港大七不思議食女事件: 39. 史詩

39. 史詩
 
「啱啱你喺船上面話，嚟到白鴿巢，就有故仔聽，仲唔快啲話我知？」
 
「史詩式故事結尾，就喺呢個公園完結。你想聽個開頭先，定係結局先？」
 
「如果係幸福嘅故事，請你將結局話畀我知先；但如果呢個故事係悲劇，你講咗個頭就得，唔駛將個尾講埋落去。」
 
「咁我地嘅將來呢？駛唔駛將我地嘅尾講埋落去？」
 




「講故就講故啦，你係浪子，可唔可以唔好講將來呀？我而家搭咗幾百蚊船，淨係想聽故仔。」
 
「咁你畀個鍵盤我，我而家寫個幸福嘅結尾畀阿邦同阿杼 ---- 即係我同你 ---- 等佢地永遠咁係埋一齊。」
 
「你學人講永遠？憑咩？」
 
「好啦，我講。從前有個十七歲嘅澳門男仔，如果我有賈寶玉七分俊俏，將我減去四分，就係呢個男仔嘅相貌。一九六六年冬天，澳門發咗一件大事。」
 
「咩事呀？」
 




「開槍呀！死人呀！」
 
「無啦啦喺人地耳邊叫，嚇死人咩！」
 
「好啦，唔玩啦，正經啲先。當年氹仔坊眾學校要起校舍，但係葡國佬搞咗好耐，都未批准學校動工。之後，學校唔理政府，直接就起棚架。於是，建築工人就同警察發生咗衝突。呢件看似無關痛癢嘅小事，竟然係另一個歷史嘅開端，愛情故事嘅濫觴，奇遇嘅嘢，往往發生喺我身上……」
 
「你身上？如果你畢業，可以試吓做DJ，你把口咁叻。跟住呢？」
 
「唔喺我身上，一時口快，講錯咗。之後，澳門人日日去澳督府示威，直到十二月三號，終於同警察發生咗大規模衝突……
 




「呢個史詩式故事嘅男主角，叫德仔，十七歲，一米七三，有賈寶玉三分俊俏。一九六六年十二月三號，受大陸文革風潮影響嘅德仔，因為澳門罷工、罷市、罷課嘅關係，遊手好閒，去咗噴水池『反殖反帝』，實情就係睇熱鬧。
 
「當年嘅噴水池呢個位置，有一個葡國將軍嘅銅像，叫做美士基打。澳門美副將大馬路就係以佢嚟命名。當年澳門仲未有咁多自由行，係一個好寧靜嘅殖民地城市……」
 
「等陣，點解你知咁多澳門嘢嘅？係咪真人真事？」
 
「如果你問作家，呢個故係咪真人真事，佢一定會答你：『情感都是真實的』。然後，銅像威風凜凜，作拔刀狀，我睇過啲相，好有霸氣。議事亭前地，黑壓壓擠滿咗葡國兵，其中有啲係華人士兵，同示威者相對伺。」
 
「跟住呢？打交末？」
 
「德仔喺示威嘅早幾日，先同班紅衛兵，批鬥完個葡國官，逼佢跪喺地下，大聲讀毛語錄。十二月三號呢一日，德仔喺議事亭前地親眼睇住，示威者用貨車綁住美士基打銅像，當咗佢係侯賽恩像咁，拉咗落地下。德仔聽人講，個銅像被人推咗落葡京對出個海，以後都搵唔番。」
 
「銅像倒下之後，德仔喺地下執到舊石，躲起個高大嘅示威者後面，一儲氣，大叫一聲『屌你老母』，一嘢就轟落去葡國兵個頭到，正中紅心。
 
「示威者喺羊群心理驅使之下，不斷向葡兵扔石。德仔扔得好高興，突然間，佢見到身邊，有位妙齡女同志，約莫十六七歲年紀，長直髮大眼睛。大眼妹好面善，好似係德仔屋企隔離番工嘅工廠妹。」




 
「德仔此時此刻，方驚覺吾道不孤。跟住，故事嘅小高潮就嚟緊。咳咳咳……等陣，等我飲啖水先。」
 
「跟住呢？文呢？唔好再吊我癮啦好嘛？」
 
「好啦，錫啖我，我就繼續講。」