港大七不思議食女事件: 5. 大仙

5.大仙
 
「卡仔冇你咁高大，大約五尺八左右啦，但係同你一樣，都係運動型。」Wilson頓一頓，續道：「有一次開樓會，速龍問逐個逐個問我地，今個學期一共睇咗幾多次Interhall[1]，大家你眼望我眼，如實報數。咁我讀牙科，讀書忙，冇去睇波，以為大家都明，點知……」
 
「跟住呢？」
 
「點知大家都唔明。速龍最鍾意恰我樣生得細，第一個開聲批評我：『讀書忙，大家都明，認真、落力、準時呢啲叫態度。唔去睇Interhall仲當正常例牌呢啲係叫冇責任。而家唔淨係得你一個要讀書架嘛？不如你搬走，唔好阻住Hall發展啦。』」
 
「當時幾個大仙睥實我，我只係一個牙科小毒撚，唔敢出聲。我心諗，仲要搞Hall 活動、打Hockey，邊有時間再去睇波？所謂嘅舍堂文化，真係不近人情。」Wilson講得激動，幾乎眼濕濕。
 




「批鬥得最痛快之時，同房卡仔挺身而出，大大聲直斥大仙：『Wilson讀書咁忙，仲肯抽時間練波，你地仲想點？將睇波嘅次數量化為對Hall嘅支持，咁樣又有咩意思？』」
 
「速龍欺善怕惡，見卡仔生得大隻，唔敢鬧佢，頓時溫柔咁講：『即係咁，如果你落場比賽，都想有人嚟支持啦，係咪先？嗱，住得係到都係兄弟姊妹，如果親生兄弟比賽，你係咪都唔嚟睇？』卡仔見速龍Hall性上腦，不可救藥，於是坐番低，廢柒事應佢。」
 
「速龍又真係戇鳩鳩，上堂日日教民主自由，住Hall就咁專橫，簡直同港大西化教育相違背。係呢，點解卡仔又Quit hall嘅？」
 
「卡仔Quit hall，一來係佢讀Glaw[2]，讀書忙，成日被速龍單單打打，二來係佢同Elaine散咗，唔想撞口撞面，於是住咗三個星期就Quit。」講起Elaine，Wilson神色黯然，若有所思。
 
「呢位Elaine，又係乜水？」
 




「Elaine都係住呢個hall，讀Politics，出名姣，除咗我之外，聽聞係人都溝過佢，搞到成Hall襟兄弟。卡仔食女無數，Elaine淫底，簡直姣婆遇著脂粉客。佢地有冇搞嘢，我就唔知，不過卡仔成日帶Elaine返房，趕我走，冇幾個鐘都唔會走出嚟……」Wilson講到呢到，神情肅穆，再講唔到落去。
 
「你……唔會係鍾意朋友條女掛？算啦，呢啲女，係公家嘅，卡仔玩完好快就掉番出嚟啦，下個就到你架喇。」
 
「嗯，卡仔好快就飛咗Elaine。不過點都好，Elaine永遠都唔會睇得上我，唔關人事，係我冇用。」說罷，Wilson部又殘又舊嘅Iphone3一震，佢立刻喜孜孜地應機。「唔講住，Elaine叫我去幫佢落宜記買糖水，遲啲再講啦Marvin。」話語未落，Wilson隨手換件衫，一仆一跌，飛去宜記買糖水。
 
身為浪子，我無法想像為女人仆去買糖水嘅滋味。我望住佢幸福背影，本想勸佢早日退伍，忽爾見到檯頭嘅《吶喊》，不其然諗起喺序入面，魯迅話：「假如一間鐵屋子，是絕無窗戶而萬難破毀的，裡面有許多熟睡的人們，不久都要悶死了，然而是從昏睡入死滅，並不感到就死的悲哀。現在你大嚷起來，驚起了較為清醒的幾個人，使這不幸的少數者來受無可挽救的臨終的苦楚，你倒以為對得起他們麼？」
 
Wilson搵到佢暗戀對象，我又有咩資格去批判佢，去阻止佢尋開心呢？佢開心就好。
 




上次速龍大仙仙完我，將Hall性消失殆盡。宿舍生活，除Wilson之外，再無真正朋友。佢冇改壞名，就好似電影「劫後餘生」嘅排球Wilson一樣，伴我喺如怒海中嘅傳統宿舍掙扎求存。
 
一日早上，上完早課，我睡眼惺忪咁返宿舍，一推開大堂門口，女色當前，友誼變得脆弱，命定嘅邂逅，成為大學生涯永遠的痛。 [1] Interhall：長寫為Interhall Competition，即舍際比賽。[2] Glaw：Government and Laws，政治及法律系。