
「無錯，今次我地將會同美國加洲方面既IID人員合作，搵返Archangel既主機」
大久保道:「再視主機既情況，再決定會唔會將佢帶返黎維修」
「時間緊逼，所以我地聽日就要出發」