《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 禍難之始
「唔安全？ 你指有喪屍？」 我回應呀朗既說話， 但我地入黎個陣根本見唔到有喪屍喎！
「個d係喪屍黎架？ 」 呀瑜掩住口好驚訝， 唔通佢地唔知？
「你地無見過喪屍咩？ 佢地成個火車站都係！」 海晴回應佢，
「我地以為係精神病人， 救護員講既感染者， 佢地係呢幢大廈地下個到， 我地只係行到二樓已經聽到有d怪聲， 所以從來無落過去。」 家瑜解釋點解佢地無離開呢到既原因。 呀朗再補充，
「聽你地咁講， 宿舍外面都有好多感染者既話， 我地可能要留係到等救援。 但係飯堂係地下， 無野食之下我地唯一爆開其他人既房去搵野食。」
「哦所以岩岩聽到既呯呯聲就係你地發出既…」 海晴恍然大悟咁講。
呀朗笑一笑， 「食物已經係最大既問題， 我地搵左好多房都無咩野食， 睇黎大家都慣左落飯堂食飯夠曬平…」
「之前同我地一齊走個陣， 有個乘客話我地知碼頭先係唯一既生路， 你地覺得政府撤退既路線， 會唔會就係碼頭個到？」 我將心中既疑問講出， 既然要走我地就必須有一個明確既地點去走。
「好大可能… 當初佢地話要帶走我個陣， 都係話要去港島既醫院…」 呀瑜回答我。
「呢到離碼頭都有一段距離喎… 況且過海我地要有船， 地面太多喪屍啦。」 呀帆亦都加入討論，
「你都岩， 依加火車站既喪屍同原來係城市入面既喪屍應該開始已經散布係每一個角落， 我地越遲出發就越遲走得到。」 我跟住就提出我既建議， 「不如我地搵左武器， 睇定情況就即刻去碼頭？」
「我同意， 可能樓下帳篷入面有方法聯繫到人黎救我地！」 呀朗興奮咁講。
但係既然政府走得咁突然， 到底仲會唔會有生還者？ 到底個陣發生左咩事令佢地要突然撤退…？
呀朗望向其餘兩人， 家瑜點點頭， 呀奇就終於打破沉默， 同我地講佢既想法。
「要對付你地講既喪屍， 要點樣做？」
呀帆聽完就答， 「喪屍梗係爆頭啦！ 但其實我地都未殺過喪屍， 最多只係推開佢地去逃走。」
「佢地會食人類？」
呀帆點點頭， 「係我地親眼見過佢地追住人黎咬， 跟住就食左佢。」
「即係只要佢地覺得係獵物可以食既， 就會追住我地？ 定係佢地會鎖定一個目標追黎？」 呀奇再追問， 我就答佢，
「雖然我唔敢講話一定岩， 但如果我地同時被喪屍見到， 佢地會追離佢地近d既人類， 同埋佢地係唔會停直到捉到我地或者有新既獵物吸引到佢地。」
我再補充我既想法， 「佢地都會被聲音吸引到， 岩岩我地走個陣試過掟罐汽水去前面引開佢地既注意。 我覺得唔好諗住殺喪屍住， 最好避開佢地同引開佢地注意。」
佢地三個點點頭， 跟住呀朗企起身就講，
「咁我地先落左去樓下飯堂個到搵食物， 再睇下有咩方法聯繫到政府人員啦。 」
我地係呢間房到搵多左個小型吸塵機， 呀帆拎左黎當武器用， 應該係推開喪屍掛。 呀朗拎住兩支長型既電筒， 家瑜有個網球拍， 呀奇就唔知點解有支鐵通， 唔怪得之佢地岩岩可以爆門。
我地呢邊就慘d， 得把較剪吸塵機同埋衣架， 睇落係完全無咩用…
我地準備好， 就開始向地下進發， 我留意到呀奇一直望住家瑜， 唔通佢地係男女朋友既關係？ 不過睇落佢地又無咩親密行為， 可能只係單純朋友姐。 呀朗睇落就好似佢地既發言人咁， 但佢地既行動永遠都係三人商量好先， 並唔係跟一個領導者。
但帶頭既係呀朗， 跟住係呀帆， 我同海晴就係家瑜同呀奇前面。
經過岩岩既經驗， 好快我地就落到去二樓， 同佢地講既一樣， 我地已經聽到一d怪聲…。
「呃哼哼哼哼哼哼哼…」
「噓── 」 帶頭既呀朗舉一舉手示意我地停一停， 漆黑之中我地只可以見到好少既範圍。 周圍只係傳黎怪叫聲， 但並無人影向我地行黎。
呀朗再揮一揮手， 我地慢慢一步一步落去地下既飯堂， 落左樓梯之後我地要轉一個灣先到到飯堂， 我地舉起電筒， 慢慢咁照向轉角既飯堂。
