港大七不思議食女事件: 25. 浪子

25. 浪子
 
「喂，你同個私鐘妹搞成點呀？佢捨得搬走未呀？」Whatsapp Group入面，Raymond問道
 
「佢做咗我條女，差唔多一個月喇。」
 
「咁撚不可思議？窮撚都溝到雞？你唔係戇鳩到去借財仔貼女呀嘛？」野狼又廣東話夾住粗口，潤鳩我。
 
「佢唔係一般嘅港女。」
 




「港女咪又係雞。」野狼自從一次戴帽之後，早已看破紅塵，所以佢而家主力屌九五後貪錢小妹妹。
 
「佢同你溝開喺Instagram夾對波出嚟，幾千人Follow嗰啲囡囡唔同。牧子都係窮妹，唔太重視物質享受，佢同我一齊，佢就好開心。我溝過咁多條女，都冇試過有條女對我咁好。你試過同條女扑完嘢，佢落街買M記你食未？」
 
「Marvin哥，你真係鍾意佢？你要飛落地喇？」Raymond呢個問題，好難答。
 
Whatsapp Group突然一片沉默，我打咗一堆字，刪除，再打，又刪除，欲言又止。每當我將牧子嘅雙鬢秀髮圈落耳背，我會諗，究竟佢鍾意我啲咩。大概係佢啲客，只當佢係工具，好似尿壺一樣，而正常人決不會對尿壺生情愫。
 
但係我食女都寫得出幾萬字，有追開文嘅讀者，都知道作者非凡品，再加上如題目所言，呢個係《港大七不思議食女事件》，同去倫敦屌賓妹相比，我對牧子心動，又算得上係咩？
 




「你知唔知，我細個嗰陣，想做歌手？」當現實尚未磨平牧子嘅稜角，佢曾經係追夢者。夏末某夜，牧子接我放學，我帶咗佢嚟港大孫中山像個荷花池，欣賞荷塘月色。
 
紐魯詩樓掛住一幅孫中山大海報，寫住：「我有如遊子歸家」，牧子倚偎喺我胸口，快樂得好似有如海報所云一樣，有如遊子歸家。
 
「我中學嗰陣，年年Sing Con都拎獎。Solo唱『明知故犯』，都唔知幾多男仔喺下面同我打氣。完咗場，佢地問我拎電話，我都冇理過佢地。」
 
中學萬人迷，因為生活，成為只要有千六蚊就上得嘅神女，放棄理想，我不得不為牧子感到悲哀，自然摟得佢更加緊。
 
牧子挨喺我身邊，捉住我隻手，低聲輕唱許美靜嘅「明知故犯」，如怨如慕、如泣如訴：「誰也知夜夜與他那內情，可惜我瞎了眼睛……」唱到最尾，佢忽然好大力咬我隻手一啖，哄塊面埋嚟，用食指輕劃我塊面，若有所指咁，繼續唱：「得到你的愛情，還要再得到你任性。」
 




到而家，我每聽到「明知故犯」，牧子咬我嘅痛感，同埋佢望住我，深邃嘅眼神所帶半絲嘅幽怨，總會喺我腦海入面再倒帶一次。
 
「你會認真對我架，係咪？我遲啲搵夠，唔會再做CC架喇，廢事你喺朋友前面冇面。」牧子捉住我隻手，摸佢軟熟嘅頭髮。
 
「我好少真係鍾意一個人，如果我同你一齊長長久久就好喇。你係我架。」牧子又咬咗我個鼻一啖。
 
一齊得耐，牧子每講一次「我愛你」，我都會惴惴不安，只能含糊其詞，蒙混過去，虛怯得好似破戒嘅小淫僧，將牧子當木魚咁攬住，頌經洗罪。除咗搞完嘢，佢會落街買吉野家我食之外，佢為咗我，仲去學彈結他，彈到隻手損晒，都只不過係因為我隨口講咗句，Coldplay嘅The Scientist真係好好聽，曾經有個故友話要教我，但我冇用，學唔成，唯有臨訓之前都要聽一次。
 
我老豆年輕時到處留情，最尾情歸我老母，終生不渝。上咗年紀，老豆經常鳩嗡回帶，講番幾十年前，喺風雨飄搖嘅晚上，於上環樓梯街苦候我老母，縱使橫風橫雨，差啲將佢吹落去文武廟，老豆決不失約，自詡為現代尾生。國字口面嘅老豆，同我嘅瓜子口面，無半分相似，就連佢嘅一往情深，我半成都遺傳唔到。望住塊鏡，有時懷疑，究竟係咪阿婆喺中環連卡佛，由阿差手中執我返嚟。
 
我同老豆相反，係浪子、花花公子、仆街，並唔能將我嘅將來，寄托喺呢個短髮女子身上，而呢樣嘢，同佢係唔係私鐘妹，同埋對我好唔好，一啲關係都冇。
 
我並唔知道，究竟係咪到咗手嘅囡囡，就變得越唔矜貴，定係我身為浪子，對愛情嘅最佳食用日期，好似開咗嘅樽裝豆漿一樣，只須幾日，就會凝固，然後腐化。愛上佢嘅時候，我真心愛上佢，我相信冇人會特登變心。呢個美麗嘅錯誤，令我同牧子遇上，但係我冇勇氣同佢講，我不是歸人，是個過客。
 
「唔係，你知道我呢種男人，好難對女人有真情實感。」鏡頭返番去Iphone入面嘅Whatsapp Group。




 
「屌你個撚樣，早幾日先話好鍾意人嘅，又話人地對你咁痴心，又接你放學，又買早餐你食，一時一樣，你想點呀？」野狼對我嘅反覆，睇嚟有啲微言。
 
「我唔係唔愛過佢，但你知道我條條女都唔長久架啦。可能我好勝心強，淨係想倔強嘅佢愛上我，冇理過個後果，今次大撚獲……」呢個Whatsapp Group，竟然成為咗我告解嘅教堂。
 
「唉，真係孽，你呢個缺愛嘅仆街，又扮浪子，仆街就認啦，屌柒你。上次鍾意個韓妹，係因為人地最尾唔理你，飛鳩你，你正一賤骨頭。」野狼又屌鳩我。
 
「食女專家」Raymond淫心不可收，隨後佢嘅一番話，更將我同牧子呢段關係，捲落流沙，直至沒頂，缺氧，然後死去。