一時間成間冰室靜晒咁望住我地...
「你...你講咩啊?...我地識左一日...都無,鐘意我?...傻架?」阿珊口震震咁,跟手係袋度攞手杖起身離開。
「好囉,阿珊有拖拍囉。」
「你唔好亂講呀,達叔!佢黐線架!」埋完單急急腳走...
我望住被佢飲左半柸既茶走,回想我係唔係太直接呢?回想我對上果次正式追女仔都差唔多七八年前,仲要係初戀。有時覺狩獵容易過追女仔,就算你唔講野只係揸部法拉利落老蘭,已經大把女爭住上車。依家我就好似被女飛咁,頹左係度...
「唔使灰喎,佢怕醜啫,俾心機,唔好放棄,阿珊好女仔來架!」達叔好心安慰我。
「你地識左好耐架?」我問達叔。
「街坊來既,佢細個未盲之前已經望住佢大!」
「未盲之前?」
「聽講感染左咩病毒,令視覺神經慢慢衰退,十五六歲已經睇唔到野...」


聽到依度,我自覺不了解佢,的確,我一直以來都係靠外表去認識一個人,從來沒有真心認真去了解去探索一個人既內在,尤其佢睇唔到,心靈溝通更加重要。好彩我自小想得到既一定盡力爭取既,或者今次係愛神給我既考驗...
既然我缺乏溝女經驗,一定要問下啲專家先,以下就係我地Whatapp老蘭狩獵group既內容:
我:「我鐘意左個女仔,但佢睇唔到野,想問有咩辦法溝到佢?」
Sam:「嘩!你無野好玩要玩到溝盲女咁高難度?」
我:「我認真架!真係鐘意!」
Peter:「有邊個出來浦玩認真架?你使溝咩?你揸部法拉利落老蘭,已經大把女爭住上車啦!」
Eric:「無女仔唔鐘意花既!你買99枝玫瑰,再買鑽戒俾佢,一定冧啊!」
Peter:「佢盲架!點冧?計我話就唔好煩係佢啲野落藥,到時米已成炊點到佢唔鐘意!」
我:「你地亂來既...」
Sam:「咁你識左幾耐呀?平時佢鐘意啲咩?」


我:「兩日,我唔知啊...知既都唔使問你地點溝啦!仲有佢知我成日浦老蘭啲野...」
Sam:「好難喎!」
Eric:「無計,盲既已經難喇,仲要知你啲野就難上加難...」
Peter:「施主!放棄吧!返來!回歸返我地狩獵派喇!」
Eric:「算吧喇!六師弟,溝咩女拍咩拖,好似我咁一晚搞掂,仲可以天天新款,日日新鮮,又唔使負咩責任,逍遙自在...」
去到依到,我知道班所謂「專家」已經幫唔到我。正當我灰心想放棄回歸佢地之際,突然一個留言出現,而這留言拯救了我及改寫左我下半生...
Patrick:「既然對方睇唔到,咁你要係說話方面著手,例如語氣肯定啲,盡量表達到你對佢既真心真意,由於佢睇唔到,基本上物質既都無咩用,可以自己手作啲禮物或者煮野食咁...」
Patrick,好陌生既名,好似係阿Sam啲朋友,無記錯一直都無咩參與過狩獵,有時落吧見到佢都搾住支啤酒若有所思咁,印象最深係佢玩魔術好叻,但佢又話自己唔係魔術師,有傳佢連風水睇相占卜乜都識。佢對眼就好似睇穿你咁,個樣就好似話俾你知無野佢搞唔掂咁...
已有 0 人追稿