《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 撒離中回憶篇
「係咁既， 今日我地岩岩出完街， 諗住返宿舍... 」
「但係返到宿舍之後， 突然間全校響起一個廣播，
『... 以下係由聯合新聞中心發出既警告， 香港現已實行第三級應變措施。 基本上，緊急情況是指︰ 任何需要迅速應變以保障市民生命財產或公眾安全的自然 或人為事件。 危急情況或災難則指︰ 嚴重危害生命的事故，通常突如其來，可以或可能引致的 傷亡情況超出政府救援部門的正常處理能力。
第三級應變措施現已生效， 行政長官保安事務委員會現已實施第三級應變措施， 直至另行通知， 地點偏佈整個九龍半島。
重複：香港進入緊急情況， 因遇上重大的事故，以致對市民生命財產及公眾安全構成重大威脅，政府將全面展開救援工作，請各單位配合民政事務總 署合作，協調緊急救援工作，特別是幫助災民獲取各政府部門的全面協 助， 以便撒離九龍半島。 』
當時我地聽到既信息就只有咁多… 我同呀奇係住埋同一間房既， 家瑜就係另外一層， 我同呀奇商量左之後決定只係拎左隨手既貴重物品， passport呀電話呀電腦呀個d， 衫呀其他野就唔帶， 就開始打比呀瑜， 同佢講叫佢等埋我地先一齊落去。
出左房門之後， 我地先知成個宿舍都開始騷亂， 好多人都係到講緊到底係咪真同發生咩事， 會唔會係第三次世界大戰呀， 恐怖份子要炸香港呀， 定係核幅射洩流咁樣。 甚之有人拉埋行李出黎， 當大家仲係到討論既時候， 外面已經傳黎警車聲…
「嗚嗚────────嗚嗚────────嗚嗚────────嗚嗚────────」
我地幾個望向窗外面， 見到樓下黎左好多警察， 其中一部份仲係防暴警察。 佢地開始係樓下個到擺低好多鐵馬， 好似呢到有人示威咁樣， 學校既職員亦同警察溝通緊， 睇黎岩岩廣播個個咩應變措施， 要我地離開九龍係真既。
我地跟住大家一齊落樓， 落到去已經有好多人係到， 人山人海水洩不通。 我地被迫停係大樓地下既走廊到， 根本行唔出去亦唔知發生咩事， 只好跟住人群慢慢等。 其間我地聽到有人用大聲公係到講， 叫我地保持冷靜同守秩序， 好快就可以跟住離開呢到。
周圍既人有d咩住背囊， 有d拖住行李， 成個情境就好似返大陸過關一樣。 係等緊出去既時候， 好多人都係到用電話上網， 睇下新聞知唔知發生咩事。
我地聽到隔離既人係到睇緊新聞既直播，
『依加係九龍正係實施緊第三級既應變措施， 係香港第一次實行呢個既措施。 據保安事務委員會既發言， 是次應變措施係因為九龍區出現病毒事件， 將會對市民生命財產及公眾安全構成重大威脅， 所以不得不啟動此措施。 但當局並無詳細解釋病毒事件， 令唔少市民既恐慌情緒都開始加重。』
『岩岩我地收到本台記者發黎既信息， 政府聯合新聞中心將會係一小時後舉行發佈會， 解釋為何要實行第三級應變措施以及詳細既應變程序， 目前請市民先按照指示有秩序地轉移到政府指示既安全地帶。』
「哇到底發生咩事呀， 我打比爸爸媽媽睇下佢地點先」 呀瑜同我地講聲就開始打電話， 我同呀奇亦都打個電話比屋企人， 可惜線路繁忙打唔通。
係我地前面又係人， 後面又係人， 成個環境根本又熱又焗， 但我地只可以跟住排， 希望快d離開呢個熱死人既地方。
排左唔知幾耐， 我地終於到左宿舍既門口， 個到有一大班警員係到， 每一個都神色凝重， 佢地並唔似平時既警察一樣， 佢地每一個都散發住一種威武同可以令你信賴既感覺， 睇黎佢地就係為左呢個應變措施而出動。
行到去宿舍門口， 有警察指示我地跟住行落去街道個邊， 我地跟住鐵馬同欄杆， 跟住大隊一步一步行落樓梯， 落到街口個到。
