港大七不思議食女事件: 34. 賞菊

34. 賞菊
 
「點呀，阿媽打嚟都唔認得呀？其他女人叫你Marvin就認得，阿媽叫你Marvin就唔認得？」半夜三更，打嚟嘅，竟然係我老母。
 
飲大兩杯，兼見到阿予嘅年輕胴體，令我連老母都唔認得。
            
「我同Friend飲緊酒，一時唔知邊個呀。咁夜打嚟做咩？」我冇Save開阿媽電話，因為佢成日話上台好貴，用電話咭會平啲，所以佢每兩三個月就轉一次電話。成日轉電話好唔方便，但係我媽將畢生奉獻咗畀屋企，佢寧願死慳死抵，將最好嘅嘢留畀兩個仔，連影響到佢日常社交都在所不計。
                                                           
「你細佬而家訓咗喺瑪麗呀！唔好講咁多，即刻過嚟先講！」
 




「喂，我而家忙緊，有咩傷風感冒，返屋企先講啦。」我思考咗半秒，我諗Larcos唔係盲腸炎，就係小腸氣，應該死唔去，最多都係我阿媽大驚小怪。權衡輕重，砌咗阿予先係上算。
 
「你把口係咪咁撚賤呀！細佬而家流晒血，要通宵做手術，你即刻同我過嚟呀！」阿媽好激動，令我有錯覺，以為佢下一句就要講「屌你老母」。
 
為咗去除「自己老母屌自己老母」呢個悖論，我唯有像死狗一樣，應承咗我阿媽，仆去瑪麗醫院。
 春宵苦短，佳人如夢，可惜我唔係古時皇帝，不能貪戀美色，從不早朝；經此一役，我更加肯定，人生只不過喺煙波江上嘅一葉孤舟：我以為畀咗錢時鐘酒店，就可以屌盡每一分每一秒，點知，事情發展到呢個地步，真係被阿予講中，我地只不過係搵個靜啲嘅地方傾吓計。 如今母命難違，我接過慈禧太后聖旨，性慾盡去，情愫漸生，唯有幫阿予著番衫，蓋好被，將佢長長嘅眼睫毛，掃咗一次又一次。阿予睡得香甜，咀角微微向上揚， 定必發緊幸福嘅夢。                                 
我見佢半開半合嘅咀唇，就想一嘢轟落去，但係我冇咁做，因為咁樣會嘈醒佢，我真係唔想佢知道，一米八零、港大畢業、有賈寶玉七分俊俏嘅陳納邦大文豪，居然係強姦小龍女嘅尹志平。我好自私，唔想天真嘅阿予知道呢個真相，喺呢個星光燦爛嘅晚夜，廉價嘅時鐘酒店入面，一切都變得美好，因為喺阿予心中，我永遠係腳踏七色彩雲嘅行者孫悟空，拯救自己於情傷之中。阿予係好女仔，佢估中咗個開頭，醜陋嘅結局，佢唔需要知道。
 
我將阿予嘅短髮掃呀掃，將佢耳鬢嘅頭髮一次又一次撥去耳背，唔知點解，又諗番起牧子。我一路掃佢嘅頭髮，記憶徘徊於灣仔百佳、Raymond阿爺屋企、港大荷花池、華富邨下格床、御龍山同埋火炭划艇會；我記性太好，要記得嘅我永遠都會記得。我掃吓掃吓，猛然醒覺，好似阿予咁漂亮嘅女人，應該有童話故事嘅結尾，等高大靚仔專一嘅王子，駕住南瓜車嚟迎娶佢，而家佢跟住我，只會帶嚟不幸。所以，天快亮嘅時候，我知道我該走了，於是，我錫咗阿予一啖，就消失於空氣之中。
 




我一去到瑪麗醫院，就見到我阿媽坐咗喺醫院大堂。阿媽對眼肚，就嚟大過對眼，突然蒼老咗好多。
 
「細佬咩事入醫院？」我講完呢句，阿媽就攬住咗我，欲哭無淚，我先知道事態嚴重。
 
「細佬尋日半夜三更，無啦啦喺房大叫，我一入去佢間房，就見到佢渣住把較剪，成手都血。撞鬼，你知唔知佢做咩呀？」
 
「你唔講，我點知佢做咩呀？」
 
「你細佬呀，話自己包皮太長，要幫自己割包皮，話咩要割咗佢……」
 




「吓？屌！割咩呀？」
 
「……割咗佢法律之棒入面，最藏污納垢嘅地方。唉，都係我唔好，逼個仔讀書，而家讀到痴咗線呀你細佬！好彩冇記者嚟咋，我幾驚呀，唉……」我阿媽講完之後，又攬住我，終於，我廿幾歲人，第一次見我老母流淚。
 
「醫生話佢而家情緒正常番，你一陣去睇佢，唔好鬧佢呀，知唔知呀？你幾唔鍾意佢都好，佢始終都係你細佬。仲有呀，唔好話畀你老豆知呀，我唔想佢臨老爆血管呀。」
 
我捉住阿媽嘅肥手臂，一時語塞。呢件咁不可思議嘅事，仲誇張過小說情節，所以話，奇遇往往發生喺我身上。屋企嘅事往往困擾住我，由細到大，細佬做過幾多稀奇古怪嘅事，阿媽統統唔容許我講畀老豆知，廢事我老豆責怪佢。我夾喺中間，鬧又唔係，屌又唔係，有呢個細佬，真係家門不幸。佢LLB[1]未畢業，已經有國際律師行招手，點解仲要咁大壓力呢？
 
好唔容易先嚟到中午探病時間，我一入病房，就見到Larcos盯住醫院天花板，呆然無語。
 
「點解你要咁做？你係咪痴咗線？」一見到佢個撚樣，諗起我傷心嘅老母，就忍唔住屌柒佢，一嘢轟落去。
 
「冇，我見把較剪生晒鏽，想睇吓佢仲利唔利啫。」Larcos語氣極平靜，相較之下，痴線嘅，睇嚟係我。
 
「唉，你好好抖吓，讀唔讀到冇所謂，唔好畀自己咁大壓力。」我見佢痴得勻循，不欲再落井下石。




 
「創世紀話，上帝吩咐過，男子出世之後第八日，要行割禮，代表『永久之契約』，呢個係我讀Law and Religion學嘅，你垃圾BA仔，識條春咩。唉，哥，你一陣返華富，幫我拎本Evidence[2]過嚟，我要考試喇。
 
「喂，仲有借部電話嚟，而家冇書，我就影舊屎upload上網……」Larcos一時好正常，一時九唔搭八，我望住雙眼不斷流淚嘅阿媽，真係唔知點算好。
 
「好啦，你訓吓，我而家番去拎本Evidence畀你。」我唔再忍心睇落去，拍拍我媽肩膀，不回頭，轉身走。
 
中午陽光明媚，我去到瑪麗門口，見到花圃嘅菊花，憶起白先勇嘅《我們看菊花去》，又頓時諗起牧子、苦命嘅老母、痴線嘅細佬，心裡淒苦，不可言狀，眼淚掉下了一地。
 
忽然，我後腦一熱，冷不提防，竟然被人一嘢打咗落嚟…… [1] LLB：法學士(Bachelor of Laws)[2] Evidence：證據法。