《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 舊同伴的去向

我望向海晴， 佢依然係熟睡中。 但海晴已經霸曬成張梳化， 我都唔好意訓埋過去， 所以只喺訓喺地下。

我雙眼望向黑色嘅天花板， 視線卻早已穿越上空。

昨日與喪屍嘅戰鬥就猶如無盡嘅精神同肉體上嘅磨難一樣， 幸好我意志足夠堅強， 先可以令自己即使到達筋疲力盡嘅地步， 都可以繼續行動。 不過依加除咗攤喺床上訓覺， 其它嘅咩都唔想做。

喺體力方面， 我嘅耐久力並唔係特別長， 力量又唔係特別大。 但我對於自己體力嘅分配可謂非常有信心， 我可以精細咁感覺到身上嘅體力會係幾時用盡， 又會大概知道食幾多野可以坐幾耐先肚餓， 或者係跑幾耐先肚餓。 呢股能力或許黎自於多年黎都無時間食足三餐之下， 為求生活身體只好節約每一分體能， 並將每一分體力都發揮出最大嘅功效， 慢慢地成為咗一種本能。

睡意慢慢攀升， 雙眼都好攰， 好快我又再次入訓。





好快， 太陽再次出返黎。 陽光藉住窗廉嘅空隙透入黎， 為房間帶上黑白黑白嘅間隙。

經過咗慢長嘅一晚， 我終於再次訓到自然醒。

「咯咯──」

門口傳黎輕聲兩下嘅敲門聲， 我望一望梳化， 見海晴都係唔郁， 即係仲未醒， 呢隻懶訓豬。

我起身去門口打開門， 見到陳晉無表情嘅面孔， 「訓醒未？」





「醒架啦， 比多五分鍾我哋， 好快」 我驚佢會打我哋， 點知佢竟然出奇地好相處。

「好， 搞掂出黎集合， 差你兩個。」 說罷陳晉就轉身離開， 順道關上門。

我望一望台上嘅時鐘， 現時正好係九點零五分。

海晴仲未醒， 佢正背向我打側咁訓， 我行去拍一拍佢膀頭， 佢朦朦朧朧咁打開雙眼， 轉過身， 「唔……？」

「起身啦， 潘sir有野叫我哋做， 好快我哋要行， 你去洗個面先啦。」 我一口氣將所有說話交帶好， 因為我唔希望再出錯， 令到佢哋有機會捉到我哋碰腳。





「嗯…… 我起身啦。」 佢慢慢坐起身， 再問， 「潘sir係咪諗到點樣走啦？」

我沉默一下， 唔知點答， 「都算嘅…… 你洗個面先啦， 一陣陳晉會話比我哋知，

「哦…」 海晴呆呆答道， 睇落好似未訓醒一樣。

「快啲啦， 我哋就遲到啦。」

「得啦得啦！」

幾分鍾後──

我哋一群人圍住一張台坐喺到， 好似一班小組討論嘅學生一樣， 令我有啲懷念中學嘅生活。

「擦── 擦擦──」





陳晉唔知係邊到拎咗一張白紙出黎， 然後用原子筆不停喺上面畫線。

「喂你畫完未呀？ 時間無多啦一陣天黑仲麻煩呀。」 軒少不耐煩咁講。

「畫完。 呢幅係我哋前往槍械庫嘅路線圖， 請各位記熟佢。」 陳晉並無唔耐煩， 佢遞張紙比軒少， 軒少一手拎過黎睇。

話說陳晉個名聽落好型， 佢雙目都炯炯有神， 雙眼唔大但睇落非常有魅力。 眼眉唔粗又唔幼岩岩好， 其實佢都幾型仔。 不過聽佢說話嘅方式令我覺得佢唔係好似香港出世咁。
喺大家睇緊地圖嘅時候， 我企起身掀開塊窗廉睇下外面嘅情況，

「呃呃呃呃呃……… 呃呃哼哼哼哼哼哼………………」

有一隻喪屍猛然轉頭，

「呃啊啊啊啊！！」





「哇！」 我嚇得馬上拉上窗廉。

「做乜柒呀你」 軒少用好似望白痴嘅眼神睥向我…

「唔係呀… 出面有喪屍望過黎…」

「頂… 點解喪屍好似睇落比琴日多咗啲咁嘅…」 我轉頭自言自語。

海晴聽到之後抬頭答道， 「會唔會喺個啲離開咗警察局嘅感染者又返返黎呢到呀？」

軒少一邊坐起二郎腿， 一邊fing一fing佢頭髮pat陰， 再一邊答海晴， 「無可能， 堆喪屍如果離開咗就即係有新野吸引佢哋。 我哋入咗黎又無再出去， 點會引多咗喪屍過黎？ 係都應該少啲啦。」

我慢慢走返去圈子入面， 點點頭道， 「無錯， 之前我哋都推論過， 喪屍見到獵物就會不停咁追住佢， 直到佢追到…」





「又或者… 有新目標吸引佢…」

「新目標， 會唔會係Madam佢哋！？」 海晴開心咁雙手合實， 輕輕大叫出黎。

「Madam？」 陳晉向我哋投出疑惑嘅目光， 海晴見狀連忙回答，

「係呀， 我哋黎之前喺poly宿舍個邊見到Madam Fung， 不過之後我哋走緊個陣失散咗…」

「不過佢話會喺呢到同我哋匯合架！」 海晴一輪嘴咁講。

「Madam Fung…」 陳晉陷入沉思。

「你應該都識Madam架啦」 我隨口問道。

「都算識。」 陳晉都隨口答道。





軒少呢個時候插嘴， 「理得係邊個， 依加我哋先要拎咗批槍先， 唔係你主人又搵槍指住我架啦。」 講到最後軒少將視線放喺陳晉， 甚至串佢喺潘sir隻狗。