《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 準備 下
陳晉移開視線， 喺櫈底拎出一個黑色袋， 「有， 我依加分配武器比你哋。」
「係就快啦， 我枝槍呢死差佬？」
咁落去唔係辦法， 軒少下下都疾住陳晉， 好明顯對佢之前搵枝槍指住佢心心不忿。 如果佢再係咁樣， 不但會令我哋團隊氣氛僵硬， 甚至可能影響我哋嘅心情或者令我哋分心。 雖然聽落並唔係咩大事， 但一啲微不足道嘅事正正可能會對我哋前路做成無可想像嘅影響。 始終我哋將要面對嘅喺喪屍， 喺我哋一無所知嘅喪屍。
正當我心諗點樣解決呢個入憂嘅時候， 一把嬌憨嘅女聲驀然開聲。
「喂軒少！ 你唔好咁啦！」 海晴擰轉頭， 竟然阻止軒少串陳晉。
海晴好型呀你… 估唔到一個女仔仲大膽過我… 雖然我覺得好羞恥…
但你實在係我新嘅偶像呀！！
不過明顯地軒少都唔會憐香惜玉， 完全無收起其輕忽態度嘅意思， 佢斜眼望向海晴， 接住沉起聲線道，
「點呀， 唔教下個差佬做野佢就咩都唔識做架啦， 妹妹仔。」
「你依加根本就喺係到撩事鬥非！」 海晴鼓起面孔， 喺到教訓軒少， 一時之間大罵令佢細緻嘅面孔泛起一陣紅潤。
「無事嘅無事嘅， 大家唔好咁燥啦。」 喺軒少發作之前， 我馬上企起雙方中間做和事佬， 「大家嘈架傷和氣呀， 係咪先。」
軒少收起表情， 望我哋一眼之後就收回眼神， 而陳晉就繼續喺黑色袋到拎野出黎。
「我哋武器唔多， 所以將會以近身武器為主。」陳晉邊講邊拎出一枝警棍出黎， 「呀權。」 然後遞比權哥， 權哥沉默地接過。
「喂你唔係一枝槍都無下話。」 軒少盯住黑色袋， 語氣輕挑地同陳晉講。
「我哋物資唔多， 潘sir嘅意思係叫我哋唔好用槍械， 只打近身戰。 加上前往目的地嘅通道比較狹窄， 喺走廊到同感染者發生槍戰一定會引起其他感染者嘅注意。」
陳晉一邊解釋， 一邊再拎出一枝警棍， 一旁嘅權哥正喺到練習揮擊， 原來防暴警棍係可以伸縮。 權哥用力揮出， 警棍就順勢彈出， 身旁嘅我都感受到權哥嘅力氣。
若正面食上一棍， 真係可能會暈低。
「我哋警棍淨返唔多， 只係我同潘sir嘅個人裝備同埋喺死去嘅同袍身上搜括出黎。 所以有部份人可能無警棍用。」 陳晉拎出最後一枝警棍， 交比軒少。
我瞪大眼晴難掩驚訝， 而海晴都望向我， 我亦轉頭望向佢。 我哋都覺得有啲奇怪， 點解陳晉仲會將警棍交比軒少？
陳晉似乎察覺到我哋嘅目光， 頭也不回答道， 「我唔在乎其他人點睇我， 我只係想完成任務。 軒少比你高大， 所以亦係我哋主力戰鬥人員之一。」
軒少冷哼一聲， 接過警棍。
陳晉繼續講， 「武器已經派曬， 之後得返裝備。」
喺各人目光下， 陳晉拎起黑色袋子， 將其反轉倒出袋入面剩餘嘅東西。
「沙啦沙啦──」
「每人拎一對手套， 我仲有兩個頭盔同一個圓盾， 你哋自己分咗佢。」 桌上有兩個黑色嘅圓型頭盔， 就如同一般防暴警察所用一樣， 頭盔上印有警察 Police 幾隻字， 看似無比堅硬， 對抗喪屍都可以保護頭部。
而圓盾則同樣印有黑底白字嘅警察字眼， 圓盾為一個透明且剛好同手臂一樣大小嘅盾牌， 睇落應該幾輕便， 但我對個盾嘅堅硬度就有小小懷疑。 可能喺因為透明嘅關係， 望落同一個膠盾無分別…
我執起一對手套， 本來我仲以為會喺警察專用嘅防暴手套， 點知只係一對普通嘅勞工3M手套…
陳晉無視我失望嘅目光， 拎出一枝滅火筒遞去我面前， 繼續講， 「呢度仲有一枝滅火筒， 你可以用黎擊退感染者用。」
「唔…… 唔該……」 我心懷感激接過滅火筒， 至少依加我都唔會手無寸鐵。
「所有嘅裝備就喺得咁多， 之後我會同各位講下團隊嘅結構。」
「團隊結構？」 我重複陳晉嘅說話， 以示不明白。
「係。 就係我哋行進嘅方式以及隊形。」
「咁好明顯係陳sir你帶頭行啦係咪先， 槍你又收起我， 武器又得枝棍仔， 咁好應該又咁有經驗嘅差佬帶頭啦係咪先？」 軒少指住陳晉， 語氣回復一貫輕蔑， 「咪住先， 你身上有無槍？」
「我只有一枝手槍， 潘sir交比我以備…」
「頂你呀得你有槍咁我哋呢？！ 你…」
「軒， 唔好再嘈。」 一向沉默嘅權哥罕有地出聲打斷軒少， 「專心準備好自己。」
