《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 新的開始
話口未完， 軒少惡狠狠咁望住潘sir， 但潘sir視若無睹繼續講， 唔通軒少真係有船？ 而架船係同潘sir有關嘅？ 但係無咩可能， 佢哋應該唔識對方架喎…
「點樣？ 大家係呢件事上一唔一致？ 係咪都決定唔等救援自己走？」 潘sir雙眼橫掃在座每一位， 我望向旁邊嘅幾人， 只見海晴都望住我， 我都下唔到決定。
呀豪開口， 「我同我女朋友都同意跟潘sir你走， 你兩個呢？」 呀豪講完問向我同海晴， 海晴轉頭問向我， 「你覺得呢？」
我諗咗一諗， 「如果佢哋都跟住走嘅話， 照計軒少成枝槍喺到喪屍應該殺唔到我哋掛， 我覺得跟返大隊一齊行動比較好， 況且唔知幾時先有人會黎。」 海晴點點頭， 回應潘sir， 「我哋兩個都贊成一齊走。」
潘sir聽完應咗聲好， 之後望向在埸第二勢力， 軒少同權哥。
軒少一改常態， 收起剛才輕挑嘅態度， 用冷漠如冰嘅眼神望實潘sir， 從佢眼中睇得出佢好唔滿意潘sir嘅話語， 我越係咁我越係覺得佢哋兩個之間有啲野。
軒少啡金色嘅瀏海掩蓋住佢嘅左眼， 令佢顯得格外陰森， 佢冷冷咁回應潘sir， 「死差佬你想玩野？」
潘sir呆一呆， 之後一面認真， 眼神就似回應軒少， 你以為我玩唔起咩？
潘sir開口回應， 「玩野？ 我哋警察唔會玩野。」
「我哋好講道理架，若果你要唔講道理嘅話， 我哋都唔會同你客氣架啦。 軒少你都好明顯係講道理嘅人啦。 睇番曬成件事， 其實係由在座呢兩位引起， 我知道大家都唔滿意大家， 邊個著邊個唔著都好， 我都好希望最好可以和平解決件事。」
「潘sir講得岩， 我只係不滿你有能力又唔幫自己人， 收收埋埋咁自私者， 仲要中傷我女朋友我哋話曬坐埋同一條船， 一定要槍口對外… 」
「…不過出面幾把槍隊過黎， 咁多喪屍殺到埋身， 軒少就耍我哋太極， 明明有槍有船都只係自己用， 要我哋自己撐自己， 係咪有啲唔岩數先？」 呀豪迎合潘sir嘅合吻同話語， 唔再同軒少硬碰硬， 而係用講道理嘅方法迫軒少就範。 我對軒少嘅認識接近零， 依加只希望經驗老到閱人無數嘅潘sir同口才唔差嘅呀豪可以搞得掂軒少， 如果唔係迫到軒少發起癲黎， 我絕對覺我佢會開槍射我哋。
「呀豪仔就講得岩啦， 依加我諗大家都係想保住條命仔姐， 大家都想和平共處， 我一向都唔贊成打打殺殺， 所以我做咗高級督察之後， 一向都教啲新人唔好同人霎氣。 依加大家咪開心見誠一五一十拆掂佢囉。 」
潘sir將呀豪同我哋包裝到成為受害者咁， 暗示搞事嘅人從來只係軒少！
「本來我同軒少就三唔識七， 我好聲好氣請教佢， 點知佢想博出位係到挑釁我哋呢邊嘅人， 又搵槍指住我。 之後仲不斷下下追擊我、 又滋擾我女朋友。 雖然我知道你係黑社會， 我只係普通打工仔， 唔夠你威風， 但你係咁咬住我唔放， 我點能夠唔嬲先！」 呀豪講到七情上面， 潘sir笑意更濃， 點點頭望住一言不發嘅軒少。