見到既…
係一片凌亂。
飯台同櫈一地都係， 好似被喪屍入侵過咁， 所有野都好亂。
呀朗慢慢將燈光向上照…
飯堂既收銀處都係一片凌亂， 電子牌既menu已經停左電， 我正想行去收銀到睇下有冇咩野可以拎黎用既時候，
「呃哼哼哼哼哼哼哼哼哼哼…」
海晴突然拍拍我膊頭， 叫我望下另一邊。
我轉頭望向飯堂另一邊， 見到既係幾個透明既帳篷係飯堂中間， 帳篷有拉鍊係到， 可能係用黎隔壁感染者？
但係拉鍊已經打開左…！
呀朗將燈光都照向飯堂另一邊， 佢地呢個時候都發現在帳篷， 當我地正想繼續前進既時候， 呀朗再將電筒照向飯堂盡頭， 個到…
有一個個既人影企左係到。
「嚇！！」
海晴被突如其來既畫面嚇親， 細細聲咁驚叫左一聲， 雙手捉住我手臂， 同時我舉起較剪，
好在呀朗反應快， 佢一見到人影就將我地既電筒光搵手掌遮住， 我地唔敢亂行， 驚發出聲音引到喪屍， 一時之間只可以企定定係到。
汗水再次侵襲我全身， 緊張感令到我心跳加速， 依加要做既係慢慢退去… 上返去就無事既…
「呃哼哼哼哼哼哼哼哼哼哼…」「呃哼哼哼哼哼哼哼哼哼哼…」「呃哼哼哼哼哼哼哼哼哼哼…」
前方傳黎既怪叫聲比岩岩大十幾倍， 就好似包圍住我地咁。 我地六人企埋一堆， 係飯堂既中心無助咁唔敢行。 周圍再傳黎行路既聲音， 聽落應該係喪屍係到無目的咁遊蕩。
天呀， 究竟呢到有幾多感染者係到…
到底應該點做… 出聲一定會被喪屍發現， 只可以用手勢同大家交流， 如果我地可以無聲無色咁慢慢行返樓梯口… 應該會無事既…
但係呢到咁黑， 我地根本唔知喪屍係邊到， 聽喪屍既叫聲好似包圍住我地， 萬一退後個陣撞到喪屍咁我地全部人都實死無生。
喪屍既習性我地完全唔熟悉， 對佢地既了解只係基於我地睇戲既想像， 完全唔可以作準。 如果我地強行跑走既話… 我地一定唔可以全身而退…
究竟點算好…
周圍一片黑暗， 只有飯堂既窗帶住少少既月光照射， 但幾乎係伸手不見五指， 我地郁都唔敢郁， 我腦海飛快咁轉動想搵出安全既方法逃走，
但我乜都諗唔到。
係我仲諗緊既時候， 呀朗慢慢踎低， 同時單手揮向下， 示意我地嘍住佢慢慢咁踎低， 憑住微弱既燈光我勉強見到佢既手勢。 我都拍向海晴佢地膊頭按低佢地， 之後等呀朗既指示。
呀朗回頭將一隻手指放係嘴唇， 提我地唔好出聲， 一隻手舉起三隻手指。
兩隻手指。
佢係到倒數？ 佢想做咩…
一隻手指。
呀朗拎起岩岩放係地上既電筒， 成個人彈起， 用力將電筒掟向飯堂遠處既玻璃窗！
「嗖──嗖」
電筒係飯堂空中飛過。
「呯────────────────────────！」
撞擊聲震撼我地每一個既耳朵。
「哐噹！」
窗口滿佈裂痕， 電筒既光照亮飯堂既另一邊， 幾個喪屍被小小既電筒光由下照上去， 見到蒼白既皮膚加上青筋， 變得極其恐怖。
「呃啊啊啊啊啊啊啊！！」
「吼啊啊啊啊啊啊啊啊啊啊啊啊啊啊─────！！！」
四周響起喪屍既吼叫！
「走！」 呀奇叫左一聲， 掉頭就跑！
我地六人烏低身急步咁跑， 希望盡快離開飯堂， 身後傳黎喪屍既吼叫同跑步聲同撞擊聲， 我已經分唔清係咩， 只係緊張咁跟住呀奇走！
我無時間回頭望， 只係係咁跑， 希望可以快d去一個安全既地方。
「呢邊！」 呀奇拖住家瑜跑， 行出飯堂之後無上樓梯， 反而轉彎跑去另一條走廊！
「吼啊啊啊啊啊啊啊───！！」
後方傳黎喪屍既叫聲！ 應該係有少部份喪屍無比電筒引開！ 所以跟住我地！
我地係咁跑無回頭， 好快就跟住呀奇轉入走廊， 佢好快就轉左跑入一間房入面！
「快d入黎！」 我岩岩跑入房， 黎唔切睇周圍既環境， 後方就傳黎碰撞聲。
我望向門口， 見到呀奇頂住道門， 但門縫有一隻手臂伸左入黎！
「我打開道門！ 你一下推走佢明唔明！」 呀奇急急咁講！
「得！ 我數完三二一你就開門！」 我即刻拎左家瑜個網球拍， 跑去門邊。