街口個到搭起左一個個白色既攤位帳篷， 而路邊則泊左好多大型既旅遊巴、警車同救護車， 街邊都企左d防暴警察係到， 佢地高舉盾牌戒備住。 警察叫我地拎定身份證出黎， 係帳篷前面有鐵馬阻住我地，直到有警員帶領我地先可以行入去。
雖然我地好多疑問， 但警察只係回答我地呢個係緊急既應變措施， 只要跟足程序好快就可以撒離九龍， 但到底發生咩事就隻字不提。
白色既帳篷入面只係好簡單咁佈置， 入面有好多學生係到。 周圍放滿左台同埋櫈， 每一張台都有救護人員係到幫學生做檢查。
我地企係門口， 門口有個好似海關咁既工作台， 個到有工作人員比左份表格我地填， 要填自己既簡短既個人資料， 之後佢核對好身份再用鏡頭幫我地影一張大頭照， 就再係到等。
等左一陣之後， 我地就分別被工作人員帶去唔同既台到， 佢地幫我地做左簡單既檢查， 量下體溫等等， 之後就抽左我地少少血， 應該係拎左去化驗。 之後就帶左我地去另外一個帳篷入面等。
入到去又係好多人係到， 入面大部份都係學生， 少部份係學校既職員。 每隔一陣就有工作人員入黎叫名， 之後就帶佢走出帳篷， 應該係帶左佢地出去旅遊巴到， 開始離開九龍半島。
依加正值夏天， 帳篷都係又熱又焗而且無燈， 我地只可以靠出面既陽光去睇野。 而同圍既人都開始有d抱怨。
「得未呀… 搞咁耐架…」
「咪係囉， 又唔講咩事， 又要抽血又盛咁」
「香港唔係發生咁大件事下話」
「好熱呀…」
「我仲係打唔到比我屋企人呀… 唔知佢地走左未…」呀瑜同我地講， 呀奇搖搖頭表示唔知， 我就安慰佢話政府有曬應變措施， 佢地同我地都會無事既。
等左一陣終於聽到我同呀奇個名， 工作人員都準備帶我地出去， 我地心諗終於走得啦， 點知…
點知呢個時候有救護人員入黎， 佢地...
佢地要帶走家瑜…
「呢到發現左一位感染者， 請派一架救護車黎旅遊巴個到。」
個救護人員行黎家瑜面前， 拎出對講機要求增援。 然後就想帶走家瑜， 我同呀奇見到狀立刻上前，
「你要帶佢去邊？」
呀奇行去救護人員前面擋住佢去路， 我就行去呀瑜身邊，
救護人員回答， 「呢位小姐未能通過我地既測試， 佢可能係病毒感染者， 我地唔可以比佢同大隊一齊上旅遊…」 佢未講完呀奇就已經打斷佢既說話。
「咁即係點？ 即係佢唔可以走？」
呀奇越聽越激動， 甚之想出手拉住個救護人員。 雖然佢平時比較沉默少講野， 但只要係關於我地既事佢都會義不容辭咁企出黎， 但佢有時的確係比較偏激。
「呀奇你冷靜d先啦， 聽埋佢講先啦，」 我轉頭再問救護員， 「呀瑜唔可以上旅遊巴咁佢依加要去邊？」
救護員望一望我， 就答 「我已經叫左同事黎， 我地先會帶呢位小姐去另外既地方等， 之後等到救護車黎就會送佢去離島既醫院作進一步既檢查， 仲有冇問題？」
「咁我地可唔可以陪佢去醫院？」
我實在放唔低呀瑜自己一個， 呀瑜份人不嬲比較柔弱， 我同呀奇無可能掉低佢自己一個。
「滋滋滋──」
呢個時候救護員既對講機響起， 聽見佢講幾句之後， 佢就點點頭好趕咁行出帳篷。 呀瑜雖然有d驚， 但都跟住行出去。
就係咁我地三人就跟住佢去到另一個帳篷入面等。
我地等左陣， 就有人帶我地上返上宿舍個到等， 係宿舍大樓入面既醫療室到等。
「結果就等到依加？」
海晴向佢地發問， 而呀朗就點點頭。
「走唔切既意思係… 最尾救護車都無黎到？」 我再次追問， 因為佢地係最後見過政府救援人員既人， 如果最尾救護車都無黎到既話…
「係… 我地三個就係由今日晏就等到依加， 當我地等到唔耐煩想走個陣， 先發現宿舍並唔安全， 所以唯有留係到。」