「頭先光頭佬話大家一齊入黎傾， 軒少你都同意咗我哋係同一隊人先入黎一齊傾架啦。 既然係同一隊人， 你有實力好應該保護其他人。 好似光頭佬咁揪得， 唔比佢出手打喪屍就徙咗啲…… 不過呢個世界牛唔飲水唔撳得牛頭低， 你哋係唔出手， 我都吹你哋唔漲。 講到明夾份生存落去， 軒少你輸打嬴要， 我都無計！」
本身正係氣勢迫人， 面子大過天嘅軒少突然被對方咁奚落， 佢點能夠吞得落呢啖氣？
一旁嘅coco姐、海晴、 我、 陳晉同權哥都係到食花生， 睇住兩個講野把口溝咗油咁款去圍攻軒少， 而權哥都無出口幫自己人， 可能佢本性唔多野講， 又或者仍都覺得軒少氣焰太盛， 做事有啲過份。
海晴細細聲喺我耳邊講， 「喂佢哋咁樣會唔會激嬲軒少架？ 軒少一句野都唔講， 好似好嬲咁。」 我望一望軒少， 佢真係靜曬， 收起曬笑容， 只係死死咁望住潘sir。
我細細聲喺佢耳仔應返佢， 「無事掛… 話曬潘sir都係警察， 佢點都唔會殺警察… 掛…」 講真， 我完全唔知應該點做， 只能夠坐係到睇住佢哋嘈。
雖然軒少依加唔洗出手， 但比佢哋咁講法睇得出佢已經忍無可忍， 不過佢依然保持住冷靜。 我心中可以肯定， 軒少發作之時， 勢必捲起千重巨浪！
軒少真係全無辦法反駁？ 唔會， 我相信軒少心中一定默默盤算緊， 稍為用用腦都睇得出軒少絕對唔係個種無所謂嘅人， 只要有人夠膽得罪佢， 佢一定會對返佢轉頭！ 可以肯定嘅係佢一定唔會就咁收手吞咗啖氣， 雖然我並唔知道軒少到底想點， 但我始終想喺我哋出發之前將隊伍入面嘅隱形炸彈剪除。
如今道理明顯喺潘sir呢邊， 軒少想要再次對付佢哋已經好難。
「為咗走佬， 不惜勾結黑社會， 就算你係警司都講唔通啦！ 一但你受我保護， 你仲想點返去做差佬呀？」 軒少突然爆出呢個問題， 無錯！ 身為警察嘅潘sir做咩係到叫有背景嘅軒少同我哋一齊生存呢？ 為咗喺喪屍手下生還， 黑白兩道係唔係可以合作？
我內心突然話畀我知一個想法， 就係警察同黑社會個邊唔好理住， 集中精神搞掂架船呢邊先… 過幾個鐘只要一搞掂架船， 一切我想點就點！ 到時就算軒少將個警察分屍， 至少我哋都已經安全！
我心中默默感到驚訝， 為自己竟然有一個咁嘅諗法而感到可怕。 無論佢潘sir係咪警察， 佢始終係一條人命！ 唔通為咗自己嘅性命， 唔通只要軒少唔會搞到我， 我就可以袖手旁觀啦咩…
但軒少置潘sir於死地已係必然嘅事， 無論呀豪就唔就範都好， 潘sir都難逃軒少嘅魔掌…
但係… 算啦… 反正依加諗呢啲都係得個諗字， 隨心而行把啦都係。
等待係唔能夠引發奇蹟， 加上海晴對我嘅期望， 所以我決定反客為主， 要由被動變為主動！
「喂… 依加我哋最大嘅敵人係喪屍， 我哋好應該團結一齊， 槍口對外…」 我講都未講完， 軒少就打斷我說話， 完全當我透明。
