《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 抉擇

「嗶嗶───」

Madam行去一個黑色既私家車到， 拎條車鎖匙打開車鎖， 就行去駕駛座個到。

Madam架車唔係警察個d衝鋒車， 只係一架普通既私家車， 所以應該只係坐到五個人左右…

「呀Madam， 我地有七個人喎… 點坐呀？」  呀帆同madam講，

「我都知，  但係我得一架車渣， 迫迫地坐埋入去啦。  呢到去碼頭好快姐。」





「一係搵兩個瘦既坐車尾箱頂住先囉， madam渣慢少少應該無事既， 反正呢到周圍都無車。」 呀朗提議咁做， 我地望一望四周， 真係一架車都無…

猶如一個死城。

「雖然聽落好癲， 但都無計啦唯有咁做」 家瑜都贊成…

由於我係比較瘦， 我梗係覺得坐車尾箱既會係我…

六人當中， 呀朗最為高大， 跟住係呀帆同呀奇， 而家瑜都比海晴高， 我就同家瑜差唔多高。





「海晴最細粒， 咁你同海晴坐車尾啦， 無謂兩個女仔坐後面啦係咪先」 呀帆講完就打開車門，

「反正你同家瑜都差唔多size姐， 有個男仔照應點都好d既」 Madam都係咁講。

結果就呀帆坐車頭， 呀朗三個坐後面， 我同海晴就打開車尾， 吊住對腳係出面dup低頭勉強坐到入去。

本來坐車尾箱係好慘既， 不過可以坐係個女仔隔離， 我都好期待。

自從大學拍過一次拖之後， 畢業之後我都好少有諗過拍拖呢個念頭。 由開始做野直到習慣左每日返工放工既生活之後， 我追求既唔再係戀愛同埋物質生活， 而只係安安定定既私人空間。





