《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 悉心一片
「喂， sorry呀我都係訓唔著呀， 不如你陪我傾下計得唔得呀？」 她扁著嘴搖搖頭。
「吓？」 額頭傳黎陣陣沉重感覺， 一時之間聽唔清海晴嘅話。
只不過係喪屍出現嘅第二日， 我嘅手手腳腳同腰骨已經傷無可傷， 好似全身都拉傷一樣。
疲累就如呼吸一樣， 每一口氣都提醒住自己痛楚。 攰得連依加休息時間， 都完全無感覺入睡， 只能坐低。
從來未諗過， 原來可以坐低， 已經係一種幸福嘅感覺。
休息咗幾秒之後， 我轉過身， 問返海晴嘅說話。
藉著身後嘅陽光， 依稀見到海晴訓咗喺張梳化上面， 雙眼望住天花。
「我話， 不如傾下計啦。 好唔好！」
「sor呀岩岩聽唔到， 你想傾咩？」 我回頭望向海晴。
「你岩岩諗咩諗得咁入神？」
「我只係諗起屋企人， 唔知佢哋依加點呢…」
「係… 我到依加都聯絡唔到佢哋。」 海晴臉帶失望咁講。
氣氛慢慢變我沉重， 難得海晴主動搵我傾計， 我諗佢應該唔想講啲唔開心野。
我諗， 佢應該對以前嘅生活好懷念。
「陪你傾下興趣好唔好？ 你平時鍾意做啲咩架？」 我問。
女人應該最鍾意行街吧。 我心諗。
「又好。」 海晴馬上笑起上黎。
「我好忙架， 唔洗返學都要返part time做野， 所以好少時間得閒。」
「咁你無娛樂架？」
「唔… 我鍾意聽歌架」
「聽歌？」 我心諗， 聽歌都算娛樂架咩？ 「你聽邊類歌架？」
「我鍾意聽twins架」 我呆一呆望住佢， 意識到我無應佢後， 海晴擰個頭過黎， 「你有無聽過老鼠愛大米？」
「無喎， 我好少聽twins嘅歌嘅… 估唔到twins你都岩…」
「唔會！ 你一定有聽過， 你聽一聽個melody就一定記得返架」
說罷， 海晴坐直起身， 開口柔柔地唱。
呢一首係一隻普通話嘅歌。
「我愛你愛著你 就像老鼠愛大米
不管有多少風雨我都會依然陪著你」
「我想你想著你 不管有多麼的苦
只要能讓你開心我什麼都願意
這樣愛你 」
呢首亦都係， 我聽過最動人嘅一首歌。
「有無啲印象啊？ 好出名架呢隻歌， 細個電視成日播架。」
「好似… 無聽過…」
海晴扁起嘴唔滿意咁講， 「有無搞錯！」 生氣得用力拍一拍張梳化。
「其實好少男仔會聽twins囉…」
「講大話啦你， 有邊個男仔唔鍾意twins架！」 海晴雙眼狡黠咁望住我， 無錯嘅… 我細個係鍾意呀嬌… 不過係因為張閃卡…
我連忙搖搖頭揮揮手， 再講，
「呃… 其實我都好鍾意聽佢哋啲歌， 我都有少少印象嘅… 係twins唱個隻… 米奇老鼠嘛…」
「白痴仔， 係老鼠愛大米！」
「係呀係呀老鼠愛大米呀嗎， 幾好聽呀」
「你明明就岩岩先知有呢首歌！」
「真係唔係呢… 」
時間都係太早， 雖然我哋都好攰， 但睡意仍然未到， 話題就隨住我哋越傾越遠。
「你平時同邊個出街多架？」其實我想打聽下海晴有無男朋友， 唔夠膽直接問佢。
「咪朋友囉」
「呃… 你啲朋友同你熟唔熟？」
「一啲啲啦…」
「咁你哋平時出街會唔會去行街架？」 行街應該係女仔先會行掛， 如果同女仔出街多， 咁咪即係會成日行街囉！
「下？ 一時時啦…」 佢啲答案全部都模稜兩可… 為咗自己嘅幸福！ 我決定要直接入問題嘅核心？
「咁… 你大時大節通常點過架？ 好似你上次生日咁…」 問到呢個地步， 如果同屋企人過應該即係無男朋友嘅… 我諗…
「上次生日我要做野啊， 都無乜點慶祝」 …又失敗咗…
「咁… 你大個咗想同邊個結婚？」
……………
.......................................
講咗出口之後， 我先覺得條問題好有問題… 一時間腦海正諗緊點樣解釋， 我視線放喺望緊書架嘅海晴身上。
我眼晴不自覺咁放喺佢身上， 佢白晢嘅手臂放托住頭， 烏低身望住另一邊。
我望向佢明亮嘅雙眼， 佢雙眼好大， 就好似一隻小綿羊初初見人一樣， 雙眼充滿好奇與溫和。
佢突然察覺到我望向佢嘅目光， 擰轉頭望住我。
佢雙手解開馬尾般長髮， 任由烏黑嘅長髮散落肩膀， 再慢慢咬住髮圈望住我。
心亂如麻， 好想將呢種感覺留低。
在回味每種 感覺加倍念記
海晴令我無法移開視線。
我的眼中只有你
細個個陣我成日諗， 到底我幾時先會有自己嘅家庭， 會唔會真係有人鍾意我？ 細個唔知咩係毒撚， 無諗過咩係愛情， 只係相信總有一日上帝會將一個女仔同我嘅生命牽引係一齊， 個個女仔會唔會就係你？
我命中注定嘅女仔係咪你？
我心中響起疑問。 但同時內心深處， 一把聲音問，到底我鍾意海晴啲咩？ 我無法回答。
我諗野諗到出曬神， 望住海晴越耐就越令我全身發熱...
終於， 佢將視線移開， 但海晴佢面都無紅... 係唔係只有毒男先會諗太多？
佢雙手盤起頭髮， 將頭髮扎成一個團子頭， 再望著我講， 「你望咩呀？」
「其實呢… 我係到諗…」 正當我仲苦惱緊如何再問落去， 海晴打斷我思緒，
「諗咩？」
「我係到諗， 你要兜幾大個圈先問我有無男朋友囉」
！！ ！