「依加我以高級督察嘅名義要求你配合警方合作， 盡量挽回政府嘅損失。」 潘sir大條道理用警察個名大呀軒少， 直頭迫佢幫手。
「岩岩救人我都揩唔少， 要計損失嘅話， 我又問邊個攞？ 依加打喪屍， 揩花損傷一定走唔甩， 唔夠喪屍打畀佢哋整親就怪人唔救你？ 咁你當初做咩企出黎打喪屍呀？ 輸打嬴要個個係你！ 唔夠打就乖乖地龜縮喺呢到！ 肉酸到搬咩夾份生存黎叫我出手保護你？ 呢個世界邊有咁著數！」 軒少吸一口煙， 句句迫人咁回答。
「我諗你搞啲搞錯， 成件事我都係被動， 亦根本無嬴過， 又點算輸打嬴要呢？ 依加實情係呢兩位小情侶被喪屍圍攻嘅時候， 軒少你主動出手救人架喎。 我哋差人又始至終都無叫過軒少你幫拖打喪屍， 加上你依加要去用嘅個架船就係我哋警方嘅船。」 潘sir語音剛落， 軒少面色立刻有啲鐵青， 就好似… 潘sir講個架船， 係軒少一直想隱瞞我哋一樣。
「交通警同黑社會本來就河水不犯井水， 點知你哋一大班人無啦啦踩入黎， 又打開我道閘又引啲喪屍圍住呢頭， 之後仲打傷我啲伙計…」 潘sir望向陳晉， 陳晉點點頭。
「無錯， 我見到佢哋幾個人走入黎警局， 我根本唔知佢哋係人定喪屍。 個個光頭佬一句都唔講就打我。」 陳晉默然一陣， 望向權哥再講， 「如果正面打交， 我未必會輸比你。」
權哥揚一揚眉， 然後視線放喺陳晉身上， 睇黎權哥對單對單打鬥都非常重視。
潘sir望一望兩人， 接住繼續講， 「我哋都係警察， 我哋都唔可以影衰警察， 人人都打執法人員呢個社會點有治安？ 你哋兩個係咁咬住我唔放， 當差館係你哋私人避難所， 我點能夠唔做野先？ 我唔知你哋成班人咩來頭， 呢到又停咗電， 千萬個不願， 我唯有落黎巡下， 不過你知軒少你幾好打架啦， 佢一出手就打暈我、 跟住仲審問我， 仲想拎曬警局啲資源！」
「既然呀潘sir你咁把炮， 呢個會唔駛我開落去都得啦。 咁岩記得有事， 呀權我哋走！」 軒少企起身， 轉身就想離開。
「既然軒少你拒絕幫警方手去保護市民， 咁你嘅身份就將會同警察對立！」
「依加我哋正式拘捕你！ 立刻放低你手上嘅槍， 如果唔係我哋就開槍！」 一講完， 陳晉馬上舉起佢把手槍， 由於事出突然， 軒少完全無預料到潘sir突然有此一著， 反應不及加上打側向陳晉， 即使依加轉身開始舉槍， 陳晉都已經可以一槍射死佢。
軒少慢慢放低槍， 舉高雙手， 咬牙切齒咁講， 「死差佬！ 你好野！」
「唔駛咁勞氣喎， 你唔中意嘅， 咪同我哋警方合作囉， 又或者你可以簡畀我塔你喺到， 到時喪屍又好差人又好你都收硬檔！」 一番惡毒說話由潘sir口中講出黎， 好難想像一直睇落全無火氣嘅潘sir要脅人上黎係如此可怕！
「潘sir， 唔洗去到咁盡。 我哋幫你。」 權哥企起身勸交， 軒少放低枝槍後馬上大聲回話，
「你想打擊黑社會呀？ 無得打擊架喎， 全香港咁多瓣， 樣樣都同黑社會有關， 你打擊成個黑社會即係同成個社會作對！ 況且有啲地下秩序要有班黑社會先搞得掂， 你哋啲差人唔理得咁多！ 今日你搞我唔死， 我第日一定令你死無全屍！」
