那夜,我在老蘭狩獵了天使: 第六章

「幾年前,阿珊啱啱出來做野無幾耐,係工作上識左個男人,初初佢對阿珊好好,幫左阿珊好多,就咁阿珊對佢有好感,之後兩個人就一齊左。但大約半年左右,阿珊發現左個男人原來已經結左婚,仲有個三歲既仔,重要既係人地老婆直接搵阿珊,仲要話阿珊...話佢係狐狸精,勾人老公...仲要當街打左阿珊一巴...之後個傻女困左自己係間房度差唔多成個月,出返來就成日問全家人自己係唔係好蠢,好傻...成家人都擔心佢,係最近依一年佢先出返來做野...」
聽完烏鴉講阿珊依段經歷之後,我完全唔相信自己耳仔。係我眼中,阿珊係個天真開朗,純潔無暇既天使,而家我個心好痛,心痛阿珊受到傷害。依一刻,我好想保護佢,好想令佢幸福,甚至顛到想搵果個男人出來幫阿珊報仇,依一刻,我好清楚自己真係真心真意愛阿珊...
「假如你係認真既,我希望你對佢好啲,你唔好睇佢平時好開心咁,其實佢扮嫁咋!個傻女唔想身邊既人為佢擔心,將所有野都收埋係心度,唉...希望你可以成為佢可以依靠既人啦!」講完慢慢轉身走,「啊!對唔住呀,打左你一拳,拜!」
老實講,我開始對佢改觀。
烏鴉走後,Patrick就行過來,問我:「點啊?無事嘛!」
「無事...」我用凍啤酒樽敷面,但比起面上既赤痛,都唔及我心既痛...
「嗯...係啊,你搵我有事?」
啊!我完全唔記得左我約左Patrick,不過,事到如今我已經唔再須要咩建議,我知我要做啲咩...
第二朝我同阿珊如常係冰室食早餐(今日佢無食野來,同我一齊食A餐),我問佢:
「你幾時放假?你可唔可以請幾日假?我帶你去玩丫!」


「吓?無啦啦請咩假啫?」
「你唔想去第二度咩?見識下嘛...」講完我知自己瀨野...
「見咩識啫?我都睇唔到,而且暫時都無地方想去...」
「咁你去過海灘未?橫掂而家仲咁熱,去下海灘吹下風都好...」
「細個仲睇到野個時去過兩三次既,嗱!事先聲明呀,我唔著泳衣嫁,我唔使你幫我查太陽油嫁!」
「得喇!你當我咩人呀?」
「咸濕佬囉...」佢好細聲講...
「咩話?」
「無野...咁我請假囉。星期五,我請星期五喇!」
「好,就星期五,勾個手指尾先!」


「仲細咩?唉...真係怕左你呀!」
依下係我地兩個隻手第一次接觸,而我亦順勢握緊佢隻手。佢無反抗,我知我既愛意已傳到佢心裡,依個時候達叔借啲依行過來:
「係囉,拍拖要拖手仔先叫拍拖嘛!哈哈哈...」
「達叔,你講咩呀?我...」阿珊怕醜地低頭,但隱若見到佢甜蜜既微笑。