【突發】有個巴打PM我，話我聽佢死左。: 拾伍

睇完，唔明。
完全唔明。

咁到底本野關我咩事？
點解要比本日記我？
點解Miss Tang要搵我？


於是我再一次返呀鋒學校搵Miss Tang。





「妳睇完本日記啦？」Miss Tang一邊洗走手上面既顏料，一邊問。

「係。但我都仲係唔明，點解要比本日記我？點解妳要搵我？」

「妳覺得，呀鋒寫既日記係咪事實？」


係咪事實？唔通係假既？

「至少，佢冇提過我一直關心佢，鼓勵佢。」Miss Tang抹一抹手，繼續講，「呀鋒只係比較內向，又冇乜笑容，先至朋友少，但其實同學間只係唔理佢，未至於杯葛佢、討厭佢，如果佢肯主動同人講野，一定有人理佢。」





「咁即係，一切都只係呀鋒佢諗得太負面？」

「肯試下搏一鋪改變現狀，可能會有轉機。但如果咩都唔做，淨係等人黎救，就只會繼續落去。見唔見到個幅相？」

Miss Tang指住牆上面一幅合照。合照入面有個打扮時髦既女仔，挽住Miss Tang既手。

「個女仔以前都係好內向，淨係中意畫畫，連野都唔想同人講。幸運既係，當時有另一個女仔不停撩佢講野，令佢終於有日明白到，原來主動同人講野一d都唔恐怖，其實冇想像之中咁困難。」

「嗯……」





「後來個女仔做左小學既美術老師，唔算係大展拳腳，但都算係過住適合自己既日子。」

諗深一層，呀鋒話自己冇朋友冇情人，呀俊又憎佢
但事實上都唔係咁壞
Sharon中意佢
呀俊好關心佢
佢亦有畫畫既才能，唔算係乜野都冇


幸福唔係強求所得
而係你察唔察覺到佢存在


如果呀鋒肯努力d主動d同人溝通




大家打開心房講清講楚
結果可能真係會好唔一樣。


「反正都諗住死，仲有咩係輸唔起？點解唔搏盡一試改變自己，盡地一鋪？只係睇到人地成功既一面，但佢又點會知道人地背後付出左幾多？」

「不過，呀鋒講既野又真係唔錯得曬既……」

「的確，呢刻既佢係好唔如意，但有幾多人一世都會順風順水？一時失敗，就代表一世都係失敗咩？十年後仲係失敗，咁二十年、三十年後呢？二十年前，都冇人用緊智能電話，冇人信大呀哥Nokia會搞到今日咁啦！未來既野邊個會知？」


「妳都岩既，企定定等人救，要守株待兔到幾時？如果連自己都唔幫自己，主動去做d野，試下扭轉局勢，仲想邊個幫佢？佢怪街既途人唔主動搵佢，咁佢又有冇試過鼓勵陌生人？」

「不過，」Miss Tang坐低，歎一口氣，「有時人就係咁，當局者迷。因為我一直都鼓勵佢，佢就會變得麻木，忘記左我既存在。因此，局外人既角色其實都好重要。我頭先講個個女仔，就係因為當時有外人推佢一把，佢先至可以變得外向。如果當時係高登開個個post入面，又或者係佢既同班同學，有個人肯多花心機認真去鼓勵下佢，件事就會變得好唔同。」





裏應外合，估唔到有時都適用於一個人既情緒上。


「世界唔係冇由衷既善心人，世界唔係冇關心自己既人，只係可能呢一刻，你未遇到。而我就用pm到你黎証明左比佢睇，其實有人關心佢架，只係當時未搵到咋。」