「小心呀！ 佢成隻手臂伸左入黎啦！」 海晴係後面焦急咁講。
「準備好未？ 我開門架啦！」 呀奇問我，
「咪住…！」 我吸一口氣， 「得啦！ 三！ 二！ 一！ 好開！」
「吼啊啊啊啊啊啊啊啊啊啊啊啊─────────────！！！」
「啊啊！！」 我拎住網球拍， 助跑完之後全力推向出面喪屍既心口！ 「推到啦！！」
喪屍被我一下推左出門口跌係地， 但係佢隻手及時抓住門口既邊邊， 並無完全跌落地！
「呃啊啊啊啊─────────────！！！」
喪屍只係跌低左少少！ 但並無被推出好遠！
「屌唔得呀！ 閂門呀！ 快d返入黎！ 快！」 呀奇緊張咁大叫， 一邊想推埋道門一邊叫我行返入去！
喪屍拉住門邊爬返起身， 同時身體頂住左道門， 之後張開雙手想撲向我！ 但唔夠遠所以雙手抓向門口既兩邊想撲入黎！
「啊屌！」
我再次用盡力拎起網球拍想推開佢！但喪屍力量好大！推極都絲毫不動， 佢隻左手轉移抓向我隻手， 右手繼續捉實門邊！ 血盆大口仲慢慢咁接近我雙手！
「佢要入黎啦！ 快d撞佢出去！」
「快d用力將佢推出去！」 呀朗跑去我身後推我！ 希望可以將喪屍推出門口閂門！
「吼啊啊啊啊啊啊啊啊啊啊─────！！！」
「等我黎！！」 本來推緊個櫃去頂住道門既呀帆大叫一聲， 拎起把較剪插向喪屍頸部！ 較剪插入左少少， 但喪屍並未死！
「咳呃啊啊呃啊啊啊！！」
呀奇放棄閂門， 行過黎將喪屍捉住門口既手指一隻一隻咁掰開！
「得啦推走佢！」 我用力推向喪屍！ 加上呀朗係後面出力， 我地 終於推開左佢！ 網球拍同喪屍一齊飛出去！
「呯──」 「呃啊啊啊啊啊啊」
喪屍被我地推左出門口撞向走廊牆上面， 但係…
「踏踏踏踏踏踏踏踏踏踏踏踏踏──────────────────」
網球拍飛正係門口出少少， 我馬上執起佢， 同時向走廊既右邊望過去…
走廊盡頭有幾個喪屍跑緊過黎！
「吼啊啊啊啊啊啊啊啊啊啊─────！！！」
「閂門！ 快d閂門！」 呀朗一手扯我返入房， 同時呀奇將門一下閂埋去！
「吱嗄嗄──────────」 「呯────」
係門即將閂到個陣， 一隻手掌再次伸左入門縫… 劇烈咁掙扎想拉開道門！
「屌！」 呀奇忍唔住屌一聲， 呀帆即刻走去想推隻手出門縫…
依加點算好… 開門既話隻喪屍一定會想衝入黎， 推走佢又要時間！ 到時走廊另一邊個幾隻喪屍一定會跑到黎！ 到時我地一定比喪屍衝曬入黎咬死！
如果唔開返門， 我地就整唔走出面隻喪屍， 就閂唔到門！
呀奇諗都唔諗， 拉開返門想推喪屍走， 呀帆扯開左喪屍隻手再出力推喪屍出去！ 但係門外多左隻喪屍！ 有兩隻係到！
兩個喪屍既力量始終都係比佢地大！ 一時三刻佢地推唔郁佢！
「踏踏踏踏踏踏踏踏踏踏踏踏踏踏踏踏───────────────────────────」
門口右邊傳黎喪屍既跑步聲， 越黎越近…
呢一刻我完全唔知應該點做… 我只有跑埋去幫手希望推走隻喪屍… 當我撲到去呀奇呀朗個到既時候， 右邊既喪屍已經清晰可見， 離我地只有四、五米咁跑緊過黎…
腦海一片空白… 呢一刻我地只能盡力推開喪屍… 希望可以推走佢地…
「呯── 呯── 呯──！！」
呢個時候頭上傳黎幾下呯呯聲， 同時我被聲音耳仔好痛個人好暈… 一直同我地角緊力既重量亦都突然消失左… 岩岩既係槍聲…？
「扑── 扑嗵──────」
「喂快d 返入黎！ 閂門！ 搵野頂住道門！」 我地三個被岩岩既槍聲搞到暈暈地， 但係係生死關頭都儘快邊跑邊爬返入房。
入房後身後傳黎閂門聲， 呀帆同一個人影都搬左個櫃去門口頂住。
「啪啪啪啪啪啪啪啪───────────」
「呼──── 嗄嗄──── 嗄嗄──── 」 我地幾個坐係地下到喘氣同捽下耳仔， 同時望向企係我地面前既人影…
「你地係呢到既學生？」 人影傳黎陌生既女聲， 靠住電話既燈光勉強可以見到一套醒目既淺藍色恤衫同黑色褲， 佢… 係警察！