港大七不思議食女事件: 6. 結他

6.結他
 
一推宿舍大門，來到電梯大堂，就遇見佢。少女約莫十八九歲，寒冬之下面紅紅，戴一副幼黑框眼鏡，雙眼水靈，彷似會說話一樣。白雪雪皮膚、烏油油長髮、漲卜卜身材，又有一種原始美。
                        
電梯入面，少女對我微笑，問道：「咦，你新嚟架？住幾多樓呀？我啱啱練完水，個頭都未乾。」 少女抹頭髮，令我覺得相當挑逗。
 
「嗯，我住六樓架，唔該你。」我向來活於脂粉堆中，但對於佢嘅熱情，竟顯得有點忸怩。
 
「你咩名呀，我叫 Elaine。」 原來，佢就係Wilson嘅暗戀對象，卡仔嘅舊菜，人盡可夫嘅Elaine。
 




Elaine一見到我，聲音提高八度，熱情主動，一雙愛笑嘅眼睛瞪著我。
 
「我叫 Marvin，Freshman，搬入嚟冇耐咋。」受西化教育嘅我，欲伸手與之相握。
 
Elaine 竟然一時間不懂反應，雙頰飛紅。我隻手懸於半空，十分尷尬。
 
此時，電梯門打開，我亦到埗，同 Elaine 講拜拜後，就返去執房。 一返到房，只見Wilson埋頭苦幹。佢抬頭見到我，大驚，立刻將手頭上嘅物事收起，明知故問：「咦，咁早番嚟喇？」
 
我不欲令佢難堪，就講：「係呀，返嚟溫書。」不多時，Wilson外出上堂，我好奇心好比衛斯理，亂翻佢收埋喺紅色紙袋嘅物事，發現一條織好咗大半嘅黑色頸巾，入面有張卡，淨係用鉛筆寫咗上款，字跡蒼勁，謂：「給Elaine」正文之處，有大量鉛筆痕，想必係Wilson心如鹿撞，將正文寫完又擦，真係苦命嘅孩子。
 




當晚，Wilson溫書過勞，好快就入睡。臨訓之前，佢煲咗杯柚子茶畀我，勸我早訓，免得傷肝。我好感激，當夜思如泉湧，閉上雙眼，Elaine漲卜卜嘅美態，頓時浮現，我無端被萍水相逢嘅妹妹仔迷住，真係枉稱風流浪子。
 
之後幾日，我經常隨速龍去Stanley Ho練波，冇見過 Elaine，但我對佢嘅美貌，始終念念不忘。直到有一日，我代表舍堂Lacrosse隊出戰，完場之後，一把女聲於從後喚我，燕語鶯聲，勾魂攝魄。我回頭一望，原來係嚟打氣嘅Elaine。佢身穿宿舍外套，戴一條黑色頸巾，卻令我想起Wilson。
 
Elaine一見到我，就拉住我嘅右手，同我握手：「上次我好蠢唔識反應，對唔住呀。你啱啱打波好有型呀！大球星，陪我影張相得唔得？」
 
佢對我流露天真嘅笑容，摟住我面貼面咁自拍。呢個突如其來嘅身體接觸，令我覺得，呢條女……
 
有啲姣。
 




「不如我地一齊去可可店食嘢吖？」就係咁，我認識咗 Elaine 。 言談間，得知佢Hall性甚低，不滿女大仙嘅所作所為，所以與我頗為投契。飯後，Elaine意猶未盡，提議買兩枝酒，去國殤之柱下面坐，飲酒、傾計、吹風。
 
「係呢Marvin，你入大學之後，有冇拍拖呀？」舍堂之中，必有性情中人，Elaine喺橙色嘅國殤之柱下，飲多兩啖，借醉，就單刀直入。
 
「你問得咁直接嘅？之前溝過個組媽，但又唔太鍾意佢，分開咗。我係花花公子，好難喜歡上一個人。」對住呢啲囡囡，必先直截了當。
 
「我之前同個Hallmate拍過拖，覺得佢嘅氣質有啲似你，所以我嗰日一見你，就覺得好親切。」Elaine托住眼鏡，一路笑一路講。
 
「吓？個Hallmate我識唔識架？」我故作驚訝。Elaine諗咗一陣，就話：「你應該唔識，佢叫卡仔，係Glaw Freshman，住咗三個星期之後，就同我分咗手，順便Quit埋Hall。我反而同佢Roommate Wilson玩得幾埋吓。」
 
「你知唔知，Wilson就係我而家嘅Roommate？」
 
Elaine一陣愕然，笑靨如花咁講：「係咩，又係614號房呀，世界真係細，唔通真係整定。」我見Elaine意有所指，諗起唔可以背棄Wilson同房之誼，就扯開話題：「你鍾意卡仔啲咩？」
 
「卡仔份人冇咩特別，但係佢讀Glaw，神科，威囉，巴閉囉，英雄主義囉，疊馬，我唔妥你，可以告你。你冇睇陳浩南教書潮文架？?仔你啤咩呀？過嚟錫我吖，錫呀，你錫我，我錫你，點呀？」




 
雖然Elaine冇乜內涵，以科取人，但佢越哄越埋，少女幽香撲鼻，登時叫我心猿意馬，右手扭住佢纖腰，正想一嘢轟落去。危急之時，忽想起Wilson嘅柚子茶，一念天堂、一念地獄，友誼戰勝情慾，令我輕輕推開Elaine。國殤之柱下，人性光輝再度展現。
 
Elaine見我突然不瞅不睬，故然感到奇怪，一開頭尚以為我同佢開玩笑，豈知我同佢講：「夜喇，不如返房訓，如果唔係會傷肝。」Elaine方知我所言非虛，俏臉烏雲密佈，徑行回宿舍去了。
 
但我Marvin又係何等人物，Elaine見奇貨可居，當然不善罷甘休，每每主動Text我，即使我唔應佢機，佢都不斷主動搵我，更甚嘅係，佢經常無故來電，有時Wilson在旁，我接電話時，就更加尷尬。
 
「喂，呢排咁多女打畀你嘅？」Wilson蒙在鼓裡。
 
「冇咩，都係啲無聊人啫。」我敷衍道。「唉，你就好啦，永遠唔明我呢啲毒撚心理。我send message畀Elaine，佢永遠遲十二個鐘先應機，我地明明住同一個宿舍，但好似有時差咁。」Wilson頹然，遲疑咗一陣，續道：「喂，你幾時得閒，我教你彈結他啦，你又話好想學The Scientist。今日第一堂，我試吓教你彈The Sound of Silence。」之前我講過話想學結他，Wilson竟然喺粉嶺老家，千里迢迢搬個結他返嚟。
                                                                          
“Hello darkness my old friend, I”ve to come with you again…”
 
陽光從湛藍窗透射，投映在專心結奏嘅Wilson身上。我喺佢身上，見到嘅唔係陽光，而係一種難寫難描嘅魅力。木結他聲韻柔揚，我心中感激不盡，希望結他聲永不歇止，就如我地嘅友情一樣。