那夜,我在老蘭狩獵了天使: 第四章

講返正經野,之後Patrick同我講而家最好多點了解阿珊先,同時要令阿珊感受到我對佢既好感。其實,老實講我係一個唔識表達自己既人,唔好話浦老蘭果時,就算初戀都係女友表白先我地先一齊,就算係老蘭都係你情我願先搞埋,一晚之後大家唔識大家。於是我將我既難題講左俾Patrick聽,佢就咁答:
「其實唔你唔使擔心咁多,假如佢討厭你,大可以唔采你,而家你都表白左,係差在你未令佢感受到你既真心。再有咩問題就隨時來找我,再唔係我係一邊觀察佢既反應喇。」
講觀察力係老蘭無人唔識Patrick,有傳佢係美國某大學讀心理學碩士畢業,甚至有傳佢幫過FBI做過顧問等,至於佢點解來香港就無人知...
睇完Patrick留言後,於是我決定股起勇氣,到上次間cafe找阿珊!
我大約六點半到cafe,而阿珊仲未收工,我坐係鋪出面既長枱靜靜咁等佢。由於佢係廚房做野,所以睇唔到佢點整野,但有時佢出鋪面抖下時,穿起圍裙滿頭大汗,再加上佢今日著背心,確實又令我產生瑕想...
「Joey,我走先喇,拜拜!」
「阿珊,收工喇。」我搶在佢面前叫佢。
「又係你啊,韋生!」
「叫我阿Ken得喇,你去邊啊?我有車啊。」
「唔使喇,我行路得喇...」講完就繼續向前行。


「咁一齊丫,橫掂我都想做少少運動...」
「是但你喇...」
於是我地就佢前我後咁一齊行。見佢用手杖一邊摸索一邊行,無論斜路梯級過馬路佢都好似平常人咁行過,如果佢唔係搾住枝手杖,根本無人知佢睇唔到。反而我有幾次因地面不平差啲跌倒,一次仲要捉住佢膊頭先企得穩...
「啊!唔好意思...」
「帶眼行路嘛,我盲既仲行得好過你...」佢既語氣有啲刁蠻,但配上佢斯文溫柔既聲音確實不失可愛...
「咁第時我做你對眼,你做我對腳,咁唔驚扒街囉!」我開玩笑咁講,佢好似好甜蜜咁微微咀笑,跟住講:「第時先算啦!」跟住繼續向前行。
今日都幾熱,行下行下,我同佢背脊都濕晒,再睇個路程,假如我自己行應該三四個字左右,但現在已經行左八個字(唔知係唔係同我一齊行有關),心諗佢日日咁行都幾辛苦。跟住入左超市(終於有冷氣喇!),我問:
「想買咩?」
「屋企啲雞蛋好似食晒...」
「哦...你平時日日都咁行嫁?」


「都唔係日日既,返cafe都係星期六日先返,我正職係社區中心做導師,幫助返啲失明人士...」
「哦...幾好丫,可以回饋返社會...」說來我有少少慚愧...
「咁你呢?啊!你好似係項目經理喎!」
「啊!係啊...不過仲係構思緊,仲未落實...」
同佢比較,我真係覺得自己好差,一直以來我都認定自己係二世袓,甚至認定依個係自己既終生目標。大學畢業以來我都無認真做過一樣野,空有構思但一次都無執行過。眼前既佢就好似天使咁發出耀眼光芒,令我不敢直望...
「喂!Ken!你係度嗎?」
「啊!係度...咩啊?」我回過神。
「你送到我依度得喇,我屋企係附近咋!」
「哦...咁好喇,拜拜!」我有少少失落。
「拜拜!」佢轉身走,突然回頭講:「啊!你聽朝會唔會去冰室飲「走茶」啊?我大約七點半左右會係果度...」


「會啊...咁聽朝見丫!」
「好丫...咁聽朝見...拜拜!」佢又露出那殺死人既微笑跟住轉身走。
「Yes...」我興奮到叫左出來...