「又唔使起曬鋼嘅， 話曬依加你哋係幫警察嘅好市民， 你應該都明白有個高級督察帶你入安全區比起你班黑道人士自己過關會容易幾多啦？」 軒少聽完面色稍為平和一啲， 潘sir就繼續講， 「一家便宜兩家著， 你都有著數。」
面對兩邊都企硬嘅勢力， 今次現埸嘅會議發展到極度尷尬嘅氣氛， 海晴再次搖搖我手臂， 靠近我耳邊細聲講， 「喂， 有無辦法令佢哋唔好咁樣呀？」
「無用架， 我諗潘sir隻手九成九都係軒少打斷， 佢哋依加互相睇對方唔過眼， 無論點樣無可能和好！」 我非常肯定咁回答。
海晴搖一搖頭上馬尾， 再哄埋我耳邊繼續問， 「我有樣野唔係好明呀， 點解潘sir咁堅持要軒少加入我哋一齊走？ 雖然呢一刻我哋唔應該分化應該團結， 但係都唔洗去到迫佢呀？」
「我覺得… 潘sir應該係覺得一但軒少唔喺自己視線範圍之內， 佢一定會搵佢會報仇！ 如其係咁不如將呢個計時炸彈放喺自己可以控制嘅範圍之內， 至少唔需要怕有人暗地裡會偷襲自己！」 一邊答海晴我一邊已經開始明白， 潘sir並唔係表面上睇落咁和善， 至少佢嘅心計比我哋在座任何人都要重！ 能夠位高權重果然唔會係一啲料都無！
「權哥同軒少係呢到打喪屍最叻個兩個， 但如果無咗把槍， 就等於係斬咗佢哋對手。 依加潘sir一個突襲迫到軒少一定要交低枝槍， 如果軒少夠擔出手嘅話， 喺佢開槍前陳晉已經會射死佢。 當然權哥都可以幫拖， 但一旦開槍就一定會有人受傷。 我諗喺依加無醫生嘅情況下， 以自己為先嘅軒少絕對唔想中槍， 潘sir就係睇中咗佢性格所以先會行呢一步， 同時亦要話畀我哋知， 只要佢喜歡， 呢一度就喺又佢話事！」
「呃… 你又好似好有道理喎…」 海晴呆呆回應我， 我唔理佢繼續講落去。
「其實我諗軒少心中應該無諗過自己一個行動， 不過佢性格比較衝動、 受軟唔受硬， 比呀豪同潘sir咁串法， 佢一定吞唔落啖氣同佢哋頂到行！ 潘sir就係睇中佢性格嘅呢一點， 所以想攞返個彩下馬威姐， 應該唔會真係郁手… 掛…」
「哇… 你睇人都幾叻喎…」 海晴眨眨眼有啲驚訝咁講， 「你講到咁， 咁我哋依加咪會比潘sir控制住？」
「呃… 目前我哋最擔心嘅唔係驚潘sir食住我哋， 而係點樣離開呢到。 講到尾喪屍先係我哋最大嘅敵人， 就算有兩個好打嘅都唔代表可以打我死唔怕痛唔怕死嘅喪屍！」 呢個時候軒少已經徹徹底底咁輸咗被潘sir， 無論係講道理， 定係行暴力， 兩樣都被潘sir掌握住， 軒少只可以服從。
良久後， 軒少吐出一陣煙霧， 慢慢坐返低， 「今次我哋加入！ 但我唔會再畀機會你陰到我！」
「好！ 由呢一刻開始， 我哋就係一個團隊！」 潘sir滿意笑一笑， 「詳細逃亡計劃我一陣再同大家宣佈， 大家都攰啦， 出去休息一陣先， 一決定咗我就通知大家行動！」
呀豪見狀馬上講， 「咁就靠潘sir你帶領我哋啦， 打喪屍唔洗你出手， 交比我哋啦！」