言下之意即係叫軒少顧好自己先， 唔好再搞三搞四。 哈哈哈， 軒少聽完之後本來再想爆粗， 不過卻轉為安靜落黎。 睇黎一物治一物真係存在架哈哈， 望住軒少個樣我真係好想笑， 不過一諗起接下黎要同喪屍戰鬥， 笑意就如浪潮般退去。
陳晉向權哥點點頭， 繼續講， 「根據潘sir嘅計劃， 我哋將會由啊軒帶頭…」
「我帶頭！？ 你無野下話？ 點都係你條差佬行先啦！」 軒少聽完又起身想打交咁款， 但陳晉馬上揮揮手叫軒少坐返低， 而權哥都搖一搖頭，
「你聽我講埋先…」 軒少聽完陳晉講就停止說話， 眼晴轉為一開始見面個種冷漠眼神， 望向陳晉。
「我哋團隊會採用兩個行頭， 一個中間， 兩個包尾。 潘sir嘅意思係， 啊軒你比較敏捷同跑得快， 而且觀察力比我哋好， 所以交由你負責帶頭打探前路嘅感染者， 而呢位後生仔就會同你並肩而行， 負責支援你開路工作。 呢位…」
「我叫劉海晴， 陳sir請你記住。」 正當陳晉嘅手指向海晴嘅時候， 海晴就打斷其說話回答佢。
「好， 至於海晴力氣無我哋咁大， 所以將會留喺中間打退漏網嘅感染者。 而我同啊權將會斷後， 負責擊退身後嘅感染者。 但係隊形唔係絕對， 基本上我認為去到槍械庫嘅中途我哋將會調動一下， 打前頭同斷後嘅組別會調轉， 而幾時調就聽我指示， 咁樣可以令前排抖下。」
出奇地， 軒少並無反駁而只係保持沉默， 我個人覺得陳晉嘅排陣的確好有道理， 如果保持呢個隊形話唔定我哋真係可以一齊活著返黎…
「有無問題？」 陳晉視線掠過我哋四人， 海晴忽然舉手。
「做咩姐你」 我望向海晴， 我以為佢只係伸懶腰， 但佢只係舉高一隻手又無放低…
「咩呀？」
「你舉手做乜呀…」 坐喺佢身旁嘅我問道。
「問… 問問題囉！ 唔係我舉黎做咩呀？」 陳晉呆一呆不懂反應， 即使佢望到海晴舉手都無叫佢… 好明顯佢都估唔到會有人舉手等佢叫…
而軒少爆出一口氣大笑， 權哥都忍唔住擰轉面…
軒少嘲弄咁學海晴舉手， 情況好鬼滑稽， 佢仲要打開個口好似個傻仔咁樣， 烏低小小身雙眼反白望天花板， 「呀呀陳sir… 我都有問題呀！ 簡我啦簡我啦！ 我想問問題呀！」
海晴dup低頭， 雙手緊緊捉住櫈邊， 如此可愛嘅動作換黎軒少變本加厲嘅笑聲！
「哈哈哈哈哈哈…… 你幾歲呀妹妹仔， 你仲係小學生呀……」
「我諗佢都係有禮貌姐…… 噗……」 我出口幫海晴打完埸， 可惜未講完就忍唔住笑…
我感覺到手臂被海晴擰咗一大下， 「哇好痛呀！」 令我立馬縮開手臂推開佢！
我抬頭望向海晴， 佢成塊面都紅扑扑咁， 佢嬌嗔咁罵我， 「唔準笑！！」
「咁你真係好柒呀嘛！！ 你擰我都無用架！」 我大叫為自己辯護！ 如果唔係未出發就先斷一臂啦！
陳晉乾咳一聲， 「你想問咩？」
海晴聽到之後慢慢放低手， dup低頭嘅佢冷靜咗一陣， 跟住抬頭問， 「我想問我哋中途見到喪屍嘅話， 應該點做？」
「吓？」 當我正想話佢白痴嘅時候， 我先諗起…
無錯… 我哋見到喪屍應該點做？ 應該一個一個殺， 定係擊退佢哋？ 定係目的只係一次過跑過去？
「我哋目的係槍械庫， 由呢到過去需要大約十分鐘， 最理想情況係擊退感染者， 而萬一危害到隊員嘅性命， 我會開槍擊殺感染者。」 陳晉回答。
陳晉一直以黎都叫喪屍做感染者… 唔通佢相信個堆喪屍仲係人？
的確覺得佢哋喺喪屍又好似只係我哋一廂情願， 一直以黎被電視電影洗咗腦， 令我哋覺得唔怕死又衝過黎嘅都係喪屍… 但係萬一， 萬一佢哋仲係人呢？ 萬一佢哋真係只係感染者， 只係差一個解藥就可以回復正常呢？
咁我哋一直以黎豈不是… 係到殺緊人？
突然膀頭傳黎一下力道， 「唔好諗咁多， 要做嘅始終都要做， 你無得簡。」 軒少神情冷淡望向前方， 卻係對著我講。
軒少就好似睇穿咗我嘅諗法一樣， 一語道破我心中包袱。
但係… 佢無錯…
我有試過叫停隻喪屍， 佢無理。 我有試過推開佢， 佢照衝過黎。 我有試過避開佢， 佢死纏我唔放。 錯嘅唔係我… 係呢個世界。 呢個充滿喪屍嘅世界， 將我迫上絕路。
「嗯… 我明白。」
權哥企起身， 望向時鐘， 「幾時出發？」
陳晉再次環視大家， 跟住亦都起身道， 「無問題嘅各位整理一下裝備， 需要就去下廁所同拉下筋， 我哋喺十分鐘後出發。」