《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 準備 上

不過陳晉並無理佢， 只係將話題拉返去路線入面。

呢個時候大家都開始討論點樣安全去到另一邊。

「由呢度過去個邊大概要幾耐？」 權哥問道。

「正常情況大概十分鍾左右。」

「有無喪屍？」





「有， 差唔多所有嘅警察都受感染， 但我唔知道佢哋嘅行動模式， 不過極有可能喺走廊處遊蕩。 」

當兩個唔多野講嘅人溝通嘅時候， 任何說話都變得無比簡潔。

軒少遞張地圖比我， 叫我， 「細路睇熟佢， 解釋埋比你條女聽， 一陣靠你保護佢， 我哋無閒手保你兩個。」 講完佢都加入陳晉權哥嘅討論圈。

我接過路線圖， 海晴都坐埋黎我呢邊一齊睇。

路線圖比較簡單易明， 簡約黎講呢間差館大概分為三棟大廈， 姑且叫做A樓B樓同C樓。 A、 B、 C三棟大樓呈一個凹字型， 左邊就喺A， 中間B而右邊係C。 我哋身處嘅就喺中間嘅B樓， 而呢座交通基地嘅正門大閘亦都係設喺B樓嘅前方， 亦即係凹字嘅正中間。





而槍械庫就喺係大樓A。

呢三棟大樓係互通嘅， 不過只有最低層嘅走廊先能夠穿過座大廈， 換言之我哋依加位於嘅四樓， 走落去地下個層， 再穿過走廊去到大樓A嘅地下， 然後再落地庫。

聽落都唔係好複雜姐， 前提係無喪屍嘅話…

「我哋由窗口個邊爬過去會唔會比較易少少呢？」 我提議道， 因為咁樣就唔洗面對喪屍。

「你去試下囉， 一啲都唔易， 唔信你跌落去唔好叫救命。」 卻換黎軒少冷嘲熱諷。





「槍械庫喺係隔離棟樓個到， 而去到個一邊仲要落到去最底層先會到。」 陳晉再慢慢解釋路線圖。

海晴睇得明之後點一點頭， 向陳晉提議， 「咁我哋就一間房接住一間房， 咁樣一步一步溜過去好唔好？」

「如果我哋無辦法一次過衝到過去， 就只能安全起見， 一步一步慢慢移動過去個邊…」 陳晉點點頭回應。

「其實咁樣都係好危險， 因為我哋唔知道隔離樓入面到底有幾多感染者， 所以兩種行動方式存在嘅危險基本上無咩分別。」 我眼神喺佢哋之間游走， 再講出我意見。

「哎依加我哋真係去又死唔去又喺到等死。」 我感慨咁講。「但係我唔打算餓死喺呢度， 所以我一定會去。」 權哥道。

「我哋暫時唔使面對外面嘅喪屍， 只係需要對付警署入面嘅喪屍， 都算係不幸中之大幸。 我哋要盡快行動， 喪屍可能喺出面搵唔到獵物先會返黎呢邊遊蕩， 加上仲有你講個個咩Madam可能引班屍返黎， 越遲我哋越難走去船個邊。」

軒少突然一面認真， 慢慢咁同我哋分析依加嘅處境， 認真起上黎嘅軒少簡直係難以置信， 不過佢講嘅野的確幾有道理。

可惜接落黎我哋先知… 佢依然係一個古惑仔…





因為佢實在好鍾意無啦啦挑人機…

「你班差佬真係無春用！ 過咗成日連一個人都無黎到救人！ 交稅簡直係養你哋呢班廢柴！」 軒少大聲咁叫道， 好明顯矛頭又係直至陳晉。

陳晉馬上抬頭回望軒少， 呢個時候我哋團隊唔可以亂， 尤其是依加內憂外患嘅時候。 我見狀馬上拉開話題， 「咁唔好曬時間啦， 我哋馬上行動啦， 陳sir你有無咩武器比我哋用？」

我唔可以再逃避， 一定要好好咁做好呢件事！