港大七不思議食女事件: 22. 孽子

22. 孽子
 
「你點解出嚟做嘅？」

「冇錢，咪出嚟做囉。」

「你好等錢洗咩？」

「咪話冇錢囉。你估個個都好似你咁幸福，有閒錢出嚟玩女人？」



「我都係窮撚，錢係兄弟送畀我嘅，我唔係你想像中咁。係呢，我係你第幾個客？」

「唔知第四，定係第五，我記性唔好，第幾個又點？對你地啲男人嚟講，有分別咩？」

「我覺得你隻眼好靚。我最鍾意隻眼識發光嘅女仔。」

「我係咪應該講多謝？」

「你會唔會記得我？」



「唔會。我記性唔好。」

「我諗我會，我未試過識咗個女仔唔夠一個鐘就上床搞嘢。」

「你搵多幾次CC，就慣架喇，好快就唔記得我。」

「我只不過係想同你做個朋友。」

「點解我要做你朋友？」



「二零一三年九月一號，最後一年大學嘅開學日前夕，我同咗你上床，發生咗就係發生咗，你扺賴唔到。」

「你以為你係邊個？阿飛正傳入面張國榮？收皮啦好唔好？今日發生嘅一切，都係你用錢換番嚟架咋。」

「只不過係感覺同你投緣，僅此而已，冇咩特別。」

「除咗叫床同問你叫咩名，幾時同你溝通過？邊忽令你覺得我地好投緣？你個人咁搞笑嘅，著番條褲走喇好嘛？我仲要幫小朋友補習架。」

「我記性好好，我真係會記得你。」牧子將千六蚊對摺，珍而重之地放咗落佢銀包仔。
 
我隱約有些許破爛嘅手袋，裝住一本白先勇嘅《台北人》。之後我地就離開咗百佳，各行各路。我望住牧子短髮喺風中搖曳，成件事好似發咗場一場值千六蚊嘅夢咁。

一夜纏綿後，我閒來無事，想起牧子對我嘅冷冰冰，心裡竟然說不出受用舒服。偶爾，我都會搵牧子吹吓水。起初佢知道我唔係有心幫襯，淨會回一兩個符號表情打發我。我唔敢約佢，因為佢真係個個鐘千幾蚊上落，身為窮撚，我真係負擔唔起第二Q。

我甚至會檢查牧子嘅最後上線時間。有時候，傾傾吓計，佢會無啦啦消失兩三個鐘，我大概估到，佢應該被啲客砌緊。受港大西化教育，我根本唔介意佢嘅副業，佢嘅過去同背景對我嚟講，無關痛癢，就如佢當初識我嘅時候，講到明，係「謀稻粱」，而我又援助過佢，又憑咩去批判佢呢？ 



佢喺Whatsapp無端失蹤嘅次數越多，同我嘅交流亦都越深入。

「我好多客都係搞完就算，唔會有聯絡，點解你仲keep住搵我？」

「我諗住出本書，寫援交妹嘅心路歷程嘛。」

「你記住搵我寫序，最多我畀個背影你拍封面，哈哈。」

「你個短髮咁正，實好多麻甩仔買啦。」

「點解你成日提住我個短髮？你之前有女朋友係短頭髮？」

「唔係，可能因為我阿媽係短頭髮掛，我淨係知我好鍾意同你傾計。」



「想搞嘢，定係想傾計？」

「你當我係咩？我真係有啲想追你。」

「客囉、雞蟲囉。」

「杜牧你聽過未？白居易你聽過未？王昌齡你聽過未？以前啲文人墨客，邊個唔風流？邊個唔玩女人？十年一覺揚州夢，贏得青樓薄倖名，你又聽過未？」

「你咩十九才子咁巴閉？讀Kong U就係才子？吟兩句唐詩就係才子？笑死人咩？你寫過幾多本書，幾多本小說？睇過？睇過？」

「寫小說的話，要是老夫出手……」

點知道，若干月後，我真係大學經歷寫成《港大七不思議食女事件》，亦印證我當時並非鳩嗡。

「你都鍾意睇小說？」



「你又知？」

「我上次見到你手袋有本《台北人》。」

「睇小說唔洗錢，消磨時間，咪睇囉。我最鍾意有才華嘅人，最憎啲人有幾個臭錢，扮晒嘢，Instagram越多貴價食物相，個人就越庸俗，媽呀我想嘔呀。」

「你個名叫牧子，同佢本《孽子》有冇關係呀？」

「冇呀，唉，你好煩，我約咗人呀，遲啲同你傾。」

「如果我第時寫本書，筆名都好似學你咁，叫自己做乜子。」

「就叫賈子啦，你成日話自己靚仔，賈寶玉啱晒你喇。」



然後，又係一陣令人難堪嘅寧靜。我掃極個電話，牧子個後上線時間永遠都停留喺那一小時那一分鐘，我好矛盾，不知應該替她有客到而高興，還是替自己悲哀：意中人被付得起千六蚊嘅男人啪啪啪，屌到反皮。

我同牧子只有一面之緣，卻成為佢嘅救贖。牧子一不如意，都第一時間同我講。有時，我同佢講電話，覺得似聽緊深夜電台：我試過拎開電話，佢連續講咗五分鐘，我都未回到佢半句。好有默契嘅係，佢永遠唔講佢「工作上」遇到嘅悲喜，可能佢都唔想我知。

無眠嘅晚上，牧子無啦啦打過嚟我手提：「喂，Marvin，得唔得閒傾兩句……」平時串串貢嘅佢，竟然語帶哭聲……