其實真係唔知幾時開始， 我再唔在乎身邊既所發生既小事。 開始遇到不幸、 令我唔開心既事， 都唔會再好似中學咁燥底， 企硬同人嘈。

而係同自己講， 無必要唔甘心， 只要學習接受就好， 無必要咁麻煩啦。

返左工之後我開始明白， 其實我只不過係社會上既一個微不足道既人。 只係返工先令我有一d價值， 令我覺得我被人需要， 但同時亦都明白我只係其中一粒微塵。

就算有開心既事， 都會覺得開心既事並唔會一直留係我身上。

甚至覺得， 除左屋企人， 已經無咩對我黎講係重要。 有時候我甚至會諗， 如果我屋企人病死既時候， 我會唔會犧牲自己既性命換佢地返黎？

我既答案係， 會。

但係今次喪屍病毒既危機， 當面對喪屍既血盆大口， 當死亡離我近在咫尺， 我發現我地可以做到既野其實比我想像中更多， 只要我地唔放棄。

呢次感染爆發令我更似返我想成為既我。





我一下跳上坐上去車尾箱， 之後就到海晴。 其實我岩岩諗左一陣， 到底應唔應該同海晴多d交流， 但我又怕。 諗下諗下都係決定遞隻手比佢， 扶佢上黎。

我唔想同佢既溝通消失， 所以我決定係我地疏遠之前同佢有d交流。 但同時我亦都唔敢諗咁多， 幻想太多只會失望。

我只係想開開心心咁做我想做既事。

今次算係我同女仔好近距離既一次接觸， 我感受到海晴既體溫。 我地大家既手臂同貼得好近。 同佢既接觸令到我心跳加速， 思緒都飄得好遠好遠。

「啪嗒────」

佢地關上車門， 車上傳黎既輕微震盪令我同海晴既接觸又多左， 海晴豪無疑問係一個好靚既女仔， 能夠同佢如此接近已經令我感謝上帝既幫助。

「我地行啦， 坐穩啦！」





Madam既聲音係我地後方傳黎， 而我地係背向車頭咁樣坐係車尾箱到。

直到呢個時候我先有時間好好咁觀察身邊既女仔， 而最令我著迷既係佢除左係佢漂亮既外表， 仲有佢可愛既性格。

其實一句講曬， 毒撚好易動情。

我諗我會想去保護佢， 希望引起佢注意， 令到開心笑我已經好開心。

「滴答─滴答─滴答──」

街上柔和既街燈照射係我地身上， 紅綠燈有節奏咁響， 呢一刻世界好似只得我同佢。

有時轉彎個陣， 海晴既身體會靠係我身上， 令我心如鹿撞。

四周既街景係我地身邊徐徐落過， 車箱中隱約傳黎大家既對話聲， 身邊既環境係前所未有咁和平。





彷彿令我忘記左眼前既危機一樣。

「海晴， 你攰唔攰呀？」 笨拙既我想打開話題， 但無奈我實在諗唔到點樣開始。

「好眼訓呀， 但我仲頂得住既。」 海晴望住街外， 徵風吹過佢秀髮， 呢個畫面真係好靚。

「跟住落黎我地應該點做？」 估唔到既係海晴會繼續同我講野， 仲主動問我。

「照情況睇九龍應該已經係被政府封鎖左， 而港島應該係安全既區域。 只要我地跟住警察去到港島， 到時就會有人保護我地， 我地就會安全架啦。」

我慢慢咁同海晴講出我既諗法， 希望佢能夠安心d。

「如果跟住落黎去到港島都無人救我地咁點算好…？」 佢轉頭望住我， 水汪汪既雙眼凝視住我，





佢真係好靚。

「唔會既… Madam講過政府依加係港島架嘛…」 其實我都唔知究竟有無人會黎救我地， 但係依加我只能夠安慰海晴。

「如果港島都無救援既既話， 我會去搵佢地返黎。」 唔知邊到黎既勇氣， 我向海晴許下左一個承諾。

「頭先madam都話左啦， 九龍呢到本來都係有救援， 但係無啦啦唔見曬。 可能依加成個香港都係喪屍…」 海晴dup低頭咁講。

見到佢唔開心， 我都唔知點安撫佢既心情， 只能夠係腦入面不停咁諗d句子想辨法去， 但奈何平時唔多講野既我呢一刻都係唔識講野。

「唔知… 佢地依加點呢…」 海晴細細聲咁講。

「佢地？ 你屋企人呀？」 我記得海晴話佢屋企人住係何文田， 好似。

「吓？ 係呀， 唔知我屋企人依加點呢…」

「佢地一定無事既…」

…

毒撚即係毒撚， 到左有喪屍都係做話題終結者。

話說海晴咁靚女… 唔知佢有無男朋友呢…

不過算啦， 我都係唔夠膽問佢， 總會有更合適既時候問既… 加上如果佢有男朋友， 我又可以點呢？

我地沿住馬路一直駛， 馬路兩邊一邊係岩岩我地出黎既宿舍， 另一邊就係我地係入面逃出黎既置富商埸， 不過係商埸既另外一邊。

抬頭望過去我隱約見到位於置富商埸後面紅館既身影， 依加紅館並無著燈， 完全渺無生氣。

右手邊係商埸隔離有一間酒樓， 酒樓上面有個大招牌寫住彩福皇宴， 以前我都成日同家人黎呢到飲茶， 如果能夠再返返以前既日子就好… 希望能夠搵得返佢地啦…

「隆隆───」

「呀！！」 我馬上捉住身邊既車邊， 而海晴都捉住我既手臂， 並輕輕叫左一聲。

架車好似車過d野咁， 突然間震下震下， 我同海晴都差d跌落車，

「滋依─────」

好彩架車好快就停左， Madam好快就打開車門出黎。

「發生咩事？」 海晴不解既眼神望向我， 我都唔知咩事， 唯有跳出車尾箱行去前面睇下。

我立即望向車頭， 直到見到大家都行出車廂， 確認前面唔係有喪屍之後我就放低戒心， 行去車頭。

「Madam做咩停車？」

佢地全部都企曬係車頭個到， 我一時之間睇唔到前面發生咩事， 唯一急步行上去望下前面既路。

前面既路， 裂開左…

係架車前面既路， 已經裂開左一大條。

四周好多灰塵， 本來車前面小小既裂痕， 漸漸延伸到前面， 跟住裂痕開始擴大， 前面既馬路開始係裂痕既四周碎開成一塊塊石屎， 同埋有好多灰。

而中間有一條大裂痕一直向前方漫延， 兩邊既行人路都有碎開， 情境就好似發生左一埸激烈既爆炸一樣。

到底發生左咩事？

馬路兩邊既建築物都沾有輕微既灰黑色， 但睇落尚係完整。

「應該係地底既煤氣喉爆左， 引致大規模既爆炸同地陷…」 Madam觀察完之後作出呢個結論。

「呢到睇落好危險， 我地快d掉頭走啦， 應該有第條路去碼頭架嗎。」 呀帆催促我地掉頭走。

「其實我地過紅磡海底隧道去港島咪仲易？ 去到碼頭我地未必有船去港島喎。」 呀朗突然提出去紅隧， 我地一直都無諗到可以渣車去港島， 因為陸地上實在可能有更多既感染者。

