再見前度: 第二章 獨家記憶

「再見。」他默默地說，𠝹刀慢慢在他頸上劃出一道紅線，從中透徹出了血色紅光，接著就是無盡的血漿，不斷地噴出來，沾滿了我的身子，仍未停下，不斷地，不斷地，甚至洩沒了整個世界。

我嚇醒了，身子一抖，睜開眼睛，首先看見的是刺眼的光管，然後是身旁的男朋友，我略略左右張望一下，這裡應該是醫院病房。

我坐直了身子，頭有點暈，男朋友見狀了，馬上給我擺好枕頭，握著我的手，說：「擔心死我啦，又會冇啦啦入廠都有嘅。」

我想起他自殺的事，那個烙印在腦中永不磨滅的畫面，他最後的微笑，就開始頭痛，我不禁摸了摸額頭。男朋友見狀，說：「有冇事？不如我斟杯水比你？」

「冇乜嘢......我抖下冇事。」我說。





「喔......好啦。食橙？」

「嗯。」我點頭道，他就開始剝橙了。

我望向窗外，不自覺地又再想起他，眼淚不自覺地掉下來。男朋友沒有察覺，我悄悄地拭乾眼淚，強忍著淚水，問：「係呢.......佢有冇事？」我未能面對他已經告別人世的事實，於是大膽一問。

「佢？邊個佢？」男朋友顯得有點疑惑。

「佢咪......」我正想說出他的名字，但到嘴唇邊時，則怎麼也說不出來。





「......我個ex呀？」我唯有這樣去描述他。

「你個ex......轉左校嗰個肥仔？」男朋友問。

「唔係呀......同我同班咖呢？」我再加以描述。

「你幾時有過同班嘅男朋友呀？」他更疑惑。

「下......」我腦海裡一直在記名字那個抽屜找呀找，對於他的名字，甚麼也找不到。





「醫生！」男朋友道，一位身穿白袍的男人走過來床尾，托了托眼鏡，皺眉看一下手上的報告，說：「基本上冇乜大礙，不過留院觀察返一晚。」

「佢有冇話咩失血過多嘅問題？」男朋友問。

「嗯.....止左血比身體休息下就ok。」醫生說。

失血過多？我不是驚嚇過度暈倒送院嗎？

「醫生其實我係因咩入院？」我問。

「流鼻血過多而暈倒。」醫生翻著報告說。

「你冇拿拿Graddin就走嗰陣流鼻血，流到暈左呀嘛？你唔記得咩？」男朋友說。

「下？我明明......」我明明是因他的自殺受驚過度而暈的。這句話未說完，醫生打斷了我的話：「探病時間結束了，請盡快離開啦。」





「有咩需要打比我，我放學會過嚟揾你。」男朋友說完，就走了。

「但係......」我未說完。

「聽日我再嚟啦！」男朋友就走了。

我就呆在床上，不知狀況的。對了，可以問一下醫生。

「醫生，我想問有冇一個年齡同我相約嘅男人同我一齊入院？」我問。

醫生托一下眼鏡說：「冇，我跟嘅case冇。」

「或者問下其他同事？」我問。





「其實呢D病人私隱，某程度上係唔可以幫你。」醫生說。

我愣了一下，垂下頭來，顯得有點失落。

「不過。」醫生再說：「你好似好緊張佢喎，佢係你邊個？」

「佢......係我一個好重要嘅人。」我如實作答。

「重要過男朋友？」醫生追問。

「嗯......可能係。」我說。

「好啦，見係咁，我幫你問下，早D休息。」醫生對我單眼，做個調皮臉，就走了。

窗外一片天已染成黃，我看著夕陽，默唸一句：「唔好有事......」





晚上，我睡不著覺。一閉起眼，就憶起那夜每一幕，他的華麗登場，我的忐忑不安，他的血花四濺，我的真心覺悟。睜開眼睛醒來，被醫院的一片黑暗籠罩著，引來心裡的不安，悲傷，恐懼。我忍不住，再堅強的我也忍不住，哭了起來，我不敢放聲大哭特哭，只瑟縮在床上，靜靜地抽泣，我很想他，我很擔心他，我真的很愛他。

不知不覺，來到了清晨，看到第一道陽光，聽到小鳥說的早晨。我，徹晚無眠了。

「點呀，訓得好唔好呀？」那是醫生巡院第一句話。

「嗯......唔太好。」我說。

「嗯......睇你精神狀況都知，只不過check下你會唔會講大話。好彩你唔係D咩大病，你今日可以出院咖啦。」醫生說完，正要走。

「等陣醫生！」我叫住他。

「係？」醫生問。





「我尋日拜託你嘅事......？」我問。

「噢！」他托了一下眼鏡說：「我幫你check左，有係有，但係唔知邊個係你要揾嘅人，一係你比名我？」

我再一次在腦海中搜索，卻換來我的搖頭。

「定係講下佢嘅傷勢？」醫生問。

「嗯......佢割頸自殺......」我說。

醫生一下愕然，苦思了一陣子，托眼鏡說：「冇。」

「真係冇？醫生你諗真D？」我說。

「同你年紀相約又差唔多時間入院嘅病人有3個，一個右手骨折，一個肺炎，仲有一個哮喘。」醫生閉著眼思索著說。

「唔係喎醫生......」「拿！」醫生打斷了我的話。

「其實昏迷過後精神錯亂係好正常嘅事，過幾日就冇問題，不過如果仍然有精神錯亂嘅跡象......」

醫生貼近我的臉，凝視我雙眼說：「我會轉介你去精神科。」

醫生退後了，再問：「仲有冇問題？」

「冇......」我無奈地說。

「休息多D。」醫生掉下一句就走了。

男朋友又不記得，醫生又找不到，就連我也不記得他的名字。到底，他怎麼了？像是消失了一樣。

午飯過後，不知不覺又到探病時間，男友依舊穿著校服過來，看來又是剛放學就來了。今日更多了一位來賓，那是我的閏蜜。

她看見我就抱過來，說：「擔心死我啦！」

「其實嗰日到底係點？」我問。

「你冇拿拿企起度發怐愗，然後就狂流鼻血，就暈左啦。」她說，和男友說的一模一樣。

「冇啦？」我問。

「冇啦。」她說。

他，到底怎麼了？

「你仲記唔記得，我以前個男朋友？」我問。

「Ex......？轉左校個肥仔？」她說，和男朋友說的一模一樣。

「唔係呀......」我忍不住，掩臉抽泣起來。

他，去哪了？

「做咩......？」閏蜜搭我膊問。

「冇嘢......」我緩緩地說。

他，是消失了嗎？

男朋友見狀，走過去抱我入懷，溫柔地問：「做咩事？係咪唔開心呀？」我卻果斷地推開他，說：「比我一個人靜下......」

「定係......」「我叫你比我一個人靜下！」我激動地說。

「好好......我地聽日再嚟......」男朋友說，接著他們就走了。

他到底怎麼了去哪了，還是消失了怎樣？怎麼我身邊最親密的人都不知道他的存在？怎麼他像是不在這個世界一樣？

我在病院中抽泣，我的問題，沒有答案。

「佢，應該唔起呢個世界。」有道聲線從病院傳出，我轉身一看，是位滄桑的婦人。

她發現我看著她，眯眼一笑。