「你地覺得依加情況會唔會係向壞個方面發展， 可能係九龍太多感染者所以有軍人介入， 直接開始炸左黃埔？」 我提出我既假設， 如果係既話我地再留係到就好危險…

Madam再向前行左幾步， 之後講， 「唔係， 軍人無炸到黃埔。」

「應該係… 佢地炸斷左所有既海底隧道。 我地已經… 被孤立。」

 

  
 
 
 
 
 
 
 「唔係下話…」 呀帆o左嘴咁望住條路， 「搞咩呀大爆炸呀…」

「但係我地本身都係諗住去碼頭架姐， 同我地計劃無衝突既。」  家瑜講得好岩，

「係咁既話政府應該係打算只係保住港島先， 睇黎情況已經好惡劣， 令到佢地要放棄九龍呢到。」 呀朗再講。

「咁換言之即係話呢到有好多喪屍？」 呀奇問道。

「又或者係… 比喪屍更恐怖既野， 係依加既政府對付唔到既怪物。」  我完全想像唔到我地將要面對既… 係咩。

「上車啦， 我地照原定計劃去碼頭， 留係到越耐越危險， 我地完全唔知道我地要面對既係咩， 既然連政府都選擇放棄呢到， 所以我地都係快d離開比較好。」

「話說Madam你係咩警察黎架？」

「我係交通部執行組既沙展， 即係警長。」

「哦所以你就負責疏散我地…」

「係呀， 上車啦」

Madam講完就行返上車， 我地都跟住上返車。

出到黎外面， 係街燈既映照下我終於睇得清madam個樣。 Madam睇落並唔年輕， 應該係三十出頭左右啦， 短頭髮同五官端正， 佢都唔矮， 只係比呀朗矮少少。

佢都係同普通警察一樣著住藍色恤衫， 深藍色長褲， 有一條黑色既粗皮帶， 係上面有各種既裝備， 同埋一對黑色短靴。

佢成熟淡定， 比人感覺係一個可靠既警察。

好快我地上返車， 架車黎左個u turn就直接掉頭走， 由於依家我地係唯一一架行駛緊既車， 所以我地見路就行， 務求以最快速度去到碼頭。

又坐返去車尾箱， 我地再次踏上旅途。

究竟無個人意識既感染者， 點樣可以威脅到齊曬武裝既警察？

原來… 我地離答案已經好近…

「你覺得， 權哥係咪一早已經知道紅隧會被炸斷？」

海晴突然間問我， 我諗返起之前權哥所講過既野…

「咁我有同你解釋下，第一，呢到已經被喪屍發現左，完全係唔適合留係到。」

「而岩岩係車廂你地都見到我殺左兩個喪屍， 而且應變能力都唔差。 去碼頭既路上有危險我會盡力保護大家，但我唔能夠證你地全部人既安全，不過我會為大家判定邊條路係安全，係危險情況應該做咩野。如果都係唔同意既
話， 我會自己前往碼頭。」

「最後，我可以保證，碼頭係我地逃生最大既機會。 」

「好有可能權哥一早知… 唔通權哥都係政府既人？」  可惜呢一刻我地已經同權哥失散左。

海晴搖搖頭 「我都唔知。」

我地再次兜去宿舍另一邊既馬路， 周圍開始出現住宅區同埋餐廳， 附近仲有間薩利亞係到。

我地沿住馬路一度行， 好快就去到紅磡道， 再過到十分鍾左右就會到碼頭。

但係… 呢個時候左右兩邊既行人道傳黎一聲聲詭異既叫聲。

「嗷嗷────」


「嗷嗷嗷嗷嗷嗷────────────」


聲音就好似包圍住我地一樣， 一時之間令我地覺得自己好渺少。

「喂Madam前面地下有野訓左係到！」 呀帆大叫。

「喂Madam小心！」 呀朗大聲咁叫。

「滋依─────────」

我地架車急速咁剎停左。

「呯──────！！」

架車右邊好似被硬物撞向車門！

「吼吼嗷嗷嗷嗷嗷嗷嗚嗚嗚嗚嗚嗚嗚嗚嗚────────────」

下一刻， 眼前睇到既野天旋地轉， 我個頭撞到硬物， 意